Yesaya 14 - AHYERƐLƐ KRONGRON

Yuda kofi nnurehyelɛ nu kosa kɔwa

¹ Amba, AWURADE konwu Yakob anwumvoin. Okosa kɔneanea nu kɔye Yisrael, na ɔkɔfa bɛ koolua bɛ bɔbɔ b’aseɛ so. Na amanvrafoɛ kɔɔboka bɛ so bɛkɔfa bɛ nwo bɛkɔbɔ Yakob boso ama.

² Maen maen mɔ kɔfa Yisraelfoɛ bɛkɔwa Yisraelfoɛ bɔbɔ b’aseɛ so, na Yisrael awuro ama kɔfa maen maen nemɔ kɔyɛ nganga ne afaneɛ mɔ wɔ AWURADE aseɛ ne aso. Na mmenia bɔ bɛhyele Yisrael nnure ne, Yisrael koso kɔhye bɛ nnure, na bekoli sɔ mmenia bɔ bɛhyɛle bɛ so ne aso.

Babilɔn hene ayieleɛ

³ Na ɔkɔwa kyɛ, kyẽa bɔ AWURADE kɔye wɔ kofi wɔ yealɛ, amaneɛ ne kanga adwuma bɔ bɛhyɛle wɔ maa ɛyɔle ne anu ne,

⁴ kã ngorohoɛ dwirɛ he fa Babilɔn hene nwo: “Anyandimlilɛniɛ ne, ɔwale ye sɛ bɔ ye ayieleɛ ayie ye ɔ! Ye ahandaen ne, ɔwale ye sɛ bɔ ye bo apɛ ɔ!

⁵ AWURADE abubu bɔnefoɛ pɔmaa ne anu, wabubu maenbulɛfoɛ b’ɛhɔtɔ nemɔ anu.

⁶ Ye bɔ ye ahone hu a ɔnyakyi mmenia hunɛ ne, bɔ ɔfale ɛyaafɛlɛ lili maen maen mɔ so ne, bɔ ɔmaa bɛhɔle anwokyere ndoatoasoɛ nu ne.

⁷ Aseɛ amukoraa so adwo, asomdwee awa, bɛto dwein anigye so.

⁸ Bɔ wato wɔ ne, ɔyɛ ɛframmire mɔ fɛ, ɔne Lebanon sida mɔ koso fɛ, na bɛkã kyɛ, ‘Ofi mmerɛ bɔ bɛbrɛle wɔ ase ɔ, sona biala ɔmma kyɛ ɔbaabu yɛ gua.’

⁹ Ɛborɔ bɔ ɔwɔ aseɛ bo dɔ ne, waboaboa ye nwo kyɛ ɛba a ɔbaayia wɔ. Wakanyane awufoɛ bɔ né mmerɛ bie bɛte aseɛ so mbanyi amukoraa. Wama bɛ bɔ né bɛte maen maen ahemvo amukoraa badwɔso bafi b’ahennie bia so kyɛ bɛɛyɛ wɔ akwaaba.

¹⁰ Na bɛ mukoraa bekobukye bɛ noa bekose wɔ kyɛ, ‘Eh, wɔ koso ayɛ mmerɛ kyɛ yɛ ala! Ɛne yɛ yayɛ pɛ!’

¹¹ W’anwomasoɛ ne, ye bo aapɛ wɔ ɛborɔ, w’adengum bɔ bɛbɔ ne koso sɔ ala; bɛen bɔ ɛla so ne te nnɔboakoma, na esuronyi yeɛ bafa bagurɔ wɔ nwo ɔ.

¹² “O, Alehyeleɛ Nzramaa, Alebahyene ɔwa, ɛtetɔlɛ yeɛ efi nyameɛso ate atɔ ase sɔaa e! Wɔ bɔ elili maen maen mɔ so ngonim ne, aseɛnwo yeɛ bafindi wɔ bato sɔaa ye!

¹³ Ɛhane ye wɔ wɔ ti anu kyɛ, ‘Ngɔfo ngɔhɔ nyameɛso, ngɔfa m’ahennie bia ngoosie anwuro anwuro maa ɔkɔtra Nyameɛ nzramaa mɔ. Bokaa ne aso nyianu ne, ngɔɔtena nu wɔ sorɔ dɔ paa aseɛ ne aso.

¹⁴ Ngɔfo ngɔhɔ munungum nemɔ ti afia dɔ, na ngɔyɛ kyɛ Anwuro Anwuroniɛ ne.’

¹⁵ Nakoso bagyi wɔ bato ɛborɔ, ɛborɔ kumaa kuronguronn ne abo paa.

¹⁶ Bɛ bɔ benwu wɔ ne, bɛkɔnea wɔ haa, na bɛkɔdwene bɔ wato wɔ ne anwo bɛkɔhã kyɛ, ‘Eh, biaa bɔ ɔmane aseɛ wosole ná opusuli ahennie mɔ ne, aso ye ɛhe anaa?

¹⁷ Ye bɔ ɔkakyili ewiase kyɛ ɛserɛ so, bɔ ɔbɔle nu nguro mɔ pasaa, bɔ wanyakyi nu kukunufoɛ ate ma bangɔ b’awuro ne, aso ye ɛhe anaa?’

¹⁸ Maen maen ahemvo amukoraa balela wɔ animnyam nu, ebiala la ye asieleɛ nu;

¹⁹ nakoso wɔ de, bafindi wɔ bato bafi w’asieleɛ nu kyɛ bakaa mmaen bɔ ɔte akyiwadeɛ ɔ, kyɛ bɛ bɔ batotɔ ngrandɛ noa, bɔ bɛkɔ ɛborɔ kumaa nyɔboɛ nu, kyɛ efuin bɔ batiatia ye so ɔ.

²⁰ Bengosie wɔ ne bɛ ngɔbɔ nu, ofikyɛ asɛkye w’aseɛ, yeɛ ahũhũ wɔ mmenia. “Bɔnefoɛ bɛ bosofoɛ de, bɛngɔbɔ bɛ dumaa paa ko le!

²¹ Ɔnate bɛ se mɔ amumuyɛɛ ti, ɛ́mɔsiesie akumyɛɛ bɔ bekohu ye mma wɔ berɛ ɔ; amaa ɔnