Yesaya 21 - AHYERƐLƐ KRONGRON

Babilɔn bɔlɛ nwo nyekyire

¹ Mboanoa ɛserɛ nwo nyekyire. Ngwaen dɔ mvrama bɔ ɔpɛ ye nwo ne, kyɛbɔ osi tu ba ne, sɔ ala yeɛ otu fi ɛserɛ so dɔ ba ɔ, ofi aseɛ bɔ so yɛ suro ɔ so.

² Nyekyire suronyisuronyi yeɛ nyane ye ɔ: Apaabɔlɛfoɛ nemɔ bɛbɔ apaa, yeɛ bɔ ɔsɛkye nningyein ne koso ɔsɛkye bɛ. O Elam, fo kɔ, O Media, tua kuro ne; aworabɔlɛ biala bɔ wamaa wawa ne, ngɔma ye bo kɔpɛ.

³ Yiti mete yealɛ wɔ me sisia nu, na ɔyɛ me yea te kyɛ brasua bɔ wafo aworɛ so ɔ. Edwirɛ bɔ ndele ne, ɔhale me, bɔ nwuni ye ne mane me nwo dwirili me.

⁴ M’adwene ayɛ me nwunyaenn, ahunundetelɛ atɔ me so; nɔsoa fɔnwoo bɔ ahaa me nye la so ne, wakakyi ahunundetelɛ wama me.

⁵ Ɛ́mɔto poen ne, ɛmɔwɛne wɔ abandenden ne aso, ɛ́mɔdidi, ɛ́mɔno. O safohene mɔ, ɛ́mɔdwɔso! Ɛ́mɔfa ngoo bɛ́popa akokyɛm ne!

⁶ Ofikyɛ AWURADE sele me kyɛ, “Kɔ, ma wɛmvoɛ ogyina berɛ, bɔ okonwu ye ne, maa ɔbɔ ye dawure.

⁷ Na onwuni teaseɛnam mɔ bɔ pɔngɔhanɛfoɛ nemɔ bɛte nyɔ nyɔ, bɔ mmenia tete afunum mɔ ne afupɔngɔ mɔ so ɔ, na ɔyɛle asoɛ tiele paa.”

⁸ Na wɛmvoɛ ne teane nu kyɛ gyata, kyɛ, “O AWURADE, ngyi fasue ye aso mewɛne daa biala, alehyeleɛ biala, ngyi nekaa bɔ megyina mewɛne ne.

⁹ Yieee, mmenia yeɛ bɛtete teaseɛnam mɔ nu bɛ́ba ye, pɔngɔhanɛfoɛ nemɔ bɛtete so nyɔ nyɔ!” Na osa teane nu sele kyɛ, “Babilɔn abɔ oo! wabɔ oo! Amoen amukoraa bɔ bɛte ye nyameɛ mɔ ne, babubu bɛ bagua aseɛnwo.”

¹⁰ Ao, wɔ bɔ maboro wɔ mahuhu wɔ so ɔ, edwirɛ bɔ mate mafi Asafo AWURADE, Yisrael Nyameɛ berɛ ne, mahã mahyire wɔ.

Edom nwo nyekyire

¹¹ Duma nwo nyekyire ɛhe: Ebie to me huuu fi Sɛre ose me kyɛ, “Wɛmvoɛ ee, kɔngɔen ne anu dwirɛ te sɛɛ? Wɛmvoɛ ee, kɔngɔen ne anu dwirɛ te sɛɛ?”

¹² Yeɛ wɛmvoɛ ne buale kyɛ, “Aleɛ kye ngyerɛmɔ, né alesaleɛ koso awa. Sɛ ɛmɔkobisa a, ɛ́mɔbisa; ɛ́mɔsa bɛbra, ɛmɔbra.”

Arabia nwo nyekyire

¹³ Arabia nwo nyekyire ɛhe: O Dedanimfoɛ bɔ bɛtete mbɔngɔ so betu atee ɔ, Arabia ɛhɔayeɛ nu yeɛ ɛmɔkosikye kɔngɔen ɔ.

¹⁴ O, ɛmɔ bɔ ɛmɔte Tema aseɛ so ɔ, ɛ́mɔfa nzue beeyia bɛ bɔ nzuhɔen ku bɛ ɔ, ɛ́mɔfa aleɛ beeyia mmenia bɔ bɛfoa bɛ ɔ.

¹⁵ Ofikyɛ banwati bafi ngrandɛ noa, ngrandɛ bɔ bahwe, agyaen bɔ bahwe ɔ nu, ɔne koɛ nwo suronyi noa.

¹⁶ Ofikyɛ edwirɛ he yeɛ AWURADE hã hyirele me ɔ: “Kyɛ odwu afoɛnoa ne, kyɛbɔ paaniɛ osi ka ye afoɛ pɛpɛɛpɛ ne, Kedare animnyam amukoraa kɔwa ayieleɛ.

¹⁷ Na Kedare agyaentolɛfoɛ ahoneserɛfoɛ kãa bie yeɛ bɛkɔha ɔ; ofikyɛ AWURADE Yisrael Nyameɛ noa dwirɛ ɛne.”