Yesaya 8 - AHYERƐLƐ KRONGRON

Yesaya awa ne dumaa

¹ Afei AWURADE sele me kyɛ, “Fa nyɔboɛ pirikua taataa bɔ bɛkyerɛ so ɔ, ná twerɛ bɔ sona kɔkenga kɔte ye bo ɔ, kyɛ, ‘Maheri Sala Hasibase’.

² Na mmane ɔsɔfo Yuria ne Yeberekia awa Sakaria bɛhyerɛ bɛmane me bɛyɛle ye nwo adanzefoɛ nahorɛfoɛ.”

³ Afei me ne ngɔmhyɛlɛniɛ braa ne yɛlale, ɔnwonzɛle, na ɔwole bienzua. Na AWURADE sele me kyɛ, “To ye dumaa Maheri Sala Hasibase,

⁴ ofikyɛ, anzana akwadaa ne konwu ‘Baba anaa Mooni’ kã ne, né Asiria hene wasoa Damasko anwonya ne Samaria koɛ nu nzesadeɛ wahɔ.”

⁵ Yeɛ AWURADE sa sele me kyɛ,

⁶ “Ɔnate kyɛ maen he apo Siloa asue bɔ ɔsẽ dinn ne, ná bama Resin ne Remalia awa ne nwo suronyi atɔ bɛ so ne ati,

⁷ yiti tie, AWURADE kɔfa asue Yufreti nu nzue worawora bɔ ye noa yɛ hye, bɔ ɔte Asiria hene ne ye animnyam amukoraa ne, na okoyi kobu kɔfa ye boo ne ye noa amukoraa.

⁸ Okoyi kɔɔsẽ kɔfa Yuda, okobu kɔfa ye so, ɔkɔla bɛ kɔme anu, na ɔkɔtrɛ ye ndaa nu kɔfa w’aseɛ ne amukoraa so, O Yimanuel!”

Maen maen mɔ koli ngoguo

⁹ Maen maen mɔ, ɛmɔ de, ɛ́mɔhã ɛmɔ nwo bɛbɔ nu, nakoso ɛmɔkoli ngoguo, dedeede maen mɔ amukoraa, ɛ́mɔyɛ asoɛ bétie, ɛ́mɔyɛ koɛ nu anwoboa, nakoso ɛmɔkoli ngoguo, ɛ́mɔyɛ koɛ nu anwoboa, nakoso ɛmɔkoli ngoguo.

¹⁰ Ɛmɔ de, ɛmɔhɔ agyina, nakoso ɔkɔyɛ mbaen, ɛ́mɔbɔ porɛ, nakoso ɔngɔyɛ yee, ofikyɛ Nyameɛ ne yɛ yeɛ yɛwɔ berɛ ɔ.

¹¹ AWURADE dwudwo hyirele me wɔ mmerɛ bɔ né ye tumi wɔ me so serɛserɛ, na ɔbɔle me kɔkɔ kyɛ, maen he atee bɔ ɔnate so ne, nnɛmaa mefa so bie. Ɔnwa:

¹² “Nikyee biala bɔ maen he frɛ ye ‘bɛ ti so porɛbɔlɛ’ nen, nnɛma ɛmɔfrɛ ye sɔ bie; yeɛ bɔ besuro ne koso, nnɛma ɛmɔsuro bie, yeɛ nnɛma ɛmɔsuro.

¹³ Asafo AWURADE ngome yeɛ odi kyɛ ɛmɔbu ye kyɛ ɔte krongron ɔ. Ye yeɛ odi kyɛ ɛmɔsuro ye, ye yeɛ odi kyɛ ɛmɔma ye nwo suronyi tɔ ɛmɔ so ɔ.

¹⁴ Ɔkɔyɛ nekaa krongron, sundidua nyɔboɛ, ɔne nyɔbotaen bɔ ɔmaa besoti ɔ kɔma Yisrael abusua nyɔ ne, na ɔkɔyɛ atodum ne ngaen kɔma Yerusalemfoɛ.

¹⁵ Bɛ nu pee kosoti wɔ so, bekofi ase, bekopura; bɛkɔtɔ ngaen nu, na bɛkɔhye bɛ bɛkɔhɔ.”

¹⁶ Bobɔ adanzeɛ ne, na ngyerɛkyerɛ bɔ mefa mema m’asuafoɛ ne, fa nzɔanoɛ sɔ ye noa.

¹⁷ AWURADE bɔ waye ye nye wato buro wafea Yakob boso ama ne, ngɔfa me wora ngowura ye nu, ngɔpena ye si atee.

¹⁸ Ɛ́mɔtie, me ne me mma bɔ AWURADE afa bɛ ama me ne, yɛte sɛngyerɛnneɛ ne kɔkɔbɔlɛ bɔ ofi Asafo AWURADE bɔ ɔte Sion bokaa so ne berɛ yɛma Yisrael.

¹⁹ Na sɛ mmenia kã kyire ɛmɔ kyɛ, “Nzamangɔmhyɛlɛfoɛ ne ahɔmeɛ bɔ bɛ dwudwolɛ te katekate ne boborɔboborɔ ne, ɛmɔhɔ bɛ so abisa” a, aso nna maen bɛ Nyameɛ berɛ yeɛ odi kyɛ bebisa nikye ɔ? Aso odi kyɛ bebisa ateasefoɛ ti wɔ awufoɛ berɛ anaa?

²⁰ Odi kyɛ ɛmɔpena mmeraa ne ne adanzeɛ ne si atee! Nahorɛ nu, sɛ banga ye kyɛbɔ edwirɛ ne ɔte ne a, ye de né nahorɛ biala nne bɛ nu.

²¹ Bɛkɔfa ɛhɔen ne aworabɔlɛ bekohyinihyini aseɛ ne aso. Na sɛ ɛhɔen ku bɛ a, b’ahone kohu, na bɛkɔwa bɛ hene ne bɛ Nyameɛ amoen. Bɛkɔto bɛ nye bɛkɔnea anwuro,

²² bɛkɔto bɛ nye bɛkɔnea aseɛ so, nakoso aworabɔlɛ, awosii ne amaneɛ yeɛ bekonwu ye ɔ; na bekogyi bɛ bekogua awosii kabii nu.