Yesaya 4 - AHYERƐLƐ KRONGRON

¹ Sɔ kyẽa ne, mmrasua nzoo kɔte kɔmata bienzua ko, na bekose kyɛ, “Yɛkɔpena yɛ bɔbɔ yɛ noa aleɛ ɔne ɛtena bɔ yɛkɔhera ɔ. Wɔ de, fa wɔ dumaa to yɛ so, ná ye yɛ animguaseɛ ne fi yɛ so.”

Yerusalem kosa kosi ye gya nu

² Sɔ kyẽa ne, AWURADE (bakaa) mmaen ne kɔyɛ nyemene, okonya animnyam, na aseɛ ne aso mmakaammaa kɔyɛ anwohoahoa nikyee ne animnyam kɔma Yisrael mmenia bɔ banya bɛ ti badidi nu ne.

³ Na ɔkɔwa kyɛ, bɛ bɔ bayakyi bɛ berɛ wɔ Sion bɔ baha Yerusalem ne, ebiala bɔ baha ye baboka ateasefoɛ so wɔ Yerusalem ne, bɛkɔfrɛ ye krongron,

⁴ mmerɛ bɔ AWURADE kɔfa ndɛenbualɛ sunzum so ne ɛyeralɛ sunzum so kobia Sion mma mmrasua nwo fiɛ kogua, ná wanwunzi mogya bɔ Yerusalem ahã agua ne.

⁵ Na afei Sion bokaa ne, ye nekaa biala, ɔne mmenia bɔ beyia berɛ ne, AWURADE kɔyɛ munungum eyia, ɔne nwosina ne see gonn kɔngɔen komundu bɛ so. Ofikyɛ animnyam ne kɔyɛ ngatasoɛ kɔkata bɛ mukoraa bɛ so.

⁶ Ɔkɔyɛ ɛtena sua bɔ eyia bɔ a nu te fɔnwoo ɔ, afealeɛ ne nekaa bɔ bɛbɔ bɛ nwo waen bɔ ɔmma mvrama piri ne esue nga bɛ ɔ.