Yesaya 60 - AHYERƐLƐ KRONGRON

Kyẽa bie Yerusalem animnyam

¹ Dwɔso, ta hyireinn, ofikyɛ wɔ kanea ne wawa, yeɛ AWURADE animnyam ne apukye wɔ so.

² Tie, ɔwɔ nu kyɛ awosii kɔkata aseɛ so, ná awosii kabii amundu so ama so de, nakoso wɔ de, AWURADE kopukye wɔ so, na ye animnyam ne kɔla ye nwo ali wɔ wɔ so.

³ Maen maen mɔ bɛkɔwa wɔ kanea ne anu, yeɛ ahemvo mɔ koso bɛkɔwa kanea hyireinn bɔ wapukye wɔ so ne anu.

⁴ To wɔ nye anwuro nea bra yia, bɛ mukoraa baboa bɛ noa, bɛ́ba wɔ berɛ; wɔ mma mmienzua befi dedeede yeɛ bɛ́ba ɔ, na wɔ mma mmrasua koso, badodo bɛ yeɛ bɛ́ba ɔ.

⁵ Afei ekonwu ye, na ɔkɔyɛ wɔ anika, wɔ nye kɔgye maa ekoli ahurusi, ofikyɛ ɛpo so anwonyadeɛ pee kobri kɔwa wɔ berɛ, na maen maen mɔ b’anwonya kɔwa wɔ berɛ.

⁶ Wɔ maen ne anu afupɔngɔ kɔyɛ pee, bɛte afupɔngɔ akrɔngrɔma bɔ befi Midian ne Efa; bɛ bɔ befi Hyeba ne amukoraa, bɛ́ba. Bɛsoso sikaa kɔkorɛ ne ɛyɛɛ bɛ́ba, bɔ bɛ́bɔ AWURADE ayɛyelɛ nwo dawure ɔ.

⁷ Bɛkɔboaboa Kedare nyɛmmoa amukoraa noa bɛkɔbrɛ wɔ, Nebayote mmoaen nyii kɔyɛ wɔ deɛ, bɛkɔyɛ anyesɔ afɔleɛ wɔ m’afɔleɛ bokyea so, na ngɔhyɛ m’animnyam awuro ne animnyam.

⁸ Nwa mɔ ole ɛhemɔ bɔ betu kyɛ munungum e, bɔ betu kyɛ mmubure bɔ bɛkwaawura bɛ saen nu e?

⁹ Amba, supɔ mɔ kɔnwondɛ me, Tasise ɛlɛen mɔ yeɛ bekoli moa ɔ, bɛkɔfa wɔ mma mɔ bekofi dedeede bɛkɔwa bɔ b’ɛdwetɛ ne bɛ sikaa kɔkorɛ boka so, bɔ bɛbaafa bɛhyɛ AWURADE wɔ Nyameɛ dumaa animnyam, ɔne Yisrael Krongronniɛ ne animnyam ɔ, ofikyɛ wahyɛ wɔ animnyam.

¹⁰ Amanvorafoɛ kɔto wɔ fasue nemɔ, yeɛ b’ahemvo mɔ koso bɛkɔso wɔ, ofikyɛ m’ahonehulɛ ne anu, ndeane wɔ, nakoso me paayɛlɛ ne anu, manwu wɔ anwumvoin.

¹¹ Wɔ pambim nemɔ bɛkɔlela berɛ too daa biala, eyia ne kɔngɔen bɛngɔtoto nu, amaa ɔnate so mmenia afa maen maen mɔ b’anwonya babrɛ wɔ bɔ b’ahemvo mɔ beli bɛ nyunu ɔ.

¹² Ofikyɛ maen anaa ahennie bɔ ɔngɔso wɔ ne, okogu; na bɛkɔbɔ sɔ maen nemɔ bɔkɔɔ.

¹³ “Lebanon animnyam kɔwa wɔ berɛ, bɔ ɔte ye ɛframmire, pataboɛ ne ammire ne, bɔ ɛkɔfa kosiesie me nekaa krongron ne ɔ, na ngɔhyɛ nekaa bɔ me gya tia ne animnyam.

¹⁴ Na bɛ bɔ bɛhyɛle wɔ so ne, bɛ boso ama kɔwa bɛkɔɔkoto wɔ; yeɛ ebiala bɔ obuli wɔ animtia ne, okoobu ndwerɛ wɔ wɔ gya bo; bɛkɔfrɛ wɔ AWURADE Kuro, Yisrael Krongronniɛ ne, ye Sion.

¹⁵ “Ɔwɔ nu kyɛ bapo wɔ, yeɛ bɛpɔ wɔ, bɔ sona biala ɔmma mbɛ nu wɔ wɔ nu ɔ, nakoso ngɔmaa ekonya animnyam afebɔɔ, bɔ ɔte aworɛ ndoatoasoɛ amukoraa b’anigye nikye ɔ.

¹⁶ Ɛkɔno maen maen mɔ bɛ nyɔfonesue, yeɛ ekoli ahemvo mɔ b’anwonya, na ekonwu ye kyɛ me, AWURADE, me ole wɔ Ngoadefoɛ ne wɔ Defoɛ, Yakob ye Tuminiɛ ne.

¹⁷ “Ngɔfa sikaa kɔkorɛ mmom ngoosi kɔɔbere gya nu, ngɔfa ɛdwetɛ mmom ngoosi buralɛ gya nu, ná kɔɔbere mmom waasi bakaa gya nu, ná buralɛ mmom waasi nyɔboɛ gya nu. Ngɔma asomdwee kɔyɛ wɔ so panyi kɔnea wɔ so, ná mama tenenee ayɛ wɔ mene.

¹⁸ Bɛngɔte basabasayɔlɛ nga ko wɔ w’aseɛ so, bɛngɔte nzɛmmɔne anaa nningyein sɛkyelɛ nga wɔ w’aseɛ ne aso kodwu ɛwɛen so; ɛkɔfrɛ wɔ fasue mɔ: Ngoalelɛ, ɔne wɔ kuro pambim mɔ: Ayɛyelɛ.

¹⁹ “Nna eyia yeɛ ɔkɔyɛ wɔ kanea alehyeleɛ ɔ ko, yeɛ nna ɛsraen yeɛ ɔkɔta hyireinn kɔma wɔ alesaleɛ nu ɔ, na mmom AWURADE yeɛ ɔkɔyɛ wɔ kanea afebɔɔ ɔ, na wɔ Nyameɛ kɔyɛ w’animnyam.

²⁰ Wɔ yia ngɔtɔ ko, yeɛ wɔ ɛsraen koso ngowu, ofikyɛ AWURADE yeɛ ɔkɔyɛ wɔ kanea afebɔɔ ɔ, na w’aworabɔlɛ ngyẽa ne, ye bo kɔpɛ.

²¹ Wɔ mmenia ne amukoraa bɛkɔyɛ teneneefoɛ, bɛkɔfa aseɛ ne bɛkɔyɛ bɛ deɛ afebɔɔ, bɛte bakaa bɔ malua bɔ wafefɛ ɔ, me sa noa adwuma bɔ ɔhyɛ me animnyam ɔ.

²² Wɔ nu kaaba ne po, ɔkɔkakyi abusua, yeɛ bɔ ɔte kãa paa ne, ɔkɔkakyi anwoserɛ maen. Me, AWURADE, sɔ mmerɛ ne dwu a, ngɔmaa ɔkɔyɛ berɛ ndɛndɛ.