Yesaya 15 - AHYERƐLƐ KRONGRON

Moabo nwo nyekyire

¹ Moabo nwo nyekyire. Kɔngɔen komapɛ yeɛ bɛsɛkyele Are kuro ne ɔ, yiti Moabo abɔ ayɛ kurofoen; Kɔngɔen komapɛ yeɛ bɛsɛkyele Kire kuro ne ɔ, yiti Moabo abɔ ayɛ kurofoen.

² Dibɔn awa brasua ne afo ahɔ asɔneyɛɛ sua nemɔ anu kyɛ ɔkwaasu, Moabo bɔ awuye wɔ Nebo ne Medeba, bɛ mukoraa babɔ tikwa, ebiala apoa ye kanza;

³ baherahera ɛsɛen tena wɔ bɛ mmorɔnoɛ nemɔ aso, ebiala ɔbɔ awuye osũ hahii wɔ bɛ sua nemɔ ti afia ne dwaaso.

⁴ Hesebon ne Eleale besu serɛserɛ, bɛte bɛ suɛ alaa kodwu Yahase, yiti Moabo koɛhonɛfoɛ nemɔ bɛteatea nu, na ye nwo ngaka anwati.

⁵ Medi Moabo nwo aworabɔlɛ, ye mmenia bɔ bɛnwati ne, banwati baadwu Soa, baadwu Eglate Selisiya. Ofikyɛ Luhite pambaa ne, bele esuɛ yeɛ bɛfo ɔ; na atee bɔ ɔkɔ Horonaim ne, awuye yeɛ bɛbɔ bɛfa so ɔ.

⁶ Nimrim asue nemɔ babɔ mvuture, ɛserɛ ne akese, ndire nemɔ ayera, na ndire monɛ nne berɛ ko.

⁷ Yiti anwonya bɔ banya ye, ɔne nningyein bɔ baboaboa ye noa basie ne, bɛsoa bɛfa bɛpɛ asuenoa mmakaa bɔnza ne.

⁸ Ofikyɛ esuɛ ne adwu Moabo aseɛ so amukoraa, ye awuyebɔlɛ ne adwu Eglaim, awuyebɔlɛ ne adwu Beɛ Elim.

⁹ Ofikyɛ Dimon nzue amukoraa akakyi mogya, na ngɔma bɔ ɔtra so ɔ kɔto Dimon: gyata kɔhye Moabofoɛ bɔ bɛkɔnwati ne, ɔkɔhye bɛ bɔ bɛkɔha aseɛ ne aso ne.