Yesaya 5 - AHYERƐLƐ KRONGRON

AWURADE bobe boo nwo anyandera

¹ Maa ndo me dɔfo nwo dwein, me dɔfo dwein bɔ ɔfa ye bobe boo nwo ɔ: Né me dɔfo ne ole bobe boo wɔ bokaa bie bɔ ɔkye aleɛ ɔ so.

² Olele ye nwo waen, ɔyeyele so nyɔboɛ ne, oluale bobe mmaa paa wɔ nu, osili abandenden siele eboo n’afia, otuli nu kumaa bɔ okohwi bobe mmaa ne anu kɔyɔ nzaa ɔ, ɔnwondɛle kyɛ bobe ne kosu mmaa paa ɔ, nakoso ye mma bɔ osuli ne te bisii.

³ Afei, ɛmɔ bɔ ɛmɔte Yerusalem, yeɛ Yudafoɛ, mesrɛ ɛmɔ, me ne me bobe boo dwirɛ ne, ɛ́mɔbua.

⁴ Nzikyɛ bieku yeɛ ahaa odi kyɛ meyɔ ye me bobe boo ne anu bɔ manyɔ ɔ? Mvale me nye ndole so kyɛ okosu mmaa paa, nzu ati yeɛ wasu mmaa bisii ɔ?

⁵ Afei de, bɔ ngɔfa ngɔyɔ me bobe boo ne, mebaahã mekyire ɛmɔ. Ngotutu ye nwo waen ne maa ngaka kooli; ngodwiri ye nwo fasue ne ngogua maa bekotiatia bobe ne aso.

⁶ Ngɔmaa ɔkɔkakyi adangasa, mengɔdwaadwaa ye nwo, yeɛ mengɔbɔ ye nwo, nu kofu agurɛ ne mmowue. Asa koso, ngɔhyɛ munungum kyɛ nnɛmaa ɔtɔ esue gua so.

⁷ Hmmm, Asafo AWURADE bobe boo ne, ye ole Yisrael awuro ama, yeɛ Yudafoɛ wora bɛte ye boo bɔ ɔyɛ ye nyemene ɔ. Ahaa né ɔpena kyɛ onwu ndɛenbualɛ turoloo, nakoso onwu aminɛlilɛ, ahaa né ɔpena kyɛ onwu tenenee, nakoso awuyebɔlɛ yeɛ ɔte ɔ!

AWURADE dwudwo tia asisie

⁸ Bɛ yaakɔ! Bɛ bɔ basesa sua mɔ babɔ so, bɔ basesa eboo mɔ babɔ so, kɔpem kyɛ bɛkɔkandam ye mukoraa so, kɔpem kyɛ bɛ ngome bɛkɔha wɔ aseɛ ne aso ɔ.

⁹ Asafo AWURADE ahã agua me so anu kyɛ, “Nahorɛ nu, awuro pee kɔbɔ, awuro mbiri mbiri nyemenenyemene mɔ kɔkakyi dandue.

¹⁰ Ofikyɛ bobe boo eka buru kɔma wɔ nzaa bua ko pɛ, yeɛ edua aburoo angora ko a, ekonya olonka buru.”

¹¹ Bɛ yaakɔ! Bɛ bɔ bɛpɛ aleɛ bedwɔso bekodi nzaa serɛ si, bɛ bɔ besiri pɛ bɛno nzaa toonn bɛbo ɔ!

¹² Bɛ yeɛ bɛfa sangoo, adengum, akasaa, awɛen ne nzaa bɛkɔ bɛ poentolɛ bo ɔ, nakoso bɛmva nningyein bɔ AWURADE yɔ ɔ bɛnyɔ huu ɔ, yeɛ ye sa noa adwuma koso bennwu ye.

¹³ Ye sɔ ne ati, bɛkɔhye me maen nnure bɛkɔhɔ, ɔnate nimdeɛ bɔ belle bie ti; ɛhɔen kohũ b’atitirefoɛ maa bekowu, yeɛ nzuhɔen kohũ mmenia wora ne maa bekowu.

¹⁴ Ye sɔ ne ati, ɛborɔ ye komvi ode ye tekɔtekɔ paa, wabukye ye noa nu fakaa, na Yerusalem animnyamfoɛ ne ye mmenia worawora ne ye lɔen ne bɛ bɔ bɛ nye gye ye nu ne, bekoowura nu.

¹⁵ Babrɛ kuro sona ase, adasa nyunu agua ase, babrɛ mmenia b’anwomasoɛ ase.

