Yesaya 56 - AHYERƐLƐ KRONGRON

Nyameɛ ngoalelɛ wɔ berɛ ma ebiala

¹ AWURADE nwa nyoo: “Ɛ́mɔfa pɛpɛɛpɛyɛlɛ bɛ́bɔ bɛ bra, ná ɛmɔyɔ bɔ ɔtengyɛ ɔ, ofikyɛ ɔngɔhyɛ biala né me ngoalelɛ ne wawa, na me tenenee ne kɔla ali.

² Sona bɔ ɔyɔ sɔ ne, ɔte saleɛ ma ye, yeɛ sona awa bɔ otira nu pindinn ne, bɔ odi afofikyẽa ne aso, bɔ ɔmva efiɛ nga ye ne, bɔ ɔte ye nwo fi bɔne biala yɔlɛ nwo ne.”

³ Amanvoraniɛ bɔ waafa ye nwo wabɔ AWURADE ne, nnɛmaa ose kyɛ, “Etulɛ ala yeɛ AWURADE kotu me kofi ye maen nu ɔ”; yeɛ sona bɔ ɔte sayɛɛ ne koso, nnɛmaa ose kyɛ, “Hmmm, me de mayɛ bakaa wuruwaa.”

⁴ Ofikyɛ AWURADE nwa nyoo: “Sayɛɛ mɔ bɔ bedi m’afofingyẽa so, bɔ bɛyɔ bɔ mekuro ɔ, bɔ bedi m’apam ne aso ne,

⁵ ngɔma bɛ ngayeɛ nikyee ne dumaa wɔ m’awuro ɔne me fasue ne akunu, na sɔ nningyein nemɔ bedi mu bɛtra mmaa mmienzua ne mmaa mmrasua. Ngɔma bɛ dumaa afebɔɔ bɔ ongomini le ɔ.

⁶ “Yeɛ amanvrafoɛ bɔ bafa bɛ nwo baabɔ AWURADE kyɛ bɛbaaso ye, ná bahuro ye dumaa dwirɛ, ná bayɛ ye somvoɛ nen, ebiala bɔ odi afofikyẽa ne aso, bɔ ɔmva efiɛ nga ye ne, bɔ odi m’apam ne aso ne,

⁷ ngɔfa sɔ mmenia ne ngɔwa me bokaa krongron ne aso, ná mamaa banya anika wɔ me mbaeɛbɔlɛ awuro. Bɛ naen yeralɛ afɔleɛ ne b’afɔleɛ nemɔ, ɔkɔsɔ me nye wɔ m’afɔleɛ bokyea ne aso, ofikyɛ m’awuro ne, dumaa bɔ ɔkɔla so kɔma maen maen amukoraa ole mbaeɛbɔlɛ awuro.

⁸ AWURADE Nyameɛ bɔ ɔboaboa Yisrael mmenia bɔ babɔ aya noa ne, ɔnwa nyoo: “Mmenia bɔ maboaboa bɛ noa mama ye ne, ngɔhɔ so ngɔboaboa ebieku noa ngɔboka ye so.”

⁹ Eburo ngaka amukoraa, ɛmɔbra bɛɛtete nu pasapasa beli, yoo, ɛhɔayeɛ nu ngaka amukoraa.

¹⁰ Ye awɛmvoɛ nemɔ bɛ nye asi, bɛ mukoraa nimdeɛ abɔ bɛ, bɛ mukoraa bɛte ngyea mumu, bɛngora po, na laleɛhyenɛ, asefuo nu lalɛ ne nnaa yeɛ watɔ bɛ so ɔ.

¹¹ Amba, bɛte ngyea adifuu, na bɛnze ahoyire. Bɛte mmoaenneafoɛ bɔ nimdeɛ abɔ bɛ ɔ, bɛ mukoraa bali makyebu baafa bɛ bɔbɔ b’atee so, na bɛ nu biala ɔdwene ye ngome ye yeeyɛlɛ nwo.

¹² “Bɛkã kyɛ, ‘Ɛmɔbra, mekwaafa nzaa meba, ɛ́mɔma yɛ́no nzaa serɛ yɛ́bo, na ɛhema koso ɔkɔyɛ kyɛ ɛnɛ ala, na ɔkɔtra so po!’ ”