Yesaya 64 - AHYERƐLƐ KRONGRON

¹ O, sɛ ahaa ekosunzua ewienu nu ná ekodwu ase maa mmokaa kopusu wɔ wɔ nyunu a!

² Kyɛbɔ see sɔ ndire worowaa nu, ɔne kyɛbɔ see ma nzue hu ne, ma wɔ pɔfoɛ mɔ benwu wɔ dumaa, ná maen maen mɔ bɛ nwo ɔwosowoso bɛ wɔ wɔ nyunu!

³ Mmerɛ bɔ ɛyɔle nningyein suronyisuronyi maa ofuni yɛ nu ne, edwuli ase, na mmokaa wosole wɔ wɔ nyunu.

⁴ Ofi tetetete yeɛ mmenia bennya bɛttele, anaa ɔppɛle bɛ so anu ɔ, yeɛ anyeɛ biala koso onnwuni Nyameɛ bɔ ɔte kyɛ wɔ bɔ ɔko ma bɛ bɔ bɛ wora wura ye nu kyɛ wɔ ɔ.

⁵ Sona bɔ ɔbɔ tenenee bra wɔ anigye so ne, bɔ ɔkaye wɔ ɔfa w’atee so ne, ɛyɛ ye awaawaatuu. Tie, yɛ bɔne maa ɛfɛle yaa, yɛ bɔne nu yeɛ yɛtɛte ye dadadada ɔ, aso ekole yɛ ngoa anaa?

⁶ Yɛ mukoraa yayɛ kyɛ nikyee bɔ ye nwo nde ɔ, na yɛ tenenee amukoraa ɔte kyɛ ndangurɛ fiɛ; yɛ mukoraa yɛkese kyɛ nyaa, na yɛ amumuyɛɛ pia yɛ kɔ kyɛ mvrama.

⁷ Ebiala nne berɛ bɔ ɔbɔ wɔ dumaa sɔne wɔ ɔ bɔ waye ye kunu wafa ye nwo wabɔ wɔ ɔ; ofikyɛ aye wɔ nye ato buro afea yɛ, na yɛ amumuyɛɛ ti ahũhũ yɛ.

⁸ Nakoso, O AWURADE, wɔ yeɛ ɛte yɛ Baba ɔ, yɛ de, yɛte ɛfaa, na wɔ yeɛ ɛnwo yɛ ɔ; na yɛ mukoraa yɛte wɔ sa noa adwuma.

⁹ O AWURADE, nnɛfɛ yaa piri, yeɛ nnɛkaye amumuyɛɛ afebɔɔ. Yɛsrɛ wɔ ala, kaye, yɛ mukoraa yɛte wɔ maen.

¹⁰ Wɔ nguro krongron nemɔ, bakakyi ɛserɛ, Sion akakyi ɛserɛ, yeɛ Yerusalem akakyi kurofoen.

¹¹ Yɛ awuro krongron nyemenenyemene bɔ yɛ nana mɔ bɛyele wɔ ayɛ wɔ nu ne, bafa see bayera ye, yeɛ nningyein bɔ bɛla yɛ ahone nwo ne amukoraa, bayɛ basaa.

¹² O AWURADE, aso ɛngɔfɛ yaa wɔ sɔ nningyein ne amukoraa nwo anaa? Aso ɛkɔyɛ konn ɛkɔprapra amaneɛ kogua yɛ so anaa?