¹⁶ Nakoso Asafo AWURADE de, bɛma ye so wɔ ye ndɛenbualɛ turoloo nu, na Krongronniɛ Nyameɛ ɔda ye krongronyɛlɛ ali wɔ tenenee nu.

¹⁷ Afei mmoaen mmaa konya aleɛ bekoli, kyɛ bedidi eburo ne ala, na ɛwɔfoɛ mɔ konya aleɛ bekoli wɔ kuro bɔ wabɔ ne anu.

¹⁸ Bɛ yaakɔ! Bɛ bɔ bɛfa nnakannaka nyamaa bɛtwetwe amumuyɛɛ ɔ, bɛ bɔ bɛtwetwe bɔne kyɛ teaseɛnam nyamaa yeɛ bɛfa bɛtwe ne,

¹⁹ bɛ bɔ bɛnwa, “Ma ye nwo yɛ nyera e, maa ɔyɔ ye adwuma ne ndɛndɛ ma yɛnea e; Yisrael Krongronniɛ ne, ma ye botaeɛ ne opingye ma yɛnea e!”

²⁰ Bɛ yaakɔ! Bɛ bɔ bɛkã kyɛ bɔne te paa, ɔne kyɛ paa te bɔne ɔ; bɛ bɔ bɛfa awosii bɛyɛ kanea, ná bafa kanea bayɛ awosii ɔ; bɛ bɔ bɛnwa nikyee weewee te menemene, ná nikyee menemene koso yɛ wee ɔ!

²¹ Bɛ yaakɔ! Bɛ bɔ bɛdwene kyɛ bɛte nworɛfoɛ, ná bɛdwene kyɛ bɛte badwemma ɔ!

²² Bɛ yaakɔ! Bɛ bɔ bale dumaa wɔ nzaanonɛ nu ɔ, ɔne bɛ bɔ bɛbɔ mmɔden wɔ nzaa serɛ frafralɛ nu ɔ.

²³ Bɛ yaakɔ! Bɛ bɔ bede fea-ase-ma bebua sona bɔ odi fɔ be ɔ, ɔne bɛ bɔ bebua sona bɔ odi be ndɛengyea ɔ!

²⁴ Yiti kyɛbɔ see osi yera ngyɛngyɛma motoo, ɔne kyɛbɔ see wuronyiwuronyi osi yera ndire worowaa ne, sɔ ala yeɛ sɔ mmenia nemɔ bɛ ndii kɔporɔ ɔ, na mvrama kɔporo bɛ nyerɛen kogua kyɛ mvuture, ofikyɛ bapo Asafo AWURADE mmeraa ne, na babu Yisrael Krongronniɛ ne dwirɛ animtia.

²⁵ Yiti AWURADE fɛle ye maen so yaa piri paa, odwɔso tiale bɛ huhuni bɛ, mmokaa mɔ wosole, na bɛ fuin mɔ to petene kyɛ fofoɛ bɔ ogua dwaaso ɔ. Na ɛhemɔ amukoraa nu po ne, wanyakyi bɛ so yaafɛlɛ, na ɔtɛ dwɔso tia bɛ.

²⁶ AWURADE kɔpagya frangaa kohyire dedeede maen maen mɔ, ɔkɔbɔ mvrɛma kɔfrɛ bɛ kofi aseɛ noa dɔ; na nea, bele amirika bɛkɔwa ndɛndɛ!

²⁷ B’ɛlɔen ne, bɛ nu biala mvɛ, ebiala nzoti, ebiala ndɔ ngosie anaa ɔnnafe, b’abɔsoɛ nu ngoho, yeɛ bɛ mbaboa nyamaa ndete;

²⁸ b’agyaen mɔ yɛ nna, basinasina b’agyaen ne amukoraati, bɛ mbɔngɔ nemɔ gya boen te kyɛ twerɛboɛ, na bɛ teaseɛnam nemɔ betu amirika kyɛ mvrama bɔ ɔpɛ ye nwo ɔ.

²⁹ Kyɛbɔ besi bɛbobɔ nu ne, ɔte kyɛ gyata deɛ, na bepo kyɛ gyata akrɔngrɔma mɔ, bɛyɛ bɛ komvi hooo bɛkye bɛ naen, na bɛfa bɛkɔ bɔ ebiala ngora nnne mvi bɛ sa nu ɔ.

³⁰ Bekopo bɛ sɔ kyẽa ne, kyɛbɔ ɛpo yɛ wuruwuru ɔ. Na sɛ ɛto wɔ nye nea aseɛ a, awosii ne aworabɔlɛ yeɛ ekonwu ye ɔ, na munungum komundu hyireinn so maa ɔkɔyɛ tunn.