Yesaya 29 - AHYERƐLƐ KRONGRON

Pɔfoɛ tua Dawide kuro ne

¹ Ariɛl, Ariɛl, kuro bɔ Dawide ɔɔtenane so ne, wɔ yaakɔ oo! Afoɛnoa afoɛnoa biala, ɛ́mɔli aluolue nemɔ,

² nakoso ngɔma Ariɛl kɔhɔ anwokyere nu, ɔkɔyɛ esuɛ ne awuyebɔlɛ, na ɔkɔyɛ kyɛ Ariɛl kɔma me.

³ Ngotua wɔ ngɔbra ngoyia, ngosisi abandenden ngɔpɛ wɔ nwo ngɔbra ngoyia, na ngɔkyekye nyinasoɛ bɔ bɛkɔfo so bɛkɔhɔ kuro ne anu ɔ.

⁴ Ɛkɔtɔ ase, na ekofi aseɛnwo kodwudwo, aseɛnwo mvuture nu yeɛ wɔ dwudwolɛ kofi kɔwa ɔ, wɔ komvi kɔyɛ kyɛ sunzum bie deɛ kofi aseɛnwo kɔwa, na wɔ dwudwolɛ bɔ ofi mvuture nu kɔwa ne, ɔkɔyɛ kyɛ etu asure ɔ.

⁵ Asa koso, wɔ pɔfoɛ worawora nemɔ, bɛkɔyɛ kyɛ mvuture, yeɛ atianuserɛfoɛ worawora ne, bɛkɔyɛ kyɛ afafu bɔ mvrama bɔ ye kɔ ɔ. Na ɔkɔwa mvum nu.

⁶ Asafo AWURADE kɔɔpasa wɔ nwo: Ɔkɔfa agralaa, aseɛwosolɛ ne dededede kandinga, mvrama bɔ ɔpɛ ye nwo, mvrama piri ne see wuronyiwuronyi yeɛ ɔkɔwa ɔ.

⁷ Na maen maen pee mukoraa bɔ bɛfa koɛ bɛteta Ariɛl ne, bɛ mukoraa bɔ bɛfa koɛ bɛteta ye ne ye anwoserɛ afealeɛ bɔ bɛmaa onwu amaneɛ ne, bekotu bekomini kyɛ laleɛ, kyɛ kɔngɔen nyekyire bie.

⁸ Na sona bɔ ɛhɔen ku ye, kyɛbɔ ɔkye laleɛ a né odidi, nakoso otingye a né ɛhɔen tɛ ku ye ne, anaakyɛ, sona bɔ nzuhɔen ku ye, kyɛbɔ ɔkye laleɛ a né ɔno nzue, nakoso otingye a né nzuhɔen ahu ye ama ye komvi awo ne, sɔ ala yeɛ ɔkɔto maen maen pee amukoraa bɔ bɛfa koɛ bɛteta Sion bokaa ne ɔ.

⁹ Ɛ́mɔma ɔyɛ ɛmɔ nwanwa ná ɛmɔ nwo dwiri ɛmɔ, Ɛ́mɔmuamua ɛmɔ nye ma ɛmɔ nye si! Babobo, nakoso nna nzaa yeɛ bano ɔ, Bɛnate fofalifofali, nakoso nna nzaa serɛ yeɛ bano ɔ.

¹⁰ Ofikyɛ AWURADE afa nnafelɛ hatee sunzum wato ɛmɔ so, ɛmɔ nye bɔ yeɛ ɔte ngɔmhyɛlɛfoɛ ne, wamuamua ye, ɛmɔ ti bɔ yeɛ ɔte mmenia bɔ bɛse ase ne, wamundu so.

¹¹ Nyekyire he amukoraa, wakakyi ɛmɔ nye so kyɛ edwirɛ bɔ ɔwɔ nwomaa bɔ nzɔanoɛ sɔ ye noa ɔ nu. Sɛ bɛfa bɛma ebie bɔ ɔse nwomaa kyɛ, “Mesrɛ wɔ, kenga ɛhe” a, ɔkã kyɛ, “Mengɔhora, ofikyɛ nzɔanoɛ sɔ ye noa.”

