Yesaya 32 - AHYERƐLƐ KRONGRON

¹ Tie, ɛhene bie baawa bɔ ɔkɔfa tenenee koli hene ɔ, na pɛpɛɛpɛyɛlɛ yeɛ maen mbanyi kɔfa kobu maen ɔ.

² Bɛ nu biala kɔyɛ kyɛ afealeɛ bɔ mvrama tu a sona fea nu ɔ, nekaa bɔ mvrama piri tu a sona bɔ ye nwo waen ɔ, kyɛ aseɛ wosee so asue bɔ ɔtengyɛ ɔ, kyɛ aseɛ pralaa so nyɔbotaen piri bo fɔnwoo ne.

³ Bɛ bɔ benwu nikyee ne, bɛ nye so ngɔyɛ bɛ wusiwusi, yeɛ bɛ bɔ bɛte dwirɛ ne, bɛ koso bekotie.

⁴ Bɛ bɔ bɛpere dwirɛ nwo ne, bekonya ndeaseɛ, yeɛ bɔ ɔtɔ mmɛberɛ ne wora, ye noa kɔte paa.

⁵ Bɛngɔfrɛ kwaseaa kyɛ sona bɔ odi mu ɔ ko, yeɛ bengobu nnakannakaniɛ kyɛ ɔfata anidie.

⁶ Ofikyɛ kwaseaa kekã ngwaseaa dwirɛ, na ɔdwene adwene tɛɛ bɔ ɔmaa ɔyɔ amumuyɛɛ ɔ, ɔkekã AWURADE nwo dwirɛ tɛɛ, ɔma bɔ ɛhɔen ku ye ɔ ye noa aleɛ bɔ ye, na ɔmma bɔ nzuhɔen ku ye ɔ nnya nzue nno.

⁷ Nnakannakaniɛ ye kanda nworɛ ne te bɔne, ɔbɔ porɛ tɛɛ kyɛ ɔkɔfa kanda nworɛ konya bɛ bɔ bɛyɛ anwumvo ɔ, ɔmva ye nwo kyɛ ehianiɛ ne ye dwirɛ yɛ fɛ ɔ.

⁸ Nakoso sona bɔ odi mu ne de, ɔdwene nningyein bɔ bedi mu ɔ nwo, na bɔ ɔyɔ amukoraa te paa.

Ɛfoen mmrasua

⁹ Ɛmɔ, mmrasua bɔ ɛmɔ so anu atɔ ɛmɔ ɔ, ɛ́mɔdwɔso bétie me! Mmaa mmrasua bɔ bɛ nwo atɔ bɛ ɔ, ɛ́mɔyɛ asoɛ bétie me noa dwirɛ.

¹⁰ Ɛmɔ, mmrasua bɔ ɛmɔ nwo atɔ ɛmɔ ɔ, kyɛ odwu afoɛ ko ne kãa bie ne, ahunundetelɛ kɔtɔ ɛmɔ so, ofikyɛ bobe ne ngosu, na ɛmɔngonya ye mma ngɔboaboa ye noa.

¹¹ Ɛmɔ, mmrasua bɔ ɛmɔ so anu atɔ ɛmɔ ɔ, ɛ́mɔma ɛmɔ nwo wosowoso ɛmɔ, ɛmɔ, mmrasua bɔ ɛmɔ nwo atɔ ɛmɔ ɔ, ɛ́mɔma ɛmɔ kunu tete ɛmɔ, ɛ́mɔdwa ɛmɔ tena bégua bɛ́ma ɛmɔ nwo la so, ná ɛmɔfa ɛsɛen tena bɛ́pɛ ɛmɔ bo.

¹² Ɛ́mɔfa ɛmɔ sa bégua ɛmɔ ahone so beli ɛhemɔ anwo aworabɔlɛ: ɛmɔ boo nyemenenyemene ne,, ɛmɔ bobe bɔ osu dɔsɔɔ ne,

¹³ agurɛ ne mmowue bɔ befifi me maen aseɛ ne aso, yoo, anigye awuro amukoraa bɔ ɔwɔ anigye kuro ne anu ne.

¹⁴ Ofikyɛ ahemvie ne kɔkakyi dandue, kuro bɔ nu mmenia worawora ne, bekotu bekofi so; na ye pambaa ne ye abandenden kɔkakyi ngaka atenaleɛ daa, ɔkɔyɛ anika atenaleɛ kɔma eburo afunum mɔ, ɔne nekaa bɔ nyɛmmoa bedidi ɔ,

¹⁵ kɔpem kyɛ bekofi anwuro bekohwie Sunzum ne bekogua yɛ so, kɔpem kyɛ ɛserɛ so kɔkakyi aseɛ bɔ ɔkye aleɛ ɔ, ɔne kyɛ bekobu aseɛ bɔ ɔkye aleɛ kyɛ ɛhɔayeɛ ɔ.

¹⁶ Na afei pɛpɛɛpɛyɛlɛ kɔwa ɛserɛ so, yeɛ tenenee kɔtena aseɛ bɔ ɔkye aleɛ ne aso.

¹⁷ Ɔnate tenenee so asomdwee kɔwa, na tenenee kɔfa bɛ soanutɔlɛ ne bɛ nwo waenbɔlɛ kɔwa afebɔɔ.

¹⁸ Me maen kɔtena asomdwee atenaleɛ, anwotɔ atenaleɛ nu, ɔne nwomelelɛ atenaleɛ konn nu.

¹⁹ Na sɛ asukɔtwea tɔ gua ɛhɔayeɛ ne aso maa ɔsɛkye, ná bedwiri kuro ne begua a,

²⁰ ɛmɔ bɔ ɛmɔdua nningyein wɔ nzue mukoraa nwo ne, ɛmɔkonya saleɛ, ɛmɔ bɔ ɛmɔyakyi nandwie ne afunum mɔ maa bɛ bɔbɔ bɛkɔ adidie ne.