Yesaya 66 - AHYERƐLƐ KRONGRON

Nnɛfa bosoensolɛ bata Nyameɛ solɛ nwo

¹ AWURADE nwa nyoo: “Nyameɛso te m’ahennie bia, yeɛ aseɛ te me gya ndiasoɛ; nzikyɛ sua koraa yeɛ ɛmɔkosi bɛkɔma me ɔ, nisua yeɛ ngole me nwome ɔ?

² Ɛhemɔ amukoraa mafa me sa yeɛ mayɔ ɔ, yiti ɛhemɔ amukoraa bɛte me deɛ, AWURADE noa dwirɛ ɛne. Nakoso sona bɔ ɔte sɔaa yeɛ mepena ɔ: bɔ ɔbrɛ ye nwo ase ná onya sunzum nu anwobrɛaseɛ ɔ, ɔne bɔ ɔfa anidie ma me dwirɛ ɔ.

³ “Sona bɔ oku nandwie ne, ɔte kyɛ bɔ oku mmenia ɔ ala, bɔ ɔfa boaen bɔ afɔleɛ ne, ɔte kyɛ bɔ obu kyea kɔme anu ɔ, bɔ ɔbɔ aburoo afɔleɛ ne, ɔte kyɛ bɔ ɔfa prako mogya bɔ afɔleɛ ɔ, bɔ ɔyera ɛyɛɛ ne, ɔte kyɛ sona bɔ ɔsɔ amoen ɔ. Bɛ de, bali bɛ bɔbɔ bɛ ti piri, na b’akyiwadeɛ nemɔ yeɛ bɛ kra nye gye ye nwo ɔ.

⁴ Na me koso, ngɔneanea nu ngɔye asohwenɛ ngɔma bɛ, na bɔ besuro ne yeɛ ngɔmaa ɔkɔto bɛ ɔ; ofikyɛ mvrɛle ne, ebiala andɛ me so, ndwudwole ne, bandie, na mmom bɛyɔle bɔ ɔte bɔne wɔ me nye so ɔ, yeɛ bɔ me nye ngye ye nwo ne yeɛ bɛfale ɔ.”

⁵ Ɛ́mɔtie AWURADE noa dwirɛ, ɛmɔ bɔ ɛmɔsuro ye ná ɛmɔdi ye dwirɛ so ɔ: “Ɛmɔ aliɛma mɔ bɔ bɛpɔ ɛmɔ, bɔ ɔnate me dumaa ti bapo ɛmɔ ne, bɛnwa: ‘Yɛsrɛ kyɛ AWURADE ɔla ye animnyam ne ali, maa ɔnate so yɛnwu ɛmɔ anigye ne!’ Nakoso bɛ yeɛ bɛ nyunu kogua aseɛ ɔ.

⁶ “Dede piri bie fi kuro ne anu! Komviɛ bie fi asɔneyɛɛ sua ne anu! AWURADE bɔ otua ye pɔfoɛ mɔ yɔleɛ so kerɛ ne, ye komvi ɔ!

Yerusalem foforɛ ne

⁷ “Ye ko onnya ɔhhale ye ne, né wawo; onnya onnwuni aworɛ yealɛ ne, né wawo baa bienzua.

⁸ Nwa yeɛ wate sɔ dwirɛ ne bie le ɔ? Nwa yeɛ wanwu sɔ nikyee ne bie le ɔ? Aso ebie kɔhora kɔfa ɛlɛho kɔwo aseɛ? Aso ebie kɔhora kɔkyekye maen amono nu berɛ ala? Ofikyɛ Sion fole aworɛ so pɛ yeɛ ɔwole ye mma ɔ.

⁹ Baa ne, aso memaa ɔfa ye ti batɛ, bɔ memma bɛnwo ye ɔ? AWURADE noa dwirɛ ɛne. Me bɔ memaa bɛwo ne, aso ngotua awodeɛ noa ate anaa? Wɔ Nyameɛ noa dwirɛ ɛne.

¹⁰ “Ɛmɔ amukoraa bɔ ɛmɔkuro Yerusalem dwirɛ ɔ, odi kyɛ ɛmɔ ne ye bɛ nye kã, ná ɛmɔ ne ye bedi ahurusi; ɛmɔ amukoraa bɔ ɛmɔdi ye nwo aworabɔlɛ ɔ, ɛmɔ ne ye beli ahurusi;

¹¹ amaa ɔnate so ye aworakyekyerɛ nyɔfonesue ne, ɛmɔano bie bama bɛ ko ayi; amaa ɔnate so ye animnyam mmorosoɛ ne, ɛmɔafa anigye bano maa wate ɛmɔ.”

