Yesaya 24 - AHYERƐLƐ KRONGRON

AWURADE kɔsɛkye aseɛ

¹ Tie, AWURADE kɔsɛkye aseɛ maa ɔkɔla berɛ mbaen, okobutu aseɛ nye ase, ná wabɔ so ama wasande.

² Na ɔkɔwa kyɛ, bɔ ɔkɔto mmenia ne, sɔ ala yeɛ ɔkɔto ɔsɔfo ɔ; bɔ ɔkɔto kanganiɛ ne, sɔ ala yeɛ ɔkɔto ye mene ɔ; bɔ ɔkɔto afaneɛ ne, sɔ ala yeɛ ɔkɔto ye mene brasua ɔ; bɔ ɔkɔto sona bɔ ɔtɔ nningyein ne, sɔ ala yeɛ ɔkɔto bɔ ɔyɛ ye atɔen ɔ; bɔ ɔkɔto sona bɔ ɔbɔ bosea ne, sɔ ala yeɛ ɔkɔto bɔ obisa bosea ɔ; bɔ ɔkɔto sona bɔ bɛma ye kerɛ ne, sɔ ala yeɛ ɔkɔto bɔ ɔma kerɛ ɔ.

³ Aseɛ kɔsɛkye pasapasa, bɛkɔfẽ so nningyein bɔkɔɔ, ofikyɛ AWURADE noa dwirɛ ɛne.

⁴ Aseɛ di aworabɔlɛ, na watwindwam, ewiase ayɛ bosaa, na watwindwam, aseɛ so atitirefoɛ bayɛ bosaa.

⁵ Efiɛ ahã aseɛ ye, so ama bɛ yɔleɛ ti, ofikyɛ bato mmeraa ne, batu ahyɛdeɛ ne bagua, yeɛ babu apam afebɔɔ ne aso.

⁶ Ɔnate sɔ ati, musue ahã aseɛ, na so ama benwu amaneɛ. Yiti aseɛ so ama bɛ́yera, na waha mmenia kaaba bie.

⁷ Ndungum bɔ awuye, bobe ayɛ bosaa, na bɛ bɔ né bɛgye bɛ nye ne amukoraa, bɛ wora abɔ.

⁸ Akasaa nu ahurusililɛ ne, bɛnde ye ko, bɛ bɔ bɛ nye gye ne, bɛ ndeateamuɛ ne bo apɛ, sangoo nu ahurusililɛ ne, bɛnde ye ko.

⁹ Bɛ́no nzaa a bɛndo dwein ko, na nzaa serɛ yɛ bɛ bɔ bɛno ne weewee.

¹⁰ Kuro bɔ so te basabasa ne, badwiri bagua, batoto awuro biala nu bɔ sona biala ngora nwura nu ɔ.

¹¹ Mmenia teatea nu bɛpena nzaa wɔ mmorɔnoɛ nemɔ aso, anigye amukoraa bo apɛ, yeɛ aseɛ so anika atu amini.

¹² Kuro ne akakyi kurofoen, babubu ye pambim nemɔ bagua gyirigorɔɔ.

¹³ Sɔ ala yeɛ okosi aseɛ so wɔ maen maen mɔ nu ɔ. Ɔkɔyɛ kyɛ olive bakaa bɔ baporo ye mma bagua ɔ, anaakyɛ bobe bɔ bate ye mma maa waha ye si kãa bie ɔ.

¹⁴ Bɛ de, bɛkɔma bɛ komvi so bɛkɔto anigye dwein, bɛkɔtea nu bekofi ɛpo so bɛkɔye AWURADE animnyam ayɛ.

¹⁵ Yiti ɛ́mɔye AWURADE ayɛ wɔ eyia afiteleɛ, ɛpo nu supɔ mɔ so koso, ɛ́mɔye AWURADE Yisrael Nyameɛ ne dumaa ayɛ.

¹⁶ Yɛte ayɛyelɛ dwein yɛfi aseɛ so nekaa biala kyɛ, Animnyam hã Teneneeniɛ ne. Nakoso ngane kyɛ, “Mawu oo, mawu oo, edwirɛ ato me oo! Nnakannakafoɛ begu so bɛlakalaka, nnakannakafoɛ bɛ nnakalɛ ne wayɛ piri.”

¹⁷ Wɔ bɔ ɛte aseɛ ye aso ɔ, ahunundetelɛ ne kumaa ne ngaen la berɛ ma wɔ!

¹⁸ Na ɔkɔwa kyɛ, sona bɔ ɔte ahunundetelɛ ne nga, ná ɔnwati ne, ɔkɔɔtɔ kumaa ne anu, yeɛ bɔ okofi kumaa ne anu kɔfo kɔwa ne koso, ngaen ne kɔhye ye. Ofikyɛ nyameɛso mboma nemɔ abukyebukye, na aseɛ nyinasoɛ nemɔ bɛwosowoso.

¹⁹ Edwirɛ piri ato aseɛ paa, aseɛ nu adwudwa, aseɛ ye apusu piri paa.

²⁰ Aseɛ nate fofalifofali kyɛ akɔnomnzaniɛ, ɔwosowoso kyɛ namue, ye mmeraatolɛ nwo asohwenɛ kandinga la ye so, na okodwiri kogua bɔ ongodwɔso ko ɔ.

²¹ Na ɔkɔwa kyɛ, sɔ kyẽa ne, AWURADE kɔhwe anwuro abɔdeɛ mɔ bɔ bɛwɔ ewienu ɔ bɛ so, yeɛ ɔkɔhwe aseɛ so ahemvo mɔ bɔ bɛwɔ aseɛ so ɔ bɛ so.

²² Ɔkɔboaboa bɛ mukoraa noa kyɛbɔ bɛboaboa kukunufoɛ noa wɔ kumaa nu ɔ, ɔkɔto bɛ nu wɔ kuku nu, na ngyẽa pee asi ne, ɔkɔhwe bɛ so.

²³ Na afei ɛsraen kɔfɛre, yeɛ eyia nyunu kogua ase, ofikyɛ Asafo AWURADE koli hene wɔ Sion bokaa ne aso ne Yerusalem, na ɔkɔye ye animnyam ali wɔ ye mbanyi mɔ nyunu.