Yesaya 31 - AHYERƐLƐ KRONGRON

¹ Bɛ yaakɔ, bɛ bɔ bɛkɔ Misraim bɛkɔpena mmokalɛ, bɔ bɛfa bɛ nye bɛto mbɔngɔ so, bɔ ɔnate teaseɛnam mɔ bɛ somaa ti bɛfa bɛ wora bewura bɛ nu, bɔ ɔnate pɔngɔhanɛfoɛ mɔ b’anwoserɛ ti bɛfa bɛ wora bewura bɛ nu, nakoso bɛmva bɛ nwo bɛndo Yisrael Krongronniɛ ne so ɔ, anaakyɛ bɛmbena AWURADE si atee ɔ.

² Nakoso ɔte nworɛniɛ, na ɔkɔma musue kɔwa, ɔkã dwirɛ a ɔndwe nza, okodwɔso kotia bɔnefoɛ awuro ne bɛ bɔ bedi bɛboka amumuyɛɛfoɛ ɔ.

³ Misraimfoɛ bɛte mmenia oo, na bɛtte Nyameɛ; bɛ mbɔngɔ nemɔ bɛte anwoɔnaen, na bɛtte sunzum. Sɛ AWURADE tengyɛ ye sa a, bokafoɛ ne kosoti, yeɛ bɔ bokafoɛ ne boka ye ne koso, okofi ase, na bɛ mukoraa bekowu bɛkɔbɔ nu.

⁴ Ofikyɛ AWURADE sele me kyɛ: Kyɛbɔ gyata anaa gyata akrɔngrɔma ɔyɛ ye komvi hoohoo gua naen bɔ wahye ye ɔ so, bɔ mmoaenneafoɛ kure bɛba ye so a onzuro kyɛ bɛteatea nu begua ye so, anaakyɛ ɔndɛ b’anwunanwuna ne aso ne, sɔ ala yeɛ Asafo AWURADE kodwu kɔwa kɔɔho koɛ wɔ Sion bokaa ne ye pambaa ne aso ɔ.

⁵ Kyɛbɔ nnomaa betu bɛbɔ mborɔkaa ne, sɔ ala yeɛ Asafo AWURADE kɔbɔ Yerusalem nwo waen ɔ; ɔkɔbɔ ye nwo waen okole ye, okogyina ye si, na ɔkɔpepɛ kole ye.

⁶ O Yisraelfoɛ, ɛmɔsa bɛbra bɔ ɛmɔayɛ ye nwo lɔen piri paa ne berɛ.

⁷ Ofikyɛ sɔ kyẽa ne, ɛdwetɛ amoen ne sikaa kɔkorɛ amoen bɔ ɛmɔyɔ bafa, maa ɔnate so ɛmɔayɔ bɔne ne, ebiala kofindi kogua.

⁸ “Afei, Asiria kɔtɔ ngrandɛ bɔ nna sona deɛ ahɔ ɔ ye noa, ngrandɛ bɔ nna sona yeɛ otira ɔ okohu ye, ɔkɔnwati kofi ngrandɛ ne noa, na bɛkɔhyɛ ye mmerandeɛ maa bɛkɔyɔ nhyɛsoɛ adwuma.

⁹ Ɛserɛ kɔmaa ɔkɔnwati kofi ye anwoserɛ afealeɛ nu, yeɛ ahunundetelɛ kɔma ye safohene mɔ bɛkɔnwati bɛkɔyakyi bɛ frangaa berɛ.” AWURADE bɔ ye see wɔ Sion, bɔ ye foonoo wɔ Yerusalem ne, ye noa dwirɛ ɛne.