Yesaya 20 - AHYERƐLƐ KRONGRON

Asiria di Misraim ne Yitiopia so ngonim

¹ Afoɛ bɔ Asiria hene Sagon somane ye safohene maa ɔɔfale koɛ toale Asedɔde lili so ngonim ne,

² sɔ mmerɛ ne, AWURADE fale Amoso awa Yesaya so hane kyɛ, “Kɔye ɛsɛen tena bɔ afa apɛ wɔ bo ne gua berɛ, ná puropuro wɔ mbaboa ne fi wɔ gya gua berɛ.” Ɔyɔle sɔ, na ɔyele ye nwo tole so fale ye gya guale ase.

³ Na AWURADE sele kyɛ, “Kyɛbɔ me somvoɛ Yesaya waye ye nwo wato so wafa ye gya wagua ase toonn afoɛ nza, bɔ ɔte sɛngyerɛnneɛ ne kɔkɔbɔlɛ tia Misraim ne Yitiopia nen,

⁴ sɔ ala yeɛ Asiria hene kɔhye Misraimfoɛ nnure, ná wasa wahye Yitiopiafoɛ nnure wahɔ ɔ. Ɔkɔhye mmerandeɛ ne mbanyi, bɛ nwo kɔlela so, bɛ gya kogua ase, bɛ bo kɔlela so, na Misraim nyunu kogua ase.

⁵ Na ɔnate kyɛ Yitiopia te b’anyelasoɛ, bɔ Misraim koso te b’anwohoahoa ne ati, bekosuro, na bɛ nyunu kogua ase.

⁶ Na sɔ kyẽa ne, sɔ mboanoafoɛ nemɔ bekose kyɛ, ‘Yieee, yɛ anyelasoɛ bɔ yɛnwatili yɛhɔle bɛ berɛ, kyɛ bɛpepɛ bele yɛ befi Asiria hene sa nu ne, edwirɛ bɔ wato bɛ hɔ ɛne oo! Nzaade, yɛkɔyɛ sɛɛ né yanya yɛ ti yadidi nu?’ ”