Yesaya 28 - AHYERƐLƐ KRONGRON

Nyameɛ bɔ Samaria kɔkɔ

¹ Wɔ yaakɔ, Efraim akɔnomnzafoɛ anwomasoɛ abotire ne, ɔne ye nyerɛen nyemenenyemene bɔ ye nyemene gu so okyikyi ne, abotire bɔ ɔwɔ bɔnza bɔ ɔkye aleɛ ne ti afia, akɔnomnzafoɛ bɛ kuro ne!

² Ɛ́mɔtie, AWURADE le ebie bɔ ɔte anwoserɛniɛ ne katakyie ɔ; ɔte kyɛ asukɔtwea bɔ ɔtɔ gua ɔ, mvrama piri bɔ ɔsɛkye nikye ɔ, ɔte kyɛ asue bɔ wayi bɔ opia nningyein kɔ ɔ, na ɔkɔfa ye sa kogyi ye kɔto aseɛ so.

³ Na bekotiatia Efraim akɔnomnzafoɛ anwomasoɛ abotire ne aso;

⁴ bɛ ne ye nyerɛen nyemenenyemene bɔ ye nyemene gu so okyikyi, bɔ ɔwɔ bɔnza bɔ ɔkye aleɛ ne ti afia ne. Bɛkɔyɛ kyɛ borɔdoma mmaa bɔ bekoli moa bɛkɔboro koraka né borɔdoma telɛ adwu ɔ. Sona biala bɔ okonwu ye ne, ɔte ala a né wali.

⁵ Sɔ kyẽa ne, Asafo AWURADE kɔyɛ animnyam abotire ne ahemvo kyerɛ nyemenenyemene kɔma ye mmenia bɔ baha ne.

⁶ Ɔkɔyɛ ndɛenbualɛ pɛpɛɛpɛ sunzum wɔ sona bɔ obua ndɛen ɔ nu, yeɛ ɔkɔyɛ anwoserɛ kɔma bɛ bɔ bɛfoa koɛhonɛfoɛ mɔ befi kuro pambim nu maa besa bɛkɔ ɔ.

⁷ Sɔ mmenia hemɔ koso, bɛfa nzaa bebia, na nzaa serɛ maa bɛnate fofalifofali: Asɔfo mɔ ne ngɔmhyɛlɛfoɛ bɛfa nzaa serɛ bebia, nzaa ama b’adwene ayɛ nwunyaenn, nzaa serɛ maa bɛnate fofalifofali, bɛyɛ mvomsoɛ wɔ nyekyire nu, na bɛ ndɛenbualɛ ɔtte mayee.

⁸ Ɛpoen nemɔ amukoraa so ayɛ ɛfeɛ ngome, neka fee nne berɛ bɔ efiɛ nne berɛ ɔ.

⁹ “Nwa yeɛ okohyire ye nimdeɛ ɔ? Nwa yeɛ okohyirehyire ngyerɛkyerɛ ne anu kohyire ye ɔ? Bɛ bɔ bapɛ bɛ nyɔfone anaa? Bɛ bɔ bate bɛ bafi nyɔfone noa anaa?

¹⁰ Ofikyɛ ahyɛdeɛ tia ahyɛdeɛ, ahyɛdeɛ tia ahyɛdeɛ, edwirɛ tia edwirɛ, edwirɛ tia edwirɛ, ɛwa kãa, yeɛ dɔ kãa”

¹¹ Nahorɛ nu, pɔtɔfoɛ dwudwolɛ ne maen bie aso dwudwolɛ yeɛ ɔkɔfa so kodwudwo kohyire sɔ maen he ɔ.

¹² Maen he yeɛ osele ye kyɛ, “Ɛhe te nwomelelɛ, Ɛ́mɔma bɛ bɔ bafɛ ne bele bɛ nwome; ɛwa te nekaa bɔ ɔte asomdwee ɔ.” Nakoso bandie ye dwirɛ ne.

¹³ Ɔnate sɔ ati, AWURADE dwirɛ ne kɔyɛ bɛ so anu: ahyɛdeɛ tia ahyɛdeɛ, ahyɛdeɛ tia ahyɛdeɛ, edwirɛ tia edwirɛ, edwirɛ tia edwirɛ, ɛwa kãa, yeɛ dɔ kãa” Yiti bɛkɔhɔ bɛ nyunu moa, na bekofi ase bɛkɔtɔ nziɛ, bekopura, bɛkɔtɔ ngaen nu, ná bahye bɛ nnure bahɔ.

¹⁴ Yiti ɛmɔ, ngorohoɛfoɛ, bɔ ɛmɔdi maen he aso wɔ Yerusalem ɔ, ɛ́mɔtie AWURADE noa dwirɛ!

