Yesaya 61 - AHYERƐLƐ KRONGRON

Bɔ AWURADE apopa ye ngoo ne

¹ AWURADE Nyameɛ Sunzum wɔ me so, ɔnate kyɛ AWURADE apopa me ngoo kyɛ nga nzɛmba ngyire bɛ bɔ bɛyɛ anwumvo ɔ; wasoma me kyɛ mmangyekye bɛ bɔ bɛ wora abɔ ɔ bɛ wora, kyɛ nga ngyire bɛ bɔ bahye bɛ nnure ɔ kyɛ banya fawɔnwodi, ɔne bɛ bɔ babɔ bɛ panwu ɔ kyɛ bayakyi bɛ;

² kyɛ mmɔ AWURADE anwumvoinnwunɛ afoɛ ne nwo dawure, ɔne yɛ Nyameɛ wereɛtɔlɛ kyẽa ne nwo dawure, kyɛ ngyekye ebiala bɔ ye wora abɔ ɔ wora;

³ kyɛ bɛ bɔ bedi aworabɔlɛ wɔ Sion ne, mva nyerɛen akomuade nzi nzoen gya nu mma bɛ, kyɛ mva anigye ngoo nzi aworabɔlɛ gya nu mma bɛ, kyɛ mva ayɛyelɛ tena nzi aworabɔlɛ gya nu, amaa ɔnate so bafrɛ bɛ tenenee mmakaa, bɔ AWURADE alua bɔ ɔhyɛ ye animnyam ɔ.

⁴ Bɛkɔkyekye tete kurofoen nemɔ, bekosisi sua mɔ bɔ badwiri bɛ bagua dada ne, nguro mɔ bɔ babɔ bɛ ne, bekosa bɛkɔkyekye, bɔ bakakyi kurofoen wɔ aworɛ ndoatoasoɛ pee nu ne.

⁵ Ɛwɔfoɛ mɔ kogyina kɔnea ɛmɔ mmoaen so, amanvrafoɛ kɔyɛ ɛmɔ apaafoɛ ne bobe boo so neafoɛ,

⁶ nakoso ɛmɔ de, bɛkɔfrɛ ɛmɔ AWURADE asɔfo, mmenia kɔhã kyɛ ɛmɔte yɛ Nyameɛ somvoɛ mɔ; ɛmɔkoli maen maen mɔ b’anwonya, na ɛmɔkɔfa b’anwonya nningyein ne bɛkɔhoahoa ɛmɔ nwo.

⁷ Bɔ ɛmɔkonya ye bekosi ɛmɔ animguaseɛ ne gya nu ne, ɔkɔyɛ mmɔhoɛ nyɔ, ɛmɔ nyanzoen ne, ɛmɔkoli ahurusi bekosi ye gya nu, yiti ɛmɔkonya ye mmɔhoɛ mmɔhoɛ wɔ ɛmɔ aseɛ ne aso, na ɛmɔkonya anika bɔ olle ayieleɛ ɔ.

⁸ Ofikyɛ me, AWURADE, mekuro pɛpɛɛpɛyɛlɛ, mekyi naen yeralɛ afɔleɛ bɔ ɔte awue nikye ɔ, ngogyina pɛpɛɛpɛyɛlɛ so ngɔma bɛ akatuaa, na me ne bɛ yɛkɔyɛ apam afebɔɔ.

⁹ Bɛ boso ama konya dumaa piri wɔ maen maen mɔ nu, yeɛ bɛ mma koso bekonya dumaa piri wɔ maen maen mɔ nu; na ebiala bɔ okonwu bɛ ne, okole kɔto nu kyɛ bɛte maen bɔ AWURADE ayira ye ɔ.

¹⁰ Ngoli ahurusi piri paa wɔ AWURADE nu, me Nyameɛ nu yeɛ me kra di ahurusi ɔ; ofikyɛ wafa ngoalelɛ ataadeɛ wawura me, wafa tenenee tena wahera me, kyɛbɔ atɔmvorɛ biaa fa abotire siesie ye nwo ɔ, kyɛbɔ atɔmvorɛ braa fa ye mbembenanneɛ siesie ye nwo ɔ.

¹¹ Na kyɛbɔ aseɛ ma ndire fifi wɔ so, ná turo koso ma bɔ balua ye wɔ nu fifi ne, sɔ ala yeɛ AWURADE Nyameɛ kɔma tenenee ne ayɛyelɛ kofifi wɔ maen maen amukoraa nyunu ɔ.