¹² Ofikyɛ AWURADE nwa nyoo: “Ɛ́mɔtie! Ngɔma asomdwee kɔtengyɛ kɔhɔ ye berɛ kyɛ asue, yeɛ maen maen mɔ b’anwonya kɔtengyɛ kɔhɔ ye berɛ kyɛ asue bɔ wabu wafa so ɔ. Afei ɛmɔkɔno nyɔfonesue ne, ɔkɔfa ɛmɔ kɔbɔ ye mvenu, ná wahã ɛmɔ angorɛ wɔ ye gya so.

¹³ Na kyɛbɔ baa oni si kyekye ye wora ne, sɔ ala yeɛ me koso ngɔkyekye ɛmɔ wora ɔ; ɛmɔ wora kɔkyekye wɔ Yerusalem.

¹⁴ Ɛmɔnwu ye sɔ a, ɛmɔ nye kɔgye“‘, ɛmɔ bowue nu komia kyɛ ndire frɔmfrɔm, mmenia konwu kyɛ AWURADE tumi gyi ye somvoɛ mɔ si, na ye ahone hu ye pɔfoɛ mɔ so.

¹⁵ “Ɛ́mɔtie, AWURADE kɔfa see ne ye teaseɛnam mɔ bɔ bɛte kyɛ mvrama piri yeɛ ɔkɔwa ɔ,, kyɛ ɔbaafa ye ahonehulɛ ne otua so kerɛ ɛyaafɛlɛ so, ná ɔfa see wuronyiwuronyi ɔtea bɛ.

¹⁶ Ofikyɛ AWURADE kɔfa see ne ye ngrandɛ yeɛ okobua anwoɔnaen mukoraa ndɛen ɔ, na bɛ bɔ AWURADE kohũ bɛ ne, bɛkɔsone pee.

¹⁷ “Bɛ bɔ bɛpete bɛ nwo bɛte bɛ nwo wɔ turo nemɔ anu, wɔ sona ko bɔ ogyi afia berɛ ne asi, bɔ bedi prako naen, akyiwadeɛ ne mmurokuruwa ne, b’ayieleɛ koyie bɛ kɔbɔ nu, AWURADE noa dwirɛ ɛne.

¹⁸ “Ofikyɛ mese bɛ yɔleɛ ne b’adwene: meba mebaboaboa maen mukoraa ne edwudwolɛ amukoraa noa, na bɛkɔwa bekoonwu m’animnyam ne.

¹⁹ Ngɔyɔ nzɛngyerɛnneɛ wɔ bɛ nu, na bɛ bɔ bekonya bɛ ti bekodidi nu ne, ngɔsoma bɛ maa bɛkɔhɔ maen maen mɔ berɛ: wɔ Tasise, Pule ne Lude bɔ bɛte agyaentolɛfoɛ ne, Tubal ne Yawan, dedeede supɔ mɔ bɔ bennya bɛttele me nga, bɔ bennya bennwuni m’animnyam ne; na bɛkɔɔbɔ m’animnyam nwo dawure wɔ maen maen mɔ so.

²⁰ Bɛkɔfa ɛmɔ aliɛma mɔ amukoraa bekofi maen maen amukoraa so bɛkɔwa, maa ɔkɔyɛ afɔleɛ kɔma AWURADE. Mbɔngɔ so, teaseɛnam mɔ nu, seko nu, afunum mɔ so ne afupɔngɔ mɔ so yeɛ bɛkɔfa bɛ bɛkɔtenatena bɛkɔwa me bokaa krongron Yerusalem so ɔ, AWURADE noa dwirɛ ɛne, kyɛbɔ Yisraelfoɛ bɛfa b’aburoo afɔleɛ begua nzim bɔ ye nwo te ɔ nu bɛba AWURADE awuro nen.

²¹ Na ngɔye bɛ nu biemɔ maa bɛkɔyɛ asɔfo ne Lewifoɛ, AWURADE noa dwirɛ ɛne.

²² “AWURADE nwa nyoo: Kyɛbɔ anwuro foforɛ ne aseɛ foforɛ bɔ mebaayɔ ne kɔtena berɛ wɔ me nyunu ne, sɔ ala yeɛ ɛmɔ bosofoɛ ne ɛmɔ dumaa kɔtena berɛ ɔ.

²³ Na ɔkɔwa kyɛ, ɛsraen foforɛ biala ne afofikyẽa biala, anwoɔnaen amukoraa kɔwa bɛkɔɔsɔne wɔ me nyunu, AWURADE noa dwirɛ ɛne.

²⁴ “Na bekofite bɛkɔɔnea mmenia bɔ bayɛ me nwo lɔen nemɔ bɛ fuin, ofikyɛ bɛ nnɔboakoma nemɔ ngowu, bɛ see ne ngonua, na bɛkɔyɛ akyiwadeɛ bɛkɔma anwoɔnaen amukoraa.”