¹² Yeɛ sɛ bɛfa bɛma ebie bɔ ɔnze nwomaa kyɛ “Mesrɛ wɔ kenga ɛhe” a, ɔkã kyɛ, “Menze nwomaa.”

¹³ Na AWURADE sele kyɛ, “Maen he, bɛfa bɛ noa mbaen yeɛ bɛtwe bepingye me ɔ, bɛ noa mbaen yeɛ bɛfa bedi me ni ɔ, nakoso b’ahone nu de, bembingye me koraa, na esurolɛ bɔ besuro me ne, ɔte kuro sona ahyɛdeɛ bɔ basua ye mbaen ɔ;

¹⁴ yiti, tie, ngɔhɔ so ngɔyɔ nikyee bɔ ɔyɛ nwanwa bɔ ɔkɔma me maen he nwo kodwiri ye ɔ. Bɛ nworɛfoɛ nemɔ, bɛ nworɛ kɔyɛ mbaen, na bɛ badwemma mɔ bɛ nworɛ ne, so kɔkata.”

¹⁵ Bɛ yaakɔ, bɛ bɔ bɛfa bɛ nhyehyɛleɛ bɛfea AWURADE fee ɔ, bɛ bɔ bɛyɔ bɛ yɔleɛ wɔ awosii nu, bɔ bɛkã kyɛ, “Nwa yeɛ onwu yɛ ɔ? Nwa yeɛ ɔse yɛ ɔ?”

¹⁶ Ɛmɔasisi nningyein ti ase, bɔ ɛmɔbu ngukuenwonɛniɛ ne kyɛ ɔne ɛfaa bɛte pɛ ɔ! Aso bua kɔhora kose sona bɔ ɔnwone ye ne kyɛ, “Nna ye yeɛ ɔnwone me ɔ”? Anaakyɛ, nikyee bɔ banwo ne, ɔkɔhora kose sona bɔ wanwo ye ne kyɛ, “Olle nimdeɛ huu”?

¹⁷ Aso nna mmerɛ kãa bie yeɛ waha ɔ bɔ Lebanon kɔkakyi aseɛ bɔ ɔkye aleɛ ɔ, bɔ bekobu aseɛ bɔ ɔkye aleɛ koso kyɛ ɛhɔayeɛ ɔ?

¹⁸ Sɔ kyẽa ne, asotiniwaaniɛ kɔte nwomaa ne anu dwirɛ, na anyesiniwaafoɛ bɛ nye kofi awosii kabii nu konwu nikye.

¹⁹ Na mmenia bɔ bedwo ne, bekonya AWURADE nu anika pee, na mmenia nu ehiafoɛ bekoli ahurusi wɔ Yisrael Krongronniɛ ne anu.

²⁰ Ofikyɛ atianuserɛfoɛ bɛ boso konua, ngorohoɛfoɛ bekowuwu bɔkɔɔ, na bekohu bɛ bɔ bɛbɔ porɛ tɛɛ amukoraa:

²¹ bɛ yeɛ bɛ noa dwirɛ ma sona di fɔ, besua bɛ bɔ bedi dwirɛ ɔ ngaen, na bɛfa ngondombo atee so bebua ndɛengyea.

²² Yiti AWURADE bɔ olele Abraham ne, bɔ ɔkã fa Yakob boso ama nwo ɛhe: “Yakob nyunu ngogua ase ko, ye nyunu ngɔyɛ anwumvoin anwumvoin ko.

²³ Na sɛ onwu ye mma, me sa noa adwuma ne wɔ ye nu a, bekobu me dumaa ne krongron, bekobu Yakob Krongronniɛ ne krongron, na bekosuro Yisrael Nyameɛ ne.

²⁴ Bɛ bɔ bali sunzum nu makyebu ne, bekonya ndeaseɛ, na bɛ bɔ bɛpenepene bɛ komvi ne, bekosua ngyerɛkyerɛ.”