Yesaya 63 - AHYERƐLƐ KRONGRON

AWURADE tɔ ye pɔfoɛ mɔ so wereɛ

¹ Nwa yeɛ ofi Edom ɔ́ba e, bɔ ye ndaadeɛ nye gonn bɔ ofi Bosra ɔ́ba e? Ye bɔ ɔhera ɛtena nyemenenyemene ɔ, bɔ ole tumi pirikua otiatia ba e? “Me ɔ. Me bɔ mebɔ tenenee nwo dawure ne ɔ, Tuminiɛ bɔ mede ngoa ne ɔ.”

² Nzu ati yeɛ wɔ tena ne te gonn ye, bɔ wɔ ndaadeɛ te kyɛ sona bɔ otiatia bobe mmaa so otwi nu yɛ nzaa ɔ ye deɛ ɔ?

³ “Me ngome yeɛ matiatia bobe mmaa ne aso wɔ kumaa ne anu ɔ, na me maen ne anu ama ne, nu ko po wammoka me so. Me yaafɛlɛ nu yeɛ ndiatiale bɛ so ɔ, m’ahonehulɛ nu yeɛ ndwi mvale bɛ so ɔ, na bɛ mogya yeɛ wabɔ wapete m’ataadeɛ nu ye, bɔ wasɛkye me tena mukoraa nu ye.

⁴ Ofikyɛ né madwene wereɛtɔlɛ kyẽa bie anwo, na m’afoɛ bɔ mefa mepepɛ mede me maen ne waso.

⁵ Ndole me nye neane, nakoso né bokafoɛ biala nne berɛ; me nwo dwirili me kyɛ ebiala nne berɛ bɔ okogyina me si ɔ; yiti me bɔbɔ me tumi yeɛ olili ngonim mane me ɔ, na m’ahonehulɛ koso gyinane me si.

⁶ Me yaafɛlɛ nu yeɛ ndiatiale maen maen mɔ so ɔ, m’ahonehulɛ nu yeɛ mmaa bɛbole nzaa ɔ, na nhwiele bɛ mogya nguale aseɛ so.”

⁷ Ngɔhã AWURADE ye dɔ pindinn ne, ɔne AWURADE ayɛyelɛ ne nwo dwirɛ, bɔ ɔfa bɔ AWURADE ayɔ ama yɛ amukoraa nwo, ɔne paa kandinga bɔ wafa wayɛ Yisrael awuro ama ɔ, kyɛbɔ ɔnate ye anwumvoinnwunɛ so, ɔne kyɛbɔ ye dɔ pindinn ne piri ɔte ɔ.

⁸ Ofikyɛ ɔnwa: ‘Nahorɛ nu, bɛte me maen, mmaa bɔ bɛngɔpɛ ngondombo ɔ,’ na ɔyɛle bɛ Ngoadefoɛ.

⁹ Bɛ yealɛlilɛ amukoraa nu ne, ɔyɛle ye yea, na ye nyunu abɔfo ne, ɔpepɛ lele bɛ; ɔnate ye dɔ ne ye anwumvoinnwunɛ ne aso ɔpepɛ lele bɛ, ɔpagyale bɛ, na ododole bɛ wɔ daa tete mmerɛ ne amukoraa.

¹⁰ Nakoso bɛ de, bɛyɛle lɔen bɛmane ye Sunzum krongron ne wora bɔle; yiti ɔpɛle ye nwo yɛle bɛ pɔfoɛ, na ye bɔbɔ ɔho tiale bɛ.

¹¹ Na afei ɔkayele daa tete mmerɛ ne, Mose ne ye maen, na obisale kyɛ, Ye bɔ ɔyele bɛ fili ɛpo nu, bɔ ɔte ye mmoaen so neafoɛ ne, ɔwɔ nisua? Ye bɔ ɔfale ye Sunzum krongron ne ɔɔtenane bɛ nu ne, ɔwɔ nisua?

¹² Ye bɔ ɔmane ye animnyam asaa ne oolili Mose famaa so, ná ɔne ye bɛnatele ne, ye bɔ ɔpakyele nzue ne anu wɔ bɛ nyunu ɔfa nyane dumaa afebɔɔ mane ye nwo ne;

¹³ ye bɔ ɔfale bɛ fale buma ne anu kyɛbɔ pɔngɔ fa ɛserɛ so ne, na banzoti.

¹⁴ Na AWURADE Sunzum ne maa belele bɛ nwome kyɛ nandwie mɔ bɔ bɛtorotoro bɛkɔ bɔnza nu ɔ. Sɔ yeɛ ehyirele wɔ maen atee ɛfa nyane animnyam dumaa mane wɔ nwo ɔ.

¹⁵ To wɔ nye fi nyameɛso nea, to wɔ nye fi wɔ krongron ne w’animnyam atenaleɛ berɛ nea. Wɔ nungunɛ ne w’anwoserɛ ne, ɔwɔ nisua? Wɔ kunu tetelɛ ne w’anwumvoinnwunɛ ne, aye afi me nwo anaa?

¹⁶ Ofikyɛ wɔ yeɛ ɛte yɛ Baba ɔ, ɔwɔ nu kyɛ Abraham nze yɛ, yeɛ Yisrael koso onne yɛ ndo nu; O AWURADE, wɔ yeɛ ɛte yɛ Baba ɔ, yɛ Defoɛ, wɔ dumaa ne ɔwɔ berɛ fi tetetete.

¹⁷ O AWURADE, nzu ati yeɛ amaa yali w’atee nwo makyebu, bɔ yayɛ asoserɛ maa yiti yɛnzuro wɔ e? Sa bra, ɔnate wɔ ngoaa ti, w’agyapadeɛ mmusua kure nemɔ ati.

¹⁸ Wɔ maen krongron ne, onyane w’agyapadeɛ ne mmerɛ kãa bie, nakoso yɛ pɔfoɛ mɔ bahwi bafa wɔ nekaa krongron ne aso.

¹⁹ Yayɛ kyɛ mmenia bɔ ellili bɛ so hene le ɔ, yayɛ kyɛ mmenia bɔ bɛmva wɔ dumaa bɛmvrɛ bɛ ɔ.