Yesaya 16 - AHYERƐLƐ KRONGRON

¹ Ɛ́mɔfa mmoaen mmaa bɛɛma aseɛ ne aso hene, ɛ́mɔfa bɛ béfi Sela bɛɛfa ɛserɛ atee ne aso bɛhɔ Sion awa brasua bokaa ne aso.

² Kyɛbɔ nnomaa mmaa bɔ bafoa bɛ bafi bɛ saen nu bɔ bekyinikyini ne bɛte ne, sɔ yeɛ Moabo mma mmrasua nemɔ bɛkɔyɛ wɔ Anɔn apɛleɛ ɔ.

³ “Ɛ́mɔtu yɛ foɛ, ɛ́mɔbua ndɛen turoloo, na eyia ketee po, ma wɔ waenbɔlɛ fɔnwoo ne anu ɔyɛ kyɛ kɔngɔen; fa bɛ bɔ bapɛ bɛ asue nemɔ fea, mmenia bɔ bɛnwati ne, nnɛye bɛ ma.

⁴ Mmenia bɔ bafoa bɛ bafi Moabo ne, maa beesikye wɔ berɛ, bɔ bɛ nwo waen fi bɔ ɔpena bɛ ku bɛ ne sa nu.” Sɛ nhyɛsoɛniɛ nne berɛ, ná mmenia hunɛ bo apɛ, ná apaabɔlɛfoɛ betu bemini befi aseɛ ne aso a,

⁵ yeɛ bɛkɔfa ahennie bia ne bekotimu berɛ wɔ ɔdɔ nu ɔ, na ɔkɔtena so nahorɛlilɛ nu wɔ Dawide ɛtena sua nu, ɔte ebie bɔ ɔfa pɛpɛɛpɛyɛlɛ obu maen ɔ, na okobua ndɛen turoloo ndɛndɛ.

⁶ Moabo anwomasoɛ ne, yate ye nga, ɔte anwomasoɛ paa, ye ahandaen, ye anwomasoɛ ne ye ahonehulɛ ne: ɔbobɔ ye noa nu mbaen.

⁷ Yiti ma Moabo osũ Moabo, ma ebiala osũ, Kire Haresete bobe mmaa taterɛ ne ati, ɛ́mɔbɔ awuye paa.

⁸ Ofikyɛ Hesebon eboo nemɔ asɛkye, Sibima bobe nemɔ koso sɔ ala. Maen maen mbanyi mɔ bapomba bɛ mmaen nemɔ bagua. Mmaen nemɔ bɛtrɛ bekodwu Yasere, na bɛkondokondo alaa bɛkɔ ɛserɛ so. Ye mmaen ne, bɛtrɛ bɛkɔ dedeede, na bɛpɛ ɛpo bɛkɔ ye si.

⁹ Yiti Yasere esuɛ bɔ osũ ne, ebie yeɛ mefa mesũ Sibima bobe ne ɔ. Meporo me nye moen megua wɔ so, O Hesebon ne Eleale, ofikyɛ ese bɔ wɔ mmakaammaa telɛ dwu a bɛbɔ, ɔne bɔ bebu w’aburoo a bɛbɔ ne, ye bo apɛ.

¹⁰ Baye anika ne anigye bafi eboo bɔ aleɛ wɔ nu ne anu, yeɛ bobe boo nemɔ anu koso, bɛndo anigye dwein wɔ nu ko, bɛmmɔ ese wɔ nu ko, kumaa bɔ betwi nzaa wɔ nu ne, bendwi nzaa berɛ ko, mmakaammaa telɛ nwo esebɔlɛ ne, mama ye bo apɛ.

¹¹ Yiti me kra di Moabo nwo aworabɔlɛ kyɛ aworabɔlɛ dwein bɔ bɛto bɛfa ye nwo ɔ, yeɛ me kunu tete me ma Kire Herese.

¹² Na ɔkɔwa kyɛ, sɛ Moabo kɔ asɔneyɛɛ so kɔsɔne ɔfɛ ye nwo, ná ɔkɔ asɔneyɛɛ sua nu ɔkɔbɔ mbaeɛ a, ongosi huu.

¹³ Daa ne, edwirɛ bɔ AWURADE hã fale Moabo nwo ɛne.

¹⁴ Nakoso kekesaala ye de, AWURADE nwa, “Kyɛ odwu afoɛ nza, kyɛbɔ paaniɛ osi ka ye afoɛ pɛpɛɛpɛ ne, Moabo animnyam nyunu kogua ase. Ɔmva ye nwo kyɛ ye lɔen ne sone pee ɔ; na bɛ bɔ bekonya bɛ ti bekodidi nu ne, bɛkɔyɛ kaaba bie bɔ bɛ nwo nyɛ se ɔ.”