Yesaya 39 - AHYERƐLƐ KRONGRON

Babilɔn ɛbɔfoɛ nemɔ

¹ Sɔ mmerɛ ne, Babilɔn hene Merodake Baladan bɔ ye baba ole Baladan ne, otuli ɛbɔfoɛ mɔ fale krataa ne akyɛdeɛ maa bɛɛmane Hesekia, ofikyɛ né wate kyɛ anwonyerɛ abɔ Hesekia ná afei wate apɔ.

² Hesekia lele ɛbɔfoɛ nemɔ nyemene so, na ye sua bɔ osie nningyein hemɔ amukoraa nu ne, obukye maa bɛneane nu: ɛdwetɛ, esikaa kɔkorɛ, ayirefona ne ngoo paa; ye koɛhonɛ nningyein amukoraa sua, yeɛ nningyein amukoraa bɔ bɛwɔ ye sua mɔ bɔ osie nningyein nu ne koso, obukyebukye hyirele bɛ. Na nikye fee nne Hesekia ahemvie berɛ anaa ye ahennie ne anu amukoraa bɔ wamva wangyire bɛ ɔ.

³ Yeɛ ngɔmhyɛlɛniɛ Yesaya hɔle Nana Hesekia berɛ oobisale ye kyɛ, “Mmenia hemɔ b’amaneɛ, na befi nisua yeɛ bɛwale wɔ berɛ ɔ?” Na Hesekia buale kyɛ, “Befi maen bie anu dedeede yeɛ bawa me wa ɔ. Befi Babilɔn.”

⁴ Yeɛ Yesaya bisale kyɛ, “Nzikyɛ yeɛ beenwuni ye wɔ w’awuro wa ɔ?” Na Hesekia buale kyɛ, “Banwu nningyein bɔ ɔwɔ m’awuro wa amukoraa, na me sua mɔ bɔ mesie nningyein nu ne, nu nikyee biala nne berɛ bɔ mamva mangyire bɛ ɔ.”

⁵ Yeɛ Yesaya sele Hesekia kyɛ, “Tie Asafo AWURADE noa dwirɛ:

⁶ Tie, nningyein bɔ ɔwɔ w’ahemvie wa, ɔne agyapadeɛ bɔ wɔ nana mɔ bapena bagua berɛ maa waadwu ɛnɛ ye, mmerɛ bie baawa bɔ bɛkɔsoa ye mukoraa bɛkɔhɔ Babilɔn ɔ. AWURADE nwa nyoo, bɛngɔyakyi nikye fee wa.

⁷ Bɛkɔsesa wɔ bɔbɔ wɔ mma bɔ awo bɛ ne biemɔ bɛkɔhɔ, na bɛkɔyɛ sayɛɛ wɔ Babilɔn hene ahemvie.”

⁸ Yeɛ Hesekia sele Yesaya kyɛ, “AWURADE noa dwirɛ bɔ ahã ne, ɔte paa.” Ɔhane sɔ, ofikyɛ onyane adwene kyɛ, “M’aberɛ so, maen ne konya asomdwee, na nu kodwo fɔnwoo.”