Yesaya 2 - AHYERƐLƐ KRONGRON

Nyameɛ hyɛ asomdwee nwo bɔ

¹ Nyekyire he yeɛ Amoso awa Yesaya nwuni ye fale Yuda ne Yerusalem nwo ɔ:

² Na ɔkɔwa kyɛ, mmerɛ bɔ oli nziɛ ne, bokaa bɔ AWURADE awuro ne gyi so ne, ye bo kotimu maa ɔkɔware kɔtra bokaa biala, ɔkɔyɛ tendenn kɔtra pambaa biala, na maen maen mukoraa bekobiri bɛkɔwa so.

³ Na mmenia pee bɛkɔwa bɛkɔɔhã kyɛ, “Ɛmɔbra ma yɛfo yɛhɔ AWURADE bokaa ne aso, ɛ́mɔma yɛhɔ Yakob Nyameɛ awuro ne anu, amaa ɔnate so wahyirehyire yɛ ye atee ne, ná yanate ye atimbire ne aso.” Ofikyɛ Sion yeɛ mmeraa ne kofi kɔwa ɔ, na Yerusalem yeɛ AWURADE dwirɛ ne kofi kɔwa ɔ.

⁴ Okoli maen maen mɔ so, okosiesie mmenia pee b’afia, bɛkɔboro bɛ ngrandɛ bɛkɔfa bɛkɔbɔ kona, ná baboro bɛ pealɛɛ bafa babɔ asɔsɔaa. Maen bie ngɔhwe obiɛngo maen so ngrandɛ, na bengosua koɛhonɛ ko.

⁵ O, Yakob awuro ama, ɛmɔbra ma yɛnate AWURADE kanea ne anu!

AWURADE kyẽa ne

⁶ Amba, apo wɔ mmenia, Yakob boso ama nemɔ, ofikyɛ eyia afiteleɛ ahɔmeɛ bɛ ne Filisti ngonyaayelɛfoɛ bayi maen ne anu tɛkyɛ, na Yakob boso ama nemɔ, bɛ ne maen maen mɔ nu ama yeɛ bɛbɔ afɛ ɔ.

⁷ Ɛdwetɛ ne sikaa kɔkorɛ ayi b’aseɛ ne aso tɛkyɛ, b’anwonya ne, bɛka a bennwu ye noa, mbɔngɔ ayi b’aseɛ ne aso tɛkyɛ, na bɛ teaseɛnam nemɔ, bɛka a bennwu ye noa.

⁸ Mmosoen ayi b’aseɛ ne aso tɛkyɛ; bɛsɔne bɛ sa noa adwuma, nningyein bɔ bafa bɛ bɔbɔ bɛ sa bayɔ ɔ.

⁹ Ye sɔ ne ati, adasa mmaa nyunu agua ase, na kuro sona asopa ye nwo. O, nnɛfa bɛ bɔne kyɛ bɛ!

¹⁰ Na ɔnate AWURADE nwo suronyi, ɔne ye animnyam totohyia ne ati, kowura nyɔbotaen nu, fa wɔ nwo kɔfea mvuture nu.

¹¹ Bɛkɔbrɛ ahandaen anyeɛ ase, yeɛ bekogua mmenia b’anwomasoɛ nyunu ase, na AWURADE angome yeɛ bɛkɔma ye so sɔ kyẽa ne ɔ.

¹² Na Asafo AWURADE ole ye kyẽa bɔ ɔkɔwa ebiala bɔ ɔte anwomasoɛ ne ahandaen ɔ so, ɔne ebiala bɔ wama ye nye atra ye ndo nwiaa ɔ so, na ɔkɔbrɛ ye ase;

¹³ ɔkɔwa Lebanon sida mukoraa bɔ bahɔ anwuro tendetende ɔ so, ɔne Basan eluii amukoraa so;

¹⁴ ɔkɔwa mmokaa ndendenn amukoraa so, ɔne pambaa bɔ wahɔ anwuro amukoraa so;

¹⁵ ɔkɔwa abandenden bɔ wahɔ anwuro anwuro amukoraa so, ɔne kuro bɔ bato ye nwo fasue amukoraa ɔ so;

¹⁶ ɔkɔwa Tasise ɛlɛen amukoraa so, ɔne nu nningyein bɔ bali adwii bayɔ ye nyemene amukoraa so.

¹⁷ Bɛkɔbrɛ sona ye ahandaen ase, yeɛ bekogua mmenia b’anwomasoɛ nyunu ase, na AWURADE angome yeɛ bɛkɔma ye so sɔ kyẽa ne ɔ.

¹⁸ Amoen amukoraa bɛ boso komini.

¹⁹ Na sɛ AWURADE dwɔso woso aseɛ serɛserɛ a, ɔnate AWURADE nwo suronyi, ɔne ye animnyam totohyia ne ati, mmenia koowurawura nyɔbotaen ndokuro nu, ɔne aseɛnwo ngumaa nu.

²⁰ Sɔ kyẽa ne, mmenia b’ɛdwetɛ amoen ne bɛ sikaa kɔkorɛ amoen bɔ bayɔ bama bɛ nwo, bɔ bɛsɔne bɛ ne, bekogyi bekogua bɛkɔma mmurokuruwa ne mbena.

²¹ Na sɛ AWURADE dwɔso woso aseɛ serɛserɛ a, bekoowurawura nyɔbotaen ndokuro nu, ɔne mmokaa so bɔen mɔ nu, ɔnate AWURADE nwo suronyi, ɔne ye animnyam totohyia ne ati.

²² Kuro sona bɔ ode nwomeɛ fa ye bonyi anu ne, nnɛma ɛmɔfa bɛ nwo bɛto ye so. Kuro sona te nzu?