Yesaya 22 - AHYERƐLƐ KRONGRON

Yerusalem nwo nyekyire

¹ Edwirɛ bɔ ɔfa Bɔnza nyekyire ne nwo. Nzikyɛ dwirɛ yeɛ wato wɔ ɔ bɔ wɔ nu ama mukoraa bafo bahɔ sua ti afia ye?

² Kuro bɔ esebɔlɛ ayi wɔ tɛkyɛ, kuro bɔ nu te dede, bɔ anigye wɔ nu ɔ! Wɔ nu mmenia bɔ batotɔ ne, bandotɔ ngrandɛ noa, yeɛ banwu koɛ nu.

³ Wɔ mbanyi amukoraa babɔ nu banwati, bamva agyaen yeɛ bɛhyele bɛ ɔ. Wɔ mmenia amukoraa bɔ benwuni bɛ ne, bɛhyele bɛ, ɔwɔ nu kyɛ bɛnwatili bɛhɔle dedeede de.

⁴ Yiti yeɛ ngane kyɛ, “Ɛ́mɔyakyi me, ɛ́mɔma nzu hahii, nnɛma ɛmɔha bɛ nwo kyɛ ɛmɔkɔkyekye me wora wɔ edwirɛ piri bɔ wato me maen awa brasua ne anwo.”

⁵ Ofikyɛ ɔte Asafo AWURADE ye kyẽa, bɔ ɔte amaneɛnwunɛ, ahunundetelɛ ne anyesotanɛ, wɔ Nyekyire Bɔnza ne anu, kyẽa bɔ bedwiri fasue mɔ begua, bɔ bɛbɔ awuye besu bɛfrɛ mmokaa mɔ ɔ.

⁶ Na Elam fale agyaen ndokue sini, ɔne teaseɛnam mɔ ne pɔngɔhanɛfoɛ bɛ́ba, yeɛ Kire waye akokyɛm wafite.

⁷ Teaseɛnam mɔ ayi wɔ bɔnza nyemenenyemene nemɔ anu to, yeɛ pɔngɔhanɛfoɛ koso bagyinagyina pambim ne anu.

⁸ Waye Yuda nwo waen ne wafi berɛ. Sɔ kyẽa ne, ɛmɔfale ɛmɔ nye bɛtole akodeɛ bɔ ogua sua bɔ bɛfrɛ ye Ɛhɔayeɛ nu Awuro ne aso.

⁹ Na ɛmɔnwuni kyɛ Dawide kuro fasue ne, wapakyepakye pee, na ɛmɔsesale aseɛnwo dɔ abura ne anu nzue besiele.

¹⁰ Ɛmɔhale Yerusalem sua nemɔ, na ɛmɔbubuli ebie beguale, kyɛ ɛmɔfa besuasua fasue ne maa onya anwoserɛ.

¹¹ Fasue nyɔ ne, ɛmɔpɛle abura wɔ b’afia maa nzue bɔ ɔwɔ ɛkwaa daa ne anu ooguale nu, nakoso bɔ ɔyɔle ɛkwaa ne de, ɛmɔammisa ye berɛ mmokalɛ, yeɛ ye bɔ ɔhyehyɛle ye dadadada ne, ɛmɔammu ye.

¹² Sɔ kyẽa ne, Asafo AWURADE Nyameɛ frɛfrɛle mmenia kyɛ besu bɛbɔ awuye, kyɛ bɛbɔ tikwa ná bɛhera ɛsɛen tena.

¹³ Nakoso nea: anwosɛpɛlɛ ne anigye, nandwie ne mmoaen hunɛ, naenlilɛ ne nzaanonɛ. (Na ɛmɔnwa) “Ɛ́mɔma yɛdidi ná yɛno, ofikyɛ ɛhema né yawu.”

¹⁴ Na Asafo AWURADE waye me asotire kyɛ, “Susu amba kyɛ, sɔ amumuyɛɛ ne ati, mengɔfa ɛmɔ nwo ngɔhyɛ ɛmɔ kɔpem mmerɛ bɔ ɛmɔkowu ɔ,” Asafo AWURADE Nyameɛ noa dwirɛ ɛne.

¹⁵ Asafo AWURADE Nyameɛ nwa, “Somvoɛ Sebena bɔ ɔte ahemvie berɛ neafoɛ ne, kɔ ye berɛ kose ye kyɛ,

¹⁶ Wɔ, nzikyɛ yeɛ ele ye yɔ wɔ wa ɔ? Nwa yeɛ wama wɔ sɔ tumi ne ɔ, bɔ yiti apɛ asieleɛ ato berɛ ama wɔ nwo wɔ ɛwa ɔ? Wɔ bɔ apɛ w’asieleɛ ato bokaa so, ná asa apɛ wɔ daberɛ ato nyɔbotaen nu ɔ?

¹⁷ Wɔ, anwoserɛniɛ, tie, AWURADE kofindi wɔ anyeborolɛ so kɔto nekaa bie. Ɔkɔsɔ wɔ nu bum,

¹⁸ okobri wɔ kyɛ aterɛ, na okofindi wɔ kyɛ bɔɔlo kɔto aseɛ tɛtrɛtɛɛ bie aso. Dɔ yeɛ ekowu ɔ, na teaseɛnam mɔ bɔ ɛfa hoahoa wɔ nwo ne koso, bɛkɔyɛ wɔ mene awuro animguaseɛ.

¹⁹ Ngɔye wɔ bo bia, na ngole wɔ dibea ne ngofi wɔ sa nu.

²⁰ Na ɔkɔwa kyɛ, sɔ kyẽa ne, ngɔfrɛ me somvoɛ Eliakim bɔ ɔte Hilkia awa ne,

²¹ ngɔfa w’ataadeɛ ne ngowura ye, ngɔfa w’abɔsoɛ ne ngɔbɔ ye, ngɔfa wɔ panyililɛ ne ngowura ye sa, na ɔkɔyɛ Yerusalemfoɛ ne Yuda awuro ama bɛ baba.

²² Ngɔfa Dawide awuro ama nzafoaa ne ngowura ye sa. Sɛ obukye a, ebiala ngɔto nu, yeɛ sɛ ɔto nu a, ebiala ngobukye.

²³ Ngɔfa ye ngɔpena berɛ kyɛ pɛmbɛen bɔ omi nekaa bɔ berɛ yɛ se ɔ, na ɔkɔyɛ animnyam bia kɔma ye baba awuro ama.

²⁴ Bɛkɔfa ye baba awuro animnyam amukoraa bekowura ye sa, ye bosofoɛ ne ye nnomaa, ngukue mmaa mmaa amukoraa, ofi kulie mɔ so kodwu bua amukoraa so.

²⁵ Asafo AWURADE nwa nyoo, sɔ kyẽa ne, pɛmbɛen bɔ omi nekaa bɔ berɛ yɛ se ne, ye bo kɔyɛ gɔhɔgɔhɔ, bɛkɔpɛ maa ɔkɔtɔ ase, na adesoa bɔ osinze so ne kɔsɛkye, ofikyɛ AWURADE noa dwirɛ ɛne.”