Yesaya 9 - AHYERƐLƐ KRONGRON

Asomdwee Hene n’aworɛ

¹ Nakoso bɛ bɔ bɛ wora abɔ ne, b’amaneɛnwunɛ ne ngɔha berɛ. Daa ne, obuli Sebulɔn aseɛ ne Nafetali aseɛ animtia, nakoso kyẽa bie de, atee bɔ ɔla mboanoa ne, yeɛ aseɛ bɔ ɔwɔ Yɔɔdan si dɔ ne, ɔne Galilea bɔ ɔte Amaenmaensofoɛ mbɔtam ne, ɔkɔhyɛ bɛ animnyam.

² Maen bɔ né ɔnate awosii nu ne, wanwu kanea piri ne, bɛ bɔ né bɛte awosii kabii aseɛ so ne, kanea ata bɛ so.

³ Ama maen ne anu mmenia bata bayɛ pee, amaa banya anika piri, benya ahurusi wɔ wɔ nyunu kyɛbɔ mmenia nya anigye wɔ fieso aleɛ falɛ nu ɔ, kyɛbɔ mmenia di ahurusi wɔ koɛ nu nzesadeɛ hyɛlɛ nu ɔ.

⁴ Ofikyɛ b’adesoa bɔ ɔso bɛ ne, bakaa bɔ ɔla bɛ kɔme anwo ne, yeɛ mmenia bɔ bɛhyɛ bɛ so nemɔ b’abopura ne, abubu nu kyɛ kyẽa bɔ elili Midian so ngonim ne.

⁵ Ofikyɛ mbaboa biala bɔ koɛhonɛniɛ wafa watia ase kum kum ne, ɔne ataadeɛ biala bɔ bafa bafɔrefɔre mogya ne, bɛkɔfa bɛkɔyɛ eyein bɛkɔsɔ see.

⁶ Ofikyɛ bawo akwadaa bama yɛ, bama yɛ baa bienzua, ye yeɛ ahennie ne kowura ye sa ɔ, na ye dumaa ne, bɛkɔfrɛ ye kyɛ, “Foɛtulɛniɛ Nwanwaniɛ, Nyameɛ Tuminiɛ, Seɛ bɔ ɔwɔ berɛ Afebɔɔ, Asomdwee Hene.”

⁷ Ye ahennie, yeɛ ye asomdwee kɔhɔ so kɔtrɛ bɔ olle ayieleɛ ɔ; ɔkɔtena Dawide ahennie bia ne aso, okoli ye ahennie ne aso, na ɔkɔfa pɛpɛɛpɛyɛlɛ ne tenenee koli bia ne maa okotindim kogyina, ofi kekesaala ye maa okoodwu afebɔɔ. Asafo AWURADE ye nungunɛhwenɛ sonongo ne yeɛ ɔkɔyɔ ɛhe ɔ.

AWURADE afɛ Yisrael so yaa

⁸ AWURADE ato Yakob ngraa, na ndɛenbualɛ ne awa Yisrael so.

⁹ Na maen ne anu ama mukoraa, bɔ bɛ ole Efraim ne Samariafoɛ ne, bekonwu ye, bɛ yeɛ bɛkekã edwirɛ mbiri mbiri bɛmoma bɛ nwo so kyɛ,

¹⁰ “Mmerekese sua nemɔ adwiri agua, nakoso yɛkɔfa nyɔboɛ bɔ base ɔ yɛkosi; babubu akyea nemɔ bagua, nakoso yɛkɔfa sida yɛkosi bɛ gya nu.”

¹¹ Yiti AWURADE kɔma bɛ bɔ bekyi Resin ne bekodwɔso bekotia ye, na ɔkɔkanyane ye pɔfoɛ mɔ.

¹² Siriafoɛ kofi eyia afiteleɛ, yeɛ Filistifoɛ kofi eyia atɔleɛ, na bɛkɔbaye bɛ noa nu bɛkɔme Yisrael. Na ɛhemɔ amukoraa nu ne, ye ahone andɔ nzue nu, na ɔtɛ dwɔso tia bɛ.

¹³ Nakoso maen ne anza angɔ ye bɔ ɔhwene bɛ so ne berɛ, yeɛ bambena Asafo AWURADE si atee.

¹⁴ Yiti AWURADE kɔpɛ Yisrael ye ti ne ye dua, ye ɛberɛ ne elemmire ɛlɛho komapɛ kofi berɛ.

¹⁵ Panyi titireniɛ ne, ye ole tire ne, yeɛ ngɔmhyɛlɛniɛ bɔ ye ngyerɛkyerɛ te nnakannaka ne, ye ole dua ne.

¹⁶ Ofikyɛ bɛ bɔ bekyire maen he atee ne, bɛmaa bemini, na bediedie mmenia bɔ bekyire b’atee ne maa bɛkɔ ewue nu.

¹⁷ Ye sɔ ne ati, AWURADE nye ngɔgye bɛ mmerandeɛ nemɔ nwo, yeɛ ongonwu bɛ nyisiaa ne b’akunafoɛ mmrasua anwumvoin; ofikyɛ bɛ mukoraa benzuro Nyameɛ, bɛte bɔnefoɛ, na ebiala kekã ngwaseasɛm. Na ɛhemɔ amukoraa nu ne, AWURADE ahone andɔ nzue nu, na ɔtɛ dwɔso tia bɛ.

¹⁸ Nahorɛ nu, amumuyɛɛ ogye kyɛ see, ɔyera agurɛ ne mmowue, ɔyera ɛhɔayeɛ too, na bɛyɛ nwosina ningɔnn bɛkɔ anwuro.

¹⁹ Asafo AWURADE ɛyaafɛlɛ piri ne, wama aseɛ ne ayera, na mmenia ne ayɛ kyɛ eyein bɔ bɛfa bɛsɔ see ɔ, na ebiala wannwu obiɛngo anwumvoin.

²⁰ Befoti aleɛ wɔ famaa so, nakoso ɛhɔen tɛ ku bɛ, bedidi wɔ bɛ sa bɛen so, nakoso bɛ ko nyi, na ebiala keka ye bɔbɔ ye sa nwo naen di.

²¹ Manase keka Efraim di, yeɛ Efraim koso keka Manase di, na bɛ munyɔ bɛko betia Yuda, Na ɛhemɔ amukoraa nu ne, wanyakyi bɛ so yaa fɛlɛ, na ɔtɛ dwɔso tia bɛ.