Yesaya 65 - AHYERƐLƐ KRONGRON

Ndɛenbualɛ ne ngoalelɛ

¹ “Nyɛle kyɛ ngotie bɛ bɔ bɛmbena me boso ne, nyɛle kyɛ ngɔma bɛ bɔ bɛmbena me si atee ne bekonwu me. Na ngane kyɛ, ‘Me ɛhe, me ɛhe!’ ngyirele maen bɔ wanye me dumaa ayɛ ne.

² Ndrɛtrɛle me sa nu daa mukoraa mane maen bɔ wayɛ lɔen ne, bɔ bɛnate atee bɔ ɔtte mayee so, bɔ bedi bɛ bɔbɔ bɛ ti piri ne;

³ maen bɔ ye nye la ye nwo ɔkã me anyinga daa, bɔ bɛbobɔ afɔleɛ wɔ turo mɔ nu, bɛyera ɛyɛɛ wɔ mmerekese afɔleɛ mmokyea so;

⁴ bɔ bɛtenatena asieleɛ mɔ nu, bɛtenatena mvealeɛ nu nekaa bie kɔngɔen, bɔ bedi prako naen, bɔ akyiwadeɛ turoo wɔ bɛ turonzemaa nu;

⁵ mmenia bɔ bɛnwa: ‘Pingye dɔ, nnɛfa wɔ nwo kã me, ofikyɛ me de, me nwo te tra wɔ!’ Sɔ mmenia nemɔ bɛte kyɛ nwosina bɔ ɔkɔ me ti anu ɔ, bɛma m’ahone hu kyɛ see bɔ ogye daa biala ɔ.

⁶ Ɛ́mɔtie, bahyerɛ yeɛ ɔla me nyunu ɔ: Mengɔyɛ konn, na mmom ngotua so kerɛ, yoo, ngotua so kerɛ maa ɔkɔbɔ bɛ ti so.

⁷ Ngɔhã ɛmɔ amumuyɛɛ ne ɛmɔ nana mɔ amumuyɛɛ ngɔbɔ nu ngotua so kerɛ, AWURADE noa dwirɛ ɛne. Na ɔnate kyɛ bɛyerale ɛyɛɛ wɔ mmokaa so, bɛgorole me nwo wɔ pambaa nemɔ aso ti, ngosusu bɛ yɔleɛ bɔ bayɔ ne, na ngotua so kerɛ.”

⁸ AWURADE nwa nyoo: “Kyɛbɔ nzaa wɔ bobe betire biribiraa nu, maa mmenia bɛkã kyɛ, ‘Nnɛsɛkye ye, ofikyɛ saleɛ wɔ nu’ ne, sɔ ala yeɛ me somvoɛ mɔ ti ngɔyɔ ɔ, na mengohũhũ bɛ mukoraa.

⁹ Ngɔye bosofoɛ mɔ ngofi Yakob nu, yeɛ ngɔye bɛ bɔ me mmokaa nemɔ kɔɔyɛ bɛ deɛ ɔ ngofi Yuda; bɛ bɔ maneanea nu maye bɛ ne yeɛ ɔkɔyɛ bɛ deɛ ɔ, na berɛ yeɛ me somvoɛ mɔ bɛkɔtena ɔ.

¹⁰ Saron kɔyɛ mmoaen kure mɔ bɛ nekaa bɔ bedidi ɔ, yeɛ Akɔre bɔnza kɔyɛ nekaa bɔ nandwie mɔ bɛkɔla bekole bɛ nwome ɔ, na sɔ nekaa nemɔ, bɛkɔyɛ me maen bɔ bapena me si atee ne bɛ deɛ.

¹¹ Nakoso ɛmɔ bɔ ɛmɔpo AWURADE, bɔ ɛmɔ wora fi me bokaa krongron ne, bɔ ɛmɔto poen bɛma bosoen bɔ ɛmɔfrɛ ye Saleɛ, bɔ ɛmɔfa nzaa mvrafra begua kwangoa nu tɛkyɛɛ bɛma bosoen bɔ ɛmɔfrɛ ye Ngrabea ɔ;

¹² na me koso ngɔma ɛmɔ kɔtotɔ ngrandɛ noa, na ɛmɔ amukoraa bekobu ndwerɛ maa bekohu ɛmɔ; ofikyɛ mvrɛle ɛmɔ ne, ɛmɔandɛ me so, ndwudwole ne, ɛmɔandie, na mmom ɛmɔyɔle bɔ ɔte bɔne wɔ me nye so ɔ, na bɔ menguro yeɛ ɛmɔyɔle ɔ.”

