Yesaya 58 - AHYERƐLƐ KRONGRON

Ɛhɔenhyelɛ bɔ ɔsɔ Nyameɛ nye ɔ

¹ “Tea nu serɛserɛ, nnɛkã wɔ komvi ase, ma wɔ komvi so kyɛ totorobɛndo, kã me maen ye mmeraatolɛ kyire ye, ɔne Yakob bosofoɛ bɛ bɔne kyire bɛ.

² Hmmm, bɛpena me si atee daa biala, bekuro kyɛ benwu m’atee mɔ, kyɛ gyamea bɛte maen bie bɔ bɛyɔ bɔ ɔtengyɛ ɔ, bɔ bambo bɛ Nyameɛ ahyɛdeɛ ɔ. Bebisa ndɛen turoloo befi me berɛ, na bekuro kyɛ bekopingye Nyameɛ ɔ.

³ Bɛnwa: ‘Nzu ati yeɛ yayɛ akɔngyere bɔ ennwu ye ɔ? Nzu ati yeɛ yabrɛ yɛ kra ase bɔ ɛnze ɔ?’ Ɛ́mɔtie, sɛ ɛmɔyɛ akɔngyere a, bɔ ɛmɔ bɔbɔ ɛmɔkuro yeɛ ɛmɔyɔ ɔ, na ɛmɔhyɛ ɛmɔ adwumayɔlɛfoɛ amukoraa so.

⁴ Ɛ́mɔtie, sɛ ɛmɔyɛ akɔngyere a, apereapereɛ ne ngondii yeɛ wali ɛmɔ ti ɔ, na ɛmɔto twɔleɛ anyeborolɛ so. Nna ɛmɔ akɔngyere bɔ ɛlɛsa ye ɛmɔyɛ ye yeɛ ɔkɔmaa ngɔte ɛmɔ komvi wɔ anwuro ɔ.

⁵ Aso akɔngyere bɔ ɔsɔ me nye ɛhe, kyẽa bɔ sona brɛ ye kra ase ne anaa? Aso akɔngyere okyire bɛ ti ase bɔ bɛbɔ ye kyɛ ngyɛngyɛma, ɔne kyɛ ɛkɔtrɛtrɛ ɛsɛen tena ne nzoen nu ɛkɔla so ɔ? Eh, aso ɛhe yeɛ ɛfrɛ ye akɔngyere ɔ, ɔne kyẽa bɔ ɔsɔ AWURADE nye ne anaa?

⁶ “Aso nna akɔngyere he yeɛ ɔsɔ me nye ɔ: kyɛ ɛmɔkɔsangye nzɛmmɔne ngɔnzɔngɔnzɔ, kyɛ ɛmɔkɔsangye mmenia kɔnnua nyamaa, kyɛ ɛmɔkɔma bɛ bɔ ɛmɔhyɛ bɛ so ɔ bekonya bɛ fawɔnwodi, ɔne kyɛ ɛmɔkobubu kɔnnua biala ɔ?

⁷ Sona bɔ ɛhɔen ku ye ne, aso onni kyɛ ɛma ye w’aleɛ ne bie anaa? Aso onni kyɛ ɛfa ehianiɛ anwumvoinniɛ ɛkɔ w’awuro anaa? Yeɛ, sɛ enwu bɔ ye nwo la so a, aso onni kyɛ ɛma ye tena maa ɔkera anaa? Yeɛ afei, onni kyɛ ɛbɔ wɔ nwoniɛ bɔ ohia mmokalɛ ɔ atianuserɛ.

⁸ Sɛ ɛyɔ sɔ a, wɔ kanea kopukye kyɛ alehyeleɛ, na w’anwonyerɛsalɛ kɔwa ndɛndɛ. Wɔ tenenee koli wɔ nyunu moa, ná AWURADE animnyam agyina wɔ si.

⁹ Afei ɛkɔfrɛ, na AWURADE kɔtɛ wɔ so, ekosu kɔfrɛ, na ɔkɔhã kyɛ, Me ɛhe. “Sɛ ɛyakyi kɔnnua bɔ ɛfa to mmenia kɔme, anwunanwuna asaa tengyɛlɛ ne ɛsoentolɛ,

¹⁰ sɛ ɛne bɔ ɛhɔen ku ye ɔ bɛkyɛ w’aleɛ, ná ɛma sona bɔ ɔyɛ anwumvo ɔ nikyee bɔ ohia hɔ a, ye de wɔ kanea kopukye awosii nu, na w’awosii kɔyɛ kyɛ eyia ketee.

¹¹ AWURADE kɔyɛ wɔ taataa daa biala, ɔkɔma wɔ kra ko koyi wɔ aseɛ katerepee so, ɔkɔma w’aporɛ nu kɔyɛ se, ɛkɔyɛ kyɛ turo bɔ mmerɛ biala nzue doadoa nu ɔ, kyɛ mbombonzue bɔ ɔnwewe ɔ.

¹² Wɔ nu ama kosa kɔkyekye wɔ kurofoen nemɔ, aworɛ ndoatoasoɛ daa daa nemɔ, ekosa kosi bɛ fapem nemɔ; na bɛkɔfrɛ wɔ: Bɔ osa si fasue bɔ wabubu ɔ, bɔ osiesie mmorɔnoɛ ma mmenia bɛtena so ɔ.

¹³ “Sɛ ɛhyɛ wɔ nwo so wɔ ɛnatelɛ nu wɔ afofikyẽa ne, ná anyɔ bɔ wɔ bɔbɔ ekuro ɔ wɔ me kyẽa krongron ne, ná mmom ɛfrɛ afofikyẽa ne anigye kyẽa, ɔne AWURADE kyẽa krongron ne kyɛ anidie kyẽa; sɛ edi ye ni, ná anni wɔ bɔbɔ wɔ ti piri, ná anyɔ bɔ wɔ bɔbɔ ekuro ɔ, anaakyɛ angekã edwirɛ mbaen mbaen a,

¹⁴ ye de ekonya anigye wɔ AWURADE nu; ngɔmaa ɛkɔfa aseɛ ne aso mmokaa nemɔ aso ngonim nu, ngɔfa wɔ nana Yakob agyapadeɛ ne ngɔma wɔ maa ekoli, ofikyɛ AWURADE noa dwirɛ ɛne.”