Yesaya 19 - AHYERƐLƐ KRONGRON

Misraim nwo nyekyire

¹ Misraim nwo nyekyire. Tie, AWURADE te munungum bɔ ye nwo yɛ nyera ɔ so ɔ́ba Misraim. Misraim mmosoen mɔ nwo kɔhã bɛ tɛtɛtɛtɛ wɔ ye nyunu, na ahunundetelɛ kɔtɔ Misraim so.

² Ngɔkanyane Misraimfoɛ maa bekodwɔso bekotia Misraimfoɛ, bɛkɔho, aliɛmaa ne aliɛmaa bɛkɔho, abiɛngoɛ ne abiɛngoɛ bɛkɔho, kuro ne kuro bɛkɔho, na ahennie ne ahennie bɛkɔho.

³ Misraim sunzum bɔ ɔwɔ ye nu ɔ ye nwo kɔto, bɛkɔ agyina a, ngɔmaa ɔkɔyɛ mbaen, bɛkɔhɔ abisa wɔ mmosoen ne musueyelɛfoɛ, nzamangɔmhyɛlɛfoɛ ne ngɔndwemahwenɛfoɛ so.

⁴ Na ngɔfa Misraimfoɛ ngowura meneɛ atianuserɛniɛ bie sa, ɛhene bɔ ye nwo yɛ suro ɔ yeɛ okoli bɛ so ɔ, AWURADE, Asafo AWURADE noa dwirɛ ɛne.

⁵ Asue Naele nu nzue kɔwewe, asue ne kɔwewe kɔbɔ mvuture,

⁶ asue ne sa nemɔ, bɛkɔbo mvamva, Misraim Naele ye sa nemɔ, bɛkɔwewe bɛkɔbɔ mvuture, na elemmire ne ngyɛngyɛma nemɔ kɔkese.

⁷ Asue Naele noa kɔyɛ pralaa, ye noa ndire nemɔ kɔyera, nningyein amukoraa bɔ balua ye Naele noa ne, okowu, na ɔkɔyera bɔkɔɔ.

⁸ Bɛ bɔ bɛkye nzue nu naen ne, bekosũ, na ebiala bɔ ɔto koaa wɔ Naele nu ne, ɔkɔbɔ awuye, na bɛ bɔ begua nzue ne anu asawu koso, bekoli aworabɔlɛ.

⁹ Adwumayɔlɛfoɛ bɔ bebribri gyese, yeɛ bɛ bɔ bɛnwo nwera ne, bɛ wora kɔbɔ.

¹⁰ Maen ne, ye nyinasoɛ nemɔ kodwiri kogua, na apaafoɛ amukoraa bekoli aworabɔlɛ.

¹¹ Soan nnehyeɛ mɔ bɛte ngwaseafoɛ paa, Faro foɛtulɛfoɛ nu nworɛfoɛ nemɔ betu foɛ tɛɛ. Nzu ati yeɛ ɛmɔkora bese Faro kyɛ, “Nde nworɛniɛ awa, nde daa tete ahemvo nemɔ b’anomaa”?

¹² Bɛwɔ ni? Wɔ nworɛfoɛ nemɔ bɛwɔ ni? Maa bɛhã behyire wɔ maa enwu nhyehyɛleɛ bɔ Asafo AWURADE ahyehyɛ kyɛ ɔkɔmaa ɔkɔto Misraim ɔ.

¹³ Soan nnehyeɛ nemɔ bakakyi ngwaseafoɛ, mmenia alakalaka Memfise nnehyeɛ mɔ, mbanyi bɔ bɛlela ye mmusua nemɔ noa ne, balakalaka Misraim maa wali makyebu.

¹⁴ AWURADE ama anyesotanɛ sunzum ate ape ye so, na bɔ Misraim yɔ biala, ɔte mvomsoɛ, kyɛbɔ akɔnomnzaniɛ ohimu so wɔ ye feɛ nu ɔ.

¹⁵ Na nikyee biala nne berɛ bɔ ebiala kɔhora kɔyɔ kɔma Misraim ɔ, kyɛ sona ne ɔte ye ti anaa ye dua oo, ɛberɛ anaa elemmire oo.

Misraim kɔsɔne AWURADE

¹⁶ Sɔ kyẽa ne, Misraim kɔyɛ kyɛ mmrasua, na ɛserɛ kɔma bɛ nwo kɔwoso bɛ tɛtɛtɛtɛ wɔ Asafo AWURADE nyunu, ɔnate ye tumi bɔ ɔfa tea bɛ ne ati.

¹⁷ Yuda maen ne nwo suronyi kɔtɔ Misraim so. Sɛ ebiala te kyɛ babɔ Yuda dumaa a, ahunundetelɛ kɔtɔ ye so, ɔnate Asafo AWURADE nhyehyɛleɛ bɔ wahyehyɛ kyɛ okotua Misraim so kerɛ ne ati.

¹⁸ Sɔ kyẽa ne, Misraim aseɛ so nguro nnu bɛkɔhã Kanaan dwudwolɛ, na bɛkɔta ndaen kyɛ bɛkɔso Asafo AWURADE. Bɛkɔfrɛ bɛ nu ko kyɛ: Eyia Kuro.

¹⁹ Sɔ kyẽa ne, bekosi afɔleɛ bokyea wɔ Misraim aseɛ ne afia bɛkɔma AWURADE, na bɛkɔfa ngayeɛ nyɔboɛ bɛkɔpena ye wɛen so bɛkɔma AWURADE.

²⁰ Na ɛhe kɔyɛ Asafo AWURADE nwo sɛngyerɛnneɛ ne adanzeɛ wɔ Misraim aseɛ so. Na sɛ mmenia hyɛ bɛ so ná besu bɛfrɛ AWURADE a, ɔkɔsoma defoɛ ne komafoɛ maa ɔkɔɔpepɛ kole bɛ.

²¹ AWURADE kɔye ye nwo ali kohyire Misraim; Misraimfoɛ konwu AWURADE sɔ kyẽa ne, bɛkɔbɔ afɔleɛ ne naen yeralɛ afɔleɛ bɛkɔfa bɛkɔsɔne ye, bɛkɔhyɛ AWURADE bɔ, na bekoli so.

²² AWURADE kopura Misraim, okopura ye de, nakoso ɔkɔsa ye anwonyerɛ. Bekosa bɛkɔwa AWURADE berɛ, okotie bɛ sufrɛ, na ɔkɔsa bɛ anwonyerɛ.

²³ Sɔ kyẽa ne, efi Misraim ɛkɔ Asiria a, ɔkɔyɛ atimbire. Na Asiriafoɛ kɔwa Misraim, yeɛ Misraimfoɛ koso bɛkɔhɔ Asiria, na Misraimfoɛ ne Asiriafoɛ bɛkɔbɔ nu bɛkɔsɔne.

²⁴ Sɔ kyẽa ne, Yisrael kɔboka Misraim ne Asiria so maa bɛkɔyɛ nza, na ɔkɔyɛ saleɛ wɔ aseɛ so.

²⁵ Ofikyɛ Asafo AWURADE koyira bɛ kyɛ, “Mayira me maen Misraim, ɔne Asiria bɔ ɔte me sa noa adwuma, yeɛ m’agyapadeɛ Yisrael.”