Yesaya 3 - AHYERƐLƐ KRONGRON

Basabasayɔlɛ wɔ Yerusalem

¹ Ɛ́mɔtie! AWURADE, Asafo AWURADE ɔbaaye ɛhemɔ fi Yerusalem ne Yuda: pɔmaa ne bakaa biala bɔ bekisa ye ɔ, aleɛ biala ne nzue biala,

² katakyie ne koɛhonɛniɛ, ndɛenbualɛniɛ ne ngɔmhyɛlɛniɛ, nworɛniɛ ne panyi,

³ aburannu so safohene ne animnyamniɛ, foɛtulɛniɛ ne ngonyaayelɛniɛ bɔ wabe, yeɛ ndafowayelɛniɛ.

⁴ Ngɔmaa mmɛɛmaa koli bɛ so mbanyi, na nnɔma koli bɛ so.

⁵ Mmenia kɔhyɛ bɛ mmango so, bɛkɔhyɛ bɛ biɛngo so, ebiala kɔhyɛ obiɛngo so. Mmerandeɛ ne ndaluwa bɛ nye ngɔsɔ mbanyi, yeɛ kwahweabaa koso ye nye ngɔsɔ animnyamniɛ.

⁶ Sɔ mmerɛ ne, ebie kɔsɔ oliɛma bɔ ofi ɔse abusua nu ɔ nu, na okose ye kyɛ, “Wɔ yeɛ ele tena ɔ, yiti da yɛ noa yɛ yɛ so panyi, ná fa sɔ anwokyere kandinga he to wɔ nwo so.”

⁷ Nakoso ko ne kɔtea nu sɔ kyẽa ne kose kyɛ, “Daabi, mengonya ɛhawo he anwo sɔbea oo, aleɛ anaa ɛtena biala nne m’awuro, yiti nnɛma ɛmɔfa me bedi mmenia ne aso panyi.”

⁸ Yerusalem asoti, yeɛ Yuda afi ase, ofikyɛ bɛfa bɛ dwudwolɛ ne bɛ yɔleɛ bedwɔso betia AWURADE, kyɛ bɛfa bebu ye animnyam anyunuɛ ne animtia.

⁹ Kyɛbɔ basi bayɛ bɛ nyunu ne, odi adanzeɛ tia bɛ, bɛbɔ bɛ bɔne nwo dawure kyɛ Sodom, bɛmva bɛmvea. Bɛ kra yaakɔ! Ofikyɛ bahwehwe musue babrɛ bɛ nwo.

¹⁰ Ɛmɔhã behyire teneneefoɛ kyɛ okoyie bɛ yé, ofikyɛ bɛ sa kɔhã bɛ yɔleɛ paa nwo akatuaa.

¹¹ Nakoso bɔnefoɛ de, ye yaakɔ! Ye ayieleɛ te musue, ofikyɛ ye bɔne yɔleɛ ne, bɛkɔyɔ bie bekotua ye so kerɛ.

¹² Ngwadaa yeɛ bɛhyɛ me maen so ɔ, na mmrasua yeɛ bedi bɛ so panyi ɔ. O me maen, wɔ mbanyi mɔ lakalaka wɔ maa edi makyebu fi w’atimbire so.

¹³ AWURADE adwɔso bɔ ɔbɔ kwaadu, wagyina berɛ obua maen ne ndɛen.

¹⁴ AWURADE baabua ye maen mbanyi ne ahemvo ndɛen, kyɛ, “Ɛmɔ, ɛmɔ yeɛ ɛmɔali bobe boo ne ɔ, ehiafoɛ nningyein bɔ ɛmɔasisi bɛ bale ne, ogua ɛmɔ awuro.

¹⁵ Ɔwale ye sɛ bɔ ɛmɔadufudufu me mmenia sɔa, bɔ ɛmɔadwiridwiri ehiafoɛ bɛ nyunu sɔa e?” AWURADE, Asafo NYAMEƐ ne, ye noa dwirɛ ɛne.

¹⁶ Asa koso, AWURADE hane kyɛ, Ɔnate kyɛ Sion mma mmrasua te ahandaen, bɛ kɔme la bɛ nwo, bɛtwetwe bɛ nye asi bɛnate, bɛyeye bɛ gya ngoko ngoko, ná bɛma ngaa bɔ ogua bɛ gya wosowoso ne ati,

¹⁷ AWURADE kɔma Sion mma mmrasua bɛ ti so kotutu ngena, na AWURADE kɔpa bɛ nwo.

¹⁸ Sɔ kyẽa ne, AWURADE kopuropuro bɛ gya ngaa nyemenenyemene ne, bɛ duku, b’afire,

¹⁹ bɛ mbembenanneɛ, bɛ sa kɔm ngaa, yeɛ bɛ kɔme anu duku ne;

²⁰ b’abotire, bɛ mbɛteaa, b’abɔsoɛ, sakyeɛfona towaa, ɔne b’asomade ne;

²¹ bɛ mbɛteaa ne bɛ bonyi anu mbɔkoaa;

²² bɛ kende, bɛ ndena, b’aguasoɛ, ɔne sikaa kotoku ne;

²³ bɛ neanu, bɛ nwera, bɛ ti so ngatasoɛ ne, ɔne ngatanyunu ne.

²⁴ Na ɔkɔwa kyɛ, bɛ nwo fona ne kɔkakyi mvamva, bɛkɔfa nyamaa bɛkɔkakyi b’abɔsoɛ, bɛ ti bɔ babɔ ye nyemenenyemene ne, ɔkɔkakyi tikwa, bɛ kende ne kɔkakyi ɛsɛen tena, na bɛ nwonaen nyemene ne, okotwindwam.

²⁵ Wɔ mmienzua kɔtotɔ ngrandɛ noa, yeɛ wɔ mmienzua ahoneserɛfoɛ kɔtotɔ wɔ koɛ nu.

²⁶ Ye pambim nemɔ kosũ kɔbɔ awuye, bɛkɔla berɛ too, na kuro ne kɔtɔ ase.