Yesaya 52 - AHYERƐLƐ KRONGRON

Nyameɛ kɔpepɛ kole Yerusalem

¹ O Sion, kanyane wɔ nwo, kanyane wɔ nwo! kyire w’anwoserɛ e! O Yerusalem, kuro krongron, fa w’animnyam tena ne kera, ofikyɛ, ofi ɛnɛ bɔ ɔkɔ ɔ, bɛmbɛ-bɛ-bienzuafoɛ ne bɛ bɔ bɛ nwo nde ne, bengowura wɔ nu ko.

² O Yerusalem bɔ bahye wɔ nnure ɔ, dwɔso poroporo wɔ nwo mvuture ne! O Sion awa brasua bɔ bahye wɔ nnure ɔ, nyangye ngɔnzɔngɔnzɔ bɔ bafa bagua wɔ kɔme ne!

³ Ofikyɛ AWURADE nwa nyoo, “Bandɔne wɔ banne huu, yiti nna sikaa yeɛ bɛkɔfa bɛkɔpɔ wɔ ɔ.

⁴ Ɔnate kyɛ AWURADE Nyameɛ nwa nyoo: Daa daa bie, Misraim yeɛ me maen otu hɔle ɔɔyɛle ɛwɔfoɛ ɔ, na Asiriafoɛ hyɛle bɛ so mbaen.

⁵ Na afei, nzikyɛ yeɛ odi kyɛ meyɔ ye wɔ wa ɔ? AWURADE noa dwirɛ ɛne, ofikyɛ basesa me maen bahɔ mbaen. Bɛ bɔ bedi bɛ so ne, bɛmaa bɛbɔ awuye, AWURADE noa dwirɛ ɛne; na daa biala bɛkekã musue dwirɛ betia me dumaa.

⁶ Ye sɔ ne ati, me maen konwu me dumaa. Yiti sɔ kyẽa ne, bekonwu kyɛ me ala yeɛ mekã kyɛ, Yoo, Me ɔ.”

⁷ Sona bɔ ɔso ndɛenvɛen nate mmokaa nemɔ aso ne, kyɛbɔ ye gya bo osi yɛ nyemene ɔ! Ɔbɔ asomdwee nwo dawure, ɔso edwirɛ paa nwo ndɛenvɛen, ɔbɔ ngoalelɛ nwo dawure, na ose Sion kyɛ, “Wɔ Nyameɛ ne, odi hene.”

⁸ Tie! W’awɛmvoɛ nemɔ bɛma bɛ komvi so, bɛbɔ nu bɛto ahurusi dwein, ofikyɛ bɛ nye tua AWURADE kyɛ osa ba Sion ɔ.

⁹ Yerusalem dandue mɔ, ɛ́mɔbɔ nu bɛ́to dwein; ofikyɛ AWURADE akyekye ye maen wora, na waapɔ Yerusalem wale ye.

¹⁰ AWURADE ala ye tumi krongron ne ali, wama maen maen mukoraa banwu ye, na aseɛ so nekaa biala konwu yɛ Nyameɛ ngoalelɛ ne.

¹¹ Ɛmɔ bɔ ɛmɔsoa AWURADE ngukue nemɔ ne, ɛmɔhɔ, ɛmɔhɔ, ɛmɔfi berɛ bɛhɔ, nnɛma ɛmɔfa ɛmɔ nwo bɛkã nikyee biala bɔ ye nwo nde ɔ; ɛ́mɔfi ye nu béfite bɛhɔ, ɛ́mɔte ɛmɔ nwo.

¹² Ɛmɔngofi berɛ bɛngɔhɔ ye ndɛndɛ so, yeɛ ɛmɔngɔnwati bɛngɔhɔ, ofikyɛ AWURADE koli ɛmɔ nyunu, yeɛ Yisrael Nyameɛ ne kogyina ɛmɔ si.

Nyameɛ somvoɛ n’amaneɛnwunɛ

¹³ Ɛ́mɔtie, okoyie me somvoɛ ne yé, bɛkɔma ye anidie ná bama ye so, na ɔkɔyɛ titire paa.

¹⁴ Na kyɛbɔ ɔyɛle mmeni pee bɔ benwuni ye ne nwanwa, ofikyɛ ye nyunu mengyemengyele, bɔ né onzoma sona, bɔ né ye sona sue deɛ onzoma kuro sona deɛ ne ati,

¹⁵ sɔ ala yeɛ ɔkɔma maen maen mɔ bɛ nwo kodwiri bɛ ɔ; ɔnate ye ti ahemvo mɔ kɔtotɔ mmobo; ɔnate kyɛ, bɔ bɛhhã behhyirele bɛ ne, bekonwu ye; yeɛ bɔ bɛttele ne, bɛkɔte ye bo.