Yesaya 46 - AHYERƐLƐ KRONGRON

Bosoensolɛ te mbaen

¹ Bel ɔbɔ ye ti ase, Nebo koto, b’amoen nemɔ teta ngaka ne nandwie mɔ si, ɛmɔ amoen mɔ bɔ ɔyɛ a ɛmɔsoa ne, afei de ɛmɔakyekye basoa ngaka bɔ bafɛ ɔ.

² Bɛkoto, bɛbɔ nu bɛbɔ bɛ ti ase, amoen nemɔ bɔ basoa ne, bɛ bɛngora bɛmbepɛ benne bɛ nwo, na bahye bɛ bɔbɔ nnure bafa bɛ bahɔ.

³ “O Yakob awuro ama, yeɛ Yisrael awuro ama bɔ baha ne amukoraa, bɔ madodo ɛmɔ ofite ɛmɔ aworɛ nu, bɔ magyi ɛmɔ fi bɛ kunu ɔ, ɛ́mɔyɛ asoɛ bétie me!

⁴ Na ɔkwaadwu ɛmɔ aworowaabɔlɛ nu po, bɔ nde ala yeɛ nde ɔ, yeɛ ɔkwaadwu ɛmɔ egyeinfulɛ nu po, ngododo ɛmɔ. Me yeɛ mmɔle ɛmɔ ɔ, ngogyina ɛmɔ si, ngododo ɛmɔ ná mapepɛ male ɛmɔ.

⁵ “Nwa yeɛ ɛmɔkɔfa ye bɛkɔtoto me nwo, anaa ɛmɔkobu ye kyɛ ɔne me yɛte pɛ ɔ? Nwa yeɛ ɛmɔkɔfa ye bekosusu me kyɛ yɛte pɛ ɔ?

⁶ Mmenia fura sikaa kɔkorɛ befi bɛ bɔtɔ nu, bɛkari ɛdwetɛ wɔ tonyi so, bɛbɔ sikaa kɔkorɛ dwumvoɛ paa maa ɔfa yɔ bosoen, na bebutu berɛ bɛsɔne ye.

⁷ Bɛfa ye besie bɛ kɔme anwo, bɛsoa ye, besikye ye besie ye boso, berɛ ala yeɛ ogyi ɔ; na ɔngora ndu ye bo mvi nekaa bɔ ogyi ne. Sɛ sona sũ frɛ ye a, ɔngora ndɛ ye so, yeɛ ɔngora mbepɛ nnne ye mvi ye amaneɛ nu.

⁸ “Odi kyɛ ɛmɔkaye ɛhe ná ɛmɔdwene ye nwo, ɛmɔ mmeraatolɛfoɛ, odi kyɛ ɛmɔkaye!

⁹ Ɛ́mɔkaye daa tete nningyein bɔ osisili ne, ofikyɛ me ole Nyameɛ, na ebiala nne berɛ ko, me ole Nyameɛ, na ebiala nne berɛ bɔ ɔte kyɛ me ɔ.

¹⁰ Me yeɛ ofi ahyɛaseɛ ne, ngane ayieleɛ dwirɛ ɔ, ɔne kyɛ ofi tetetete yeɛ ngane bɔ onnya ossili nwo dwirɛ ɔ. Ngane kyɛ, ‘Me botaeɛ kogyina, na ngɔyɔ me nhyehyɛleɛ amukoraa.’

¹¹ Ngɔfrɛ anomaa bɔ ɔkye ngaka di ɔ ngofi eyia afiteleɛ, biaa bɔ ofi maen bie aso dedeede bɔ ɔkɔyɔ me nhyehyɛleɛ ne ɔ. Mahã, na ngɔmaa ɔkɔwa nu; mahyehyɛ mato berɛ, na ngɔyɔ.

¹² “Asoserɛfoɛ, ɛ́mɔyɛ asoɛ bétie me, ɛmɔ bɔ ɛmɔ ne tenenee b’afia atee wale ɔ:

¹³ Mama me tenenee ne apingye, ɔnne dede koraa, me ngoalelɛ ne, ɔngɔhyɛ né wawa. Ngɔma ngoalelɛ kɔwa Sion, na ngɔma m’animnyam kɔwa Yisrael so.”