Yesaya 6 - AHYERƐLƐ KRONGRON

Nyameɛ ye ye nwo ali kyire Yesaya

¹ Afoɛ bɔ Nana Yusia wuli ne anu, nwuni AWURADE kyɛ ɔte ahennie bia bɔ so ma paa ɔ so. Né ye ataadeɛ ne noa wayi asɔneyɛɛ sua ne anu tɛkyɛ.

² Né Serafim mɔ bɛwɔ ye ti so anwuro. Bɛ nu biala le ndaa nzia: bɛ nu biala fa nyɔ kata ye nyunu, ɔfa nyɔ kata ye gya nwo, yeɛ ɔfa nyɔ tu.

³ Na ebiala tea nu se obiɛngo kyɛ, “Krongron, krongron, Asafo AWURADE te krongron; ye animnyam ayi aseɛ so amukoraa tɛkyɛ.”

⁴ Bɛ komvi bɔ bɛfa bɛteane nu ne, ɔmane anoa nemɔ bɛ nyinasoɛ ne wosole, na nwosina yili sua ne anu tɛkyɛ.

⁵ Na ngane kyɛ, “Edwirɛ ato me oo! Mawu oo! Ofikyɛ nde sona bɔ me noa kekã amumuyɛɛ dwirɛ, yeɛ nde maen bɔ nu ama kekã amumuyɛɛ dwirɛ ɔ nu; ɔnate kyɛ me nye anwu Ɛhene ne, bɔ ye ole Asafo AWURADE!”

⁶ Yeɛ Serafim nemɔ anu ko tu wale me nwo berɛ. Né otira see bɔ ogye bɔ wafa akapɛ waye wafi afɔleɛ bokyea ne aso ɔ.

⁷ Ɔfa hane me noa, na osele kyɛ, “Tie, sɔ nikyee ye ahã wɔ noa; baye w’amumuyɛɛ ne bafi wɔ so, na bate wɔ nwo bafi wɔ bɔne nwo.”

⁸ Na ndele AWURADE komvi kyɛ obisa kyɛ, “Nwa yeɛ nzoma yeɛ ɔ, nwa yeɛ ɔkɔhɔ kɔma yɛ ɔ?” Na nzele kyɛ, “Me ɛhe, soma me.”

⁹ Na osele kyɛ, “Kɔ, kɔhã kyire maen he kyɛ, “ ‘Etielɛ de ɛmɔtie, nakoso ɛmɔnde ye bo; ɛnealɛ de ɛmɔnea, nakoso ɛmɔnnwu ye.’

¹⁰ Ma maen he b’adwene ɔla, ma bɛ so anu yɛ se, ná ma bɛ nye si; wamma ye sɔ a, bɛkɔfa bɛ nye bekonwu nikye, bɛkɔfa bɛ so bɛkɔte dwirɛ, bɛkɔfa b’adwene bɛkɔte dwirɛ bo, ná basakyera maa masa bɛ anwonyerɛ.”

¹¹ Yeɛ mmisale kyɛ, “O AWURADE, ɛhe kɔhɔ so alaa maa okoodwu kyinzu?” Na obuale kyɛ, “Kɔpem kyɛ nguro kɔkakyi kurofoen bɔ sona nne so ɔ, ɔne kyɛ awuro mɔ kɔkakyi dandue bɔ sona nne nu ɔ, ɔne kyɛ aseɛ ne kɔsɛkye bɔkɔɔ kɔla berɛ mbaen ɔ,

¹² kɔpem kyɛ AWURADE kɔpɛ mmenia ne asue kɔhɔ dedeede maa kurofoen nemɔ kɔyɛ pee wɔ aseɛ ne aso ɔ.

¹³ Na sɛ ɔka buru nu ngyɛmuɛ ko wɔ nu po a, bekosa bekowuwu, kyɛ esaa anaa eluii bɔ babu ye bato, bɔ ye dosii tɛ gyi berɛ ɔ.” Bɛ bosofoɛ krongron ne ole dosii ne.