Yesaya 7 - AHYERƐLƐ KRONGRON

Yesaya fa ngraa kɔma Nana Ahase

¹ Yusia awa Yotam ɔwa Ahase bɔ ɔte Yuda hene ne, ye aberɛ so, Siria hene Resin ne Yisrael hene Peka bɔ ɔse ole Remalia ne, bɛɛfale koɛ bɛtetale Yerusalem, nakoso bangora banni so ngonim.

² Na bɛbɔle Dawide awuro ama mɔ amaneɛ kyɛ, “Siria ne Efraim bayɛ apam” nen, Yuda hene Ahase ne ye mmenia bɛ nwo wosole bɛ tɛtɛtɛtɛ kyɛ ɛhɔayeɛ nu mmakaa bɔ mvrama woso bɛ ɔ.

³ Nakoso AWURADE sele Yesaya kyɛ, “Kɔ ná koyia Ahase, ɛne ɛwa Sea-Yasubo wɔ anwuro dɔ ɛkwaa ne noa, wɔ atapoɛ atee ne aso dɔ,

⁴ ná se ye kyɛ, Gyina pindinn, yɛ konn, nnɛsuro, yeɛ nnɛma wɔ kunu tete wɔ wɔ gyetia nyɔ hemɔ bɔ begye monɛɛmonɛɛ ne anwo, bɔ bɛ ole Sirianiɛ Resin ɔne Remalia awa ne bɛ yaa hahii bɔ bafɛ ne.

⁵ Ofikyɛ Siria ne Efraim ne Remalia awa ne babɔ wɔ nwo porɛ, na bɛnwa:

⁶ Ɛ́mɔma yɛɛtua Yuda ma ahunundetelɛ tɔ ye so, ná yɛli so ngonim, ná yɛfa Tabeel awa bienzua ne yɛli so hene.”

⁷ Ye sɔ ne ati, AWURADE Nyameɛ nwa nyoo: Sɔ porɛ ne ngogyina, yeɛ ɔngɔyɔ adwuma.

⁸ Ofikyɛ Siria ahenguro ole Damasko, yeɛ Resin yeɛ ɔla Damasko noa ɔ. (Na toonn bɔ ɔkwaadwu afoɛ aburasia ne nnu ne, Efraim kɔbɔ bɔkɔɔ bɔ ɔngɔyɛ maen ko ɔ.)

⁹ Efraim ahenguro ole Samaria, yeɛ Remalia awa ne yeɛ ɔla Samaria noa ɔ. Na sɛ ɛmɔanne banni a, nahorɛ nu, ɛmɔngɔhora ɛmɔ gya nu gyina.”

Yimanuel ne te sɛngyerɛnneɛ

¹⁰ AWURADE sa sele Ahase kyɛ,

¹¹ “Bisa sɛngyerɛnneɛ bie fi AWURADE wɔ Nyameɛ berɛ; kyɛ ɔkɔ kuronn kyɛ ɛborɔ dɔ oo, anaa ɔkɔ anwuro anwuro kyɛ nyameɛso oo.”

¹² Nakoso Ahase buale kyɛ, “Mengobisa, yeɛ mengoso AWURADE mengɔnea.”

¹³ Yeɛ Yesaya sele kyɛ, “O Dawide awuro ama, ɛ́mɔtie! Ɛmɔnwa nzɛ ɔte edwirɛ baa kyɛ ɛmɔma ɛmɔ nwo yɛ mmenia ahi, bɔ yeɛ ɛmɔama ɛmɔ nwo ayɛ me Nyameɛ koso ahi ye?

¹⁴ Yiti AWURADE bɔbɔ kɔma ɛmɔ sɛngyerɛnneɛ. Ɛ́mɔtie! taluwa bie kɔnwonzɛ kɔwo baa bienzua, na ɔkɔto ye dumaa Yimanuel.

¹⁵ Mmerɛ bɔ onwu bɔne a ɔkɔpo ye, ná wafa paa ne, nandwie nyɔfonesue nye loe ɔne woɛ yeɛ okoli ɔ.

¹⁶ Ofikyɛ, aseɛ bɔ so ahemvo nyɔ bama ahunundetelɛ atɔ wɔ so ne, ɔkɔkakyi kurofoen koraka né akwadaa ne anwu kyɛ ɔkɔpo bɔne, ɔne kyɛ ɔkɔfa paa ɔ.

¹⁷ “AWURADE kɔma mmerɛ bie kɔto wɔ ne wɔ maen ne wɔ baba awuro ama, bɔ sɔ mmerɛ ne ɔttole ɛmɔ le, ofi mmerɛ bɔ Efraim tele ye nwo fili Yuda nwo ɔ. Ɔkɔfa Asiria hene so.

¹⁸ “Sɔ mmerɛ ne, AWURADE kɔbɔ mvrɛma kɔfrɛ nwɔsea bɔ bɛwɔ Misraim asue mɔ bɛ sorɔ dɔ, ɔne ɛwommaa bɔ bɛwɔ Asiria aseɛ so ɔ.

¹⁹ Bɛ mukoraa bɛkɔwa bɛkɔɔtenatena kongonyi nemɔ anu, nyɔbotaen ndokuro nemɔ anu, ndire mmowue mmowue ne nzenzaen amukoraa so.

²⁰ “Sɔ mmerɛ ne, dɛmaa bɔ AWURADE abɔ ye paa wafi asue Yufreti si dɔ, bɔ ye ole Asiria hene ne, ɔkɔfa kopia ɛmɔ ti nwiaa ne ɛmɔ nwo nwiaa, na ɔkɔye ɛmɔ kanza koso.

²¹ “Na ɔkɔwa kyɛ, sɔ mmerɛ ne, sona kosie nandwie beleɛ akrɔngrɔma ko ne mmoaen nyɔ,

²² na ɔnate nyɔfonesue pee bɔ okonya ye ne ati, okoli nandwie nyɔfonesue nye loe; ofikyɛ ebiala bɔ ɔkɔha aseɛ ne aso ne, nandwie nyɔfonesue nye loe ne woɛ yeɛ okoli ɔ.

²³ “Sɔ mmerɛ ne, nekaa biala bɔ bobe mmakaa apee ko wɔ, bɔ ye nyɔboɛ te ɛdwetɛ apee ko ne, ɔkɔkakyi agurɛ ne mmowue.

²⁴ Agyaen ne agyaen mmakaa yeɛ mmenia kɔfa kɔwa berɛ ɔ, ofikyɛ aseɛ ne amukoraa kɔkakyi agurɛ ne mmowue.

²⁵ Na pambaa amukoraa bɔ né bɛfa kona bɛyɔ so boo ne, agurɛ ne mmowue nemɔ ati ebiala ngɔhɔ berɛ; na mmom bɛkɔkakyi nekaa bɔ bɛyakyi nandwie ne mmoaen maa bɛkɔ adidie ɔ.”