Yesaya 38 - AHYERƐLƐ KRONGRON

Anwonyerɛ bɔ Hesekia

¹ Sɔ mmerɛ ne anu, anwonyerɛ bɔle Hesekia bɔ né ɔla awusu ɔ. Na ngɔmhyɛlɛniɛ Yesaya bɔ ye baba ole Amoso ne, ɔwale Hesekia berɛ oosele ye kyɛ, “AWURADE nwa nyoo: Toto wɔ si yé, ofikyɛ ɛbaawu, na ɛngɔte apɔ.”

² Yeɛ Hesekia fale ye nye hyirele terɛ bɔle mbaeɛ hyirele AWURADE kyɛ,

³ “Ao AWURADE, mesrɛ wɔ ala, fa wɔ nye to kyɛbɔ mafa m’ahone amukoraa mali wɔ dwirɛ so nahorɛ nu, ɔne kyɛbɔ mayɔ bɔ ɔtengyɛ ɔ wɔ wɔ nyunu ne.” Na Hesekia suni hahii.

⁴ Yeɛ AWURADE lale ye dwirɛ ali hyirele Yesaya kyɛ,

⁵ “Kɔhã kyire Hesekia kyɛ, AWURADE, wɔ nana Dawide ye Nyameɛ ne, ɔnwa nyoo: Matie wɔ mbaeɛ ne, na manwu ɛmoen bɔ ɛporo ne. Tie, ngɔto wɔ ngoa nu afoɛ buru ne nnu.

⁶ Ngɔpepɛ ngole wɔ ne kuro he ngofi Asiria hene sa nu, na ngɔbɔ kuro ye anwo waen.

⁷ “Na ɛhe yeɛ ɔkɔyɛ sɛngyerɛnneɛ bɔ ofi AWURADE ɔ, bɔ okyire kyɛ AWURADE kɔyɔ edwirɛ bɔ wahã ne ɔ:

⁸ Tie, eyia bɔ ɔkwaatɔ ne, wawoɛ bɔ wamaa waatɔ Ahase atweleɛ ne aso ne, ngɔmaa okosa ye si mmerɛ nu ngyɛmuɛ buru.” Yiti wawoɛ ne sale ye si mmerɛ nu ngyɛmuɛ buru bɔ né watra ɔkwaatɔ ɔ.

Hesekia ayɛyelɛ dwein

⁹ Anwonyerɛ bɔle Yuda hene Hesekia, ná afei ye nwo sandene ye ne, edwirɛ bɔ ɔhyerɛle ɛhe:

¹⁰ Mmerɛ bɔ me ngoa hale kaaba bie ne, ngane kyɛ: Mebaafi wa, mebaahɔ ɛborɔ dɔ pambim ne anu, m’afoɛ bɔ waha ne, béde béfi me sa nu.

¹¹ Ngane kyɛ, Mengonwu AWURADE ko wɔ ateasefoɛ aseɛ so; mengonwu sona ko wɔ mmenia bɔ bɛte wiase ɔ nu.

¹² Batutu m’atenaleɛ ne abo bafi me nwo bahɔ, kyɛ mmoaenneafoɛ ɛtena sua; kyɛbɔ sona bɔ ɔnwo ɛtena ɔ ɔyɔ ne, sɔ ala yeɛ mabobɔ me ngoa o; wate me wafi bakaa bɔ bɛnwo ɛtena wɔ so ne anwo; na ɛma me ngoa ohi fi alehyeleɛ kodwu alesaleɛ.

¹³ Mesu mepena mmokalɛ alaa kodwu ngyerɛmɔ; obubu me mmowue mukoraa nu kyɛ gyata; ɛma me ngoa ohi fi alehyeleɛ kodwu alesaleɛ.

¹⁴ Mesu meteatea nu kyɛ nandwinoma anaa bɔlanoma, mepene kyɛ abubure. Mepagya me nye menea anwuro toonn ma me nye mmaa yɛ mmosonoo. O AWURADE, mali amia, pepɛ de me!

¹⁵ Nakoso nzikyɛ dwirɛ yeɛ mékã ɔ? Ofikyɛ wahã wahyire me, na ye bɔbɔ deinn yeɛ wayɔ sɔ ɔ. M’afoɛ amukoraa bɔ medi ne, me kra di aworabɔlɛ.

¹⁶ O AWURADE, sɔ atee ne yeɛ mmenia bɛnate so bɛtena ase ɔ, na ɛhemɔ amukoraa nu yeɛ me kra ye ngoa wɔ ɔ, nzaade, ma me nwo ɔsande me, ná maa nza nya ngoa.

¹⁷ Amba, me yeeyɛlɛ ti yeɛ nwuni amaneɛ piri ɔ. Ɛnate wɔ ɔdɔ so aye me kra afi ewue kumaa nu, ofikyɛ agyi me bɔne amukoraa agua wɔ si dɔ.

¹⁸ Ɔnate kyɛ ɛborɔ ngɔhora ngɔla wɔ ase, ewue ngɔhora ngɔye wɔ ayɛ, bɛ bɔ bahɔ ewue kumaa nu ne, bɛngɔhora bengonya wɔ nahorɛlilɛ ne nwo anyelasoɛ.

¹⁹ Ateasefoɛ, ateasefoɛ yeɛ bɛda wɔ ase ɔ, kyɛbɔ ɛnɛ meda wɔ ase ye; baba yeɛ okyire mmaa wɔ nahorɛlilɛ ne ɔ.

²⁰ AWURADE kole me ngoa, na yɛkɔbɔ sangoo yɛkɔto dwein mmerɛ biala bɔ yɛte ase ɔ wɔ AWURADE awuro.

²¹ Né Yesaya wali moa wahã kyɛ, “Ɛ́mɔfa borɔdoma bɔ babɔ ye kunguma ɔ bɛɛyɛ mbɔmbɔ ne aso, na ɔkɔte apɔ.”

²² Né Hesekia abisa kyɛ, “Nzikyɛ sɛngyerɛnneɛ yeɛ okyire kyɛ ngɔhɔ AWURADE awuro ne anu ɔ?”