Yesaya 42 - AHYERƐLƐ KRONGRON

AWURADE somvoɛ ne

¹ Nea, me somvoɛ bɔ ngyi ye si pindinn ne ɛhe, ye bɔ maneanea nu maye ye, bɔ me kra nye gye ye nwo ne; mafa me Sunzum magua ye so, na ye yeɛ okobua maen maen mɔ ndɛen turoloo ɔ.

² Ɔngɔteatea nu, ongodwudwo serɛserɛ, yeɛ ɔngɔma bɛngɔte ye komvi wɔ dwaaso;

³ elemmire bɔ ɔte fɛngyɛfɛngyɛ ne, ongobu nu, yeɛ kanea nyamaa bɔ ogye monɛɛmonɛɛ ne, ongonua ye, na okobua ndɛen turoloo.

⁴ Ye de, ongogye monɛɛmonɛɛ, yeɛ ye abasa nu ngobu, kɔpem kyɛ ɔkɔma ndɛenbualɛ turoloo kotira ndii wɔ aseɛ so ɔ, na supɔ mɔ bɛnwondɛ ye mmeraa ne.

⁵ AWURADE Nyameɛ bɔ ɔbɔle anwuro ná ɔtrɛtrɛle nu ne, ye bɔ ɔbayele aseɛ nu, ɔne bɔ ofi nu ba biala nu tole berɛ ne, ye bɔ ɔma so mmenia nwomeɛ, ná ɔma bɛ bɔ bɛnate so sunzum ne, ɔnwa nyoo:

⁶ “Me, AWURADE, mafrɛ wɔ wɔ tenenee nu, ngotira wɔ sa ngɔfa wɔ ngosie, ngɔfa wɔ ngɔyɛ apam ngɔma maen ne, ɔne kanea ngɔma maen maen mɔ,

⁷ kyɛ, ɛ́tete anyeɛ mɔ bɔ basi ɔ, kyɛ ɛ́ye kukunufoɛ efi kuku nu, ɔne kyɛ ɛ́ye bɛ bɔ bɛte awosii nu ɔ efi kuku nu.

⁸ Me ole AWURADE, me dumaa ɛne, memva m’animnyam memma ebiala, yeɛ m’ayɛyelɛ koso, memva memma amoen mɔ.

⁹ Tie, nningyein daa ne, bawa nu, na méfa nningyein foforɛ meto dwaa, na mékã bɛ nwo dwirɛ mekyire ɛmɔ koraka né basi.”

Ayɛyelɛ dwein

¹⁰ Ɛmɔ bɔ ɛmɔkɔ ɛpo, ɔne ɛpo nu nningyein amukoraa, yeɛ supɔ mɔ nu ama, ɛ́mɔto dwein foforɛ bɛ́ye AWURADE ayɛ, ɛ́mɔto ye ayɛyelɛ dwein ne béfi ewiase noa dɔ paa.

¹¹ Aseɛ pralaa so ne so nguro mɔ, ɛ́mɔma ɛmɔ komvi so, namue mɔ bɔ Kedare te so ne; bɛ bɔ bɛte Sela ne, odi kyɛ bɛto ahurusi dwein, odi kyɛ bɛbɔ ese befi mmokaa nemɔ ti afia.

¹² Odi kyɛ bɛhyɛ AWURADE animnyam ná bɛbɔ ye ayɛyelɛ ne dawure wɔ supɔ nemɔ aso.

¹³ AWURADE kɔhɔ ye nyunu kyɛ katakyie, ɔkɔma ye ahone kohu kyɛ koɛhonɛniɛ, ɔkɔtea nu, ɔkɔbɔ ese, na okoli ye pɔfoɛ mɔ so ngonim.

¹⁴ Ngane me noa ndole nu ɔ wahyɛ, mayɛ konn, na mafa me yaafɛlɛ ne makongɔm berɛ, nakoso kekesaala ye de, ngɔtea nu kyɛ brasua bɔ wafo aworɛ so ɔ, ngɔtee so, ná male nwomeɛ ngoko ngoko.

¹⁵ Ngɔsɛkye mmokaa ne pambaa mɔ, ná mama so nyaa amukoraa akese; ngɔkakyi asue mɔ supɔ mɔ, ná mawewe ɛkwaa mɔ.

¹⁶ Na ngɔyɛ anyesiniwaafoɛ taataa ngɔfa atee bɔ bɛnze so ɔ so; ngoli bɛ nyunu ngɔfa atimbire bɔ bɛnze so ɔ so. Ngɔma awosii kɔkakyi hyireinn wɔ bɛ nyunu, na ngɔma mmɔnga mmɔnga atee ne kɔla so. Bɔ ngɔyɔ ngɔma bɛ hɔ ɛne, na mengɔye me sa mengofi bɛ bo.

¹⁷ Bɛ bɔ bɛfa bɛ wora bewura mmosoen nu, bɛ bɔ bɛkã bekyire amoen mɔ bɔ bahuro nikyee bafa bayɔ ɔ kyɛ, “Ɛmɔte yɛ nyameɛ mɔ” ne, bɛkɔtete bekosa, na bɛ nyunu kogua ase bɔkɔɔ.

¹⁸ Asotiniwaafoɛ, ɛ́mɔtie! Anyesiniwaafoɛ, ɛ́mɔnea, amaa ɔnate so ɛmɔanwu ye!

¹⁹ Nwa yeɛ ye nye asi kyɛ me somvoɛ, anaa nwa yeɛ ye so ati kyɛ me bɔfoɛ bɔ mesoma ye ne ɔ? Nwa yeɛ ye nye asi kyɛ bɔ watu ye nwo wasie berɛ wama me ne ɔ, anaa ye nye asi kyɛ AWURADE somvoɛ ne ɔ?

²⁰ Anwu nningyein pee, nakoso ɛmvete wɔ nye nnea, wɔ so tokuro ne, nu la berɛ, nakoso ɛnde dwirɛ.

²¹ Na ɔnate kyɛ AWURADE tengyɛ ne ati, ye nye gyele kyɛ ɔkɔpagya mmeraa ne maa okonya animnyam ɔ.

²² Nakoso bɛte maen bɔ ebiemɔ bali bɛ aminɛ bafẽ bɛ nningyein bafa ɔ, bahã bɛ mukoraa bapua wɔ bɔen mɔ nu, bafa bɛ baafea kuku nu, baha ngaen nu bɔ defoɛ biala nne berɛ ɔ, bakakyi koɛ nu nzesadeɛ bɔ ebiala nne berɛ bɔ ɔkɔhã kyɛ, “Ɛ́mɔsa bɛfa bɛ bɛhɔ!”

²³ Ɛmɔ nu nwa yeɛ ɔkɔyɛ asoɛ kotie ɛhe ɔ? Nwa yeɛ ofi ɛnɛ bɔ ɔkɔ ɔ ɔkɔbɔ ye so adaa okotie ɔ?

²⁴ Nwa yeɛ ɔfale Yakob wurale apaabɔlɛfoɛ mɔ bɛ sa, ná ɔfale Yisrael wurale awerɔm awuefoɛ bɛ sa ɔ? AWURADE bɔ yayɔ bɔne yatia ye, bɔ bamva ye atee so, bɔ banni ye mmeraa so ne, aso nna ye ɔ?

²⁵ Ye sɔ ne ati, ɔmane ye ahone huli Yisrael so paa, na ɔmane koɛ piri paa tole ye. Ye ahonehulɛ ne, ogyele kyɛ see fale ye nwo amu, nakoso wande ye bo, ɔyerale ye, nakoso wanzua nworɛ wamvi nu.