¹³ Yiti AWURADE nwa nyoo: “Ɛ́mɔtie, me somvoɛ mɔ bekodidi, nakoso ɛmɔ de, ɛhɔen kohũ ɛmɔ; ɛ́mɔtie, me somvoɛ mɔ bɛkɔno, nakoso ɛmɔ de, nzuhɔen kohũ ɛmɔ; ɛ́mɔtie, me somvoɛ mɔ bekoli ahurusi, nakoso ɛmɔ de, ɛmɔ nyunu kogua ase.

¹⁴ Ɛ́mɔtie, me somvoɛ mɔ bɛkɔto anigye dwein wɔ b’ahone nu, nakoso ɛmɔ de, ɛmɔkosu bekoli yealɛ wɔ ɛmɔ ahone nu, na ɛmɔkɔbɔ awuye bekoli aworabɔlɛ.

¹⁵ Na me mmenia bɔ mapa nu maye bɛ ne, ɛmɔ dumaa bɔ ɛmɔkɔyakyi ye berɛ ne, ɔkɔyɛ b’amonwaa dwirɛ, na AWURADE Nyameɛ kohũhũ ɛmɔ; nakoso ye somvoɛ mɔ de, ɔkɔto bɛ dumaa foforɛ;

¹⁶ amaa ɔnate so ebiala bɔ ɔkɔhã saleɛ dwirɛ kɔma ye nwo wɔ aseɛ ne aso ne, ɔkɔfa nahorɛlilɛ Nyameɛ ne yeɛ okoyira ye nwo ɔ; yeɛ ebiala bɔ ɔkɔta ndaen wɔ aseɛ ne aso ne, ɔkɔfa nahorɛlilɛ Nyameɛ ne yeɛ ɔkɔta ndaen ɔ; ofikyɛ bɛ wora kofi amaneɛ bɔ ɔtole bɛ daa ne, na mabu me nye magua so.

Nyameɛso foforɛ ne aseɛ foforɛ

¹⁷ “Ofikyɛ, tie, mebaabɔ nyameɛso foforɛ ne aseɛ foforɛ; na ɛmɔngɔkaye nningyein bɔ wapɛ nu wahɔ ne, yeɛ ɔngɔpe ɛmɔ ti anu ko.

¹⁸ Na mmom, odi kyɛ ɛmɔma ɛmɔ nye gye, ná ɛmɔdi ahurusi daa wɔ nikyee bɔ mebaabɔ ne anwo ti; ofikyɛ, tie, mebaabɔ Yerusalem maa ɔyɛ ahurusililɛ kuro, bɔ nu mmenia koso bɛkɔyɛ ahurusililɛ mmenia ɔ.

¹⁹ Ngoli Yerusalem nwo ahurusi, na me nye kɔhã me maen nwo; bɛngɔte esuɛ wɔ nu ko, ɔne awuyebɔlɛ wɔ nu ko.

²⁰ Adɔma bɔ bɛwo ye a ɔngyɛ né wawu ne, ebie ngosi ko wɔ kuro ne anu, yeɛ aworowaa bɔ wanyie ye afoɛ mukoraa di ne koso, sɔ ala; ofikyɛ bɔ okoli afoɛ ɛyaa koraka né wawu ne, bekobu ye akwadaa, yeɛ bɔnefoɛ bɔ okoli afoɛ ɛyaa koraka né wawu ne, bekobu ye kyɛ banoma ye.

²¹ Bekosisi sua bɛkɔtena nu, yeɛ bɛkɔyɛ bobe boo mɔ bekoli nu aleɛ.

²² Bengosi sua ngɔma sona foforɛ ngɔtena nu ko, yeɛ bengolua ngɔma sona foforɛ ngoli nu aleɛ. Na kyɛbɔ bakaa si nyi kyɛ ne, sɔ ala yeɛ me maen kɔyɛ ɔ, na me mmenia bɔ mapa nu maye bɛ ne, bekodidi bɛ sa noa adwuma nwo bɛkɔhyɛ.

²³ Bɛngɔyɔ adwuma ngɔfɛ mbaen, yeɛ bɛngɔwo mmaa bɔ bɛkɔpe bekowu ɔ; ofikyɛ bɛkɔyɛ bɛ bɔ AWURADE ayira bɛ ɔ bɛ bosofoɛ, bɛ ne bɛ mma mɔ.

²⁴ Anzana bɛbaasu bɛfrɛ ne po, né mama mmuayɛɛ, na begu so bedwudwo ne po, né matie.

²⁵ Pataku ne boaen ba bekodidi neka horɛ, gyata koli ndire kyɛ nandwie ala, na nnɛterɛ yeɛ ɔkɔyɛ ewoo aleɛ ɔ. Ebiala ngohũ anaa ongopura ebiala wɔ me bokaa krongron ne amukoraa so, AWURADE noa dwirɛ ɛne.”