¹⁵ Ofikyɛ ɛmɔnwa, “Yɛne ewue ayɛ apam, yɛne ɛborɔ yayɛ nhyehyɛleɛ, sɛ mbire bɔ ye noa yɛ yea tra so ne ɔbaapɛ nu a, ongonya yɛ ngofi yɛ, ofikyɛ yafa kanda yayɛ yɛ afealeɛ, yeɛ yafa nnakannaka yabɔ yɛ nwo waen.”

¹⁶ Yiti AWURADE Nyameɛ nwa nyoo: “Ɛ́mɔtie, méfa nyɔboɛ bie méto fapem wɔ Sion, nyɔboɛ bɔ maso manea, ndweasoɛ nyɔboɛ bɔ ye nyɔboɛ yɛ se bɔ otimu berɛ pindinn ɔ: ‘Ebiala bɔ ɔkɔfa ye nwo kɔto so ne, ɔngɔte ngɔtɔ.’

¹⁷ Ngɔma pɛpɛɛpɛyɛlɛ kɔyɛ asusudeɛ nyamaa, yeɛ ngɔma tenenee kɔyɛ tonyi; asukɔtwea koopia kanda afealeɛ ne kɔhɔ, na nzue koyi kɔfa afealeɛ ne.”

¹⁸ Afei ɛmɔ ne ewue b’apam ne, okokyikyi kofi berɛ, ɛmɔ ne ɛborɔ bɛ nhyehyɛleɛ ne, ongogyina. Na sɛ mbire bɔ ye noa yɛ yea tra so ne ɔbaapɛ nu a, okohwi kɔfa ɛmɔ so.

¹⁹ Mmerɛ biala bɔ ɔbaapɛ nu ne, ɔkɔhye ɛmɔ, ofikyɛ ɔkɔɔpɛ nu ngyerɛmɔ biala, eyia ne kɔngɔen koso ɔkɔɔpɛ nu, Na ɔkɔyɛ ɛmɔ ahunundetelɛ kyɛ ɛmɔkɔte edwirɛ he abo ɔ.

²⁰ Ofikyɛ mba ne te tika bɔ sona ngora ye nu tengyɛ wɔ so ɔ, yeɛ dabua ne te teamaa bɔ ɔnzo sona nwo gurɔ ɔ.

²¹ Ofikyɛ AWURADE kodwɔso kyɛbɔ ɔyɔle ye wɔ Perasim bokaa ne aso ne, ye ahone kohu kyɛbɔ ɔyɔle ye wɔ Gibeon bɔnza ne anu ne, amaa ɔnate so wahyire ye tumi, ye anwanwadeɛ tumi ne, ná wayɔ ye adwuma, ye anwanwadeɛ adwuma ne!

²² Yiti nnɛma ɛmɔdi ngorohoɛ ko, anyɔ a, bekomia ɛmɔ panwu ne anu; ofikyɛ mate ehuhunɛ pasaa nwo dwirɛ mafi Asafo AWURADE Nyameɛ berɛ, kyɛ, ɔkɔmaa ɔkɔto aseɛ amukoraa.

²³ Ɛ́mɔyeye bɛ so anu bétie bɔ mekã ye; ɛ́mɔyɛ asoɛ bétie me dwirɛ ne.

²⁴ Aso daa biala yeɛ kuaniɛ ofundam aseɛ dua nningyein ɔ? Aso daa biala yeɛ otutu ye aseɛ ne ofurofuro nu ɔ?

²⁵ Sɛ osiesie aseɛ ne maa ɔda so frɛtɛɛ a, aso ongua ɛmeɛ, ɔndo ɛkaberɛ mbete, aso onnua atokoɔ ɔnza ye folii wɔ so, aso ɔmva ayuo mmobɔ nu, aso onnua aburoo wɔ eboo ne noa?

²⁶ Ofikyɛ ye Nyameɛ ahyirehyire ye, na okyire ye bɔ odi kyɛ ɔyɔ ɔ.

²⁷ Bɛmva ndaboa bɔ bɛboro so aburoo ɔ bɛndete ɛmeɛ, yeɛ bɛmva teaseɛnam bendwi bɛmva ɛkaberɛ so, na mmom mbapaa yeɛ bɛfa bɛtete ɛmeɛ ɔ, yeɛ bɛfa bakaa ba yeɛ bɛboro ɛkaberɛ ɔ.

²⁸ Kuaniɛ otĩ ayuo yeɛ ɔfa yɛ paanoo ɔ, yiti onhia kyɛ ɔkɔboro ayuo ne kɔhyɛ ɔ. Na sɛ ɔfa ye teaseɛnam mɔ bɛ gya otwi fa so, ná ɔma ye mbɔngɔ natenate so a, ondi ayuo ne.

²⁹ Ɛhe koso ofi Asafo AWURADE berɛ, ye foɛtulɛ te nikyee bɔ ɔyɛ nwanwa, na ye nworɛ ne te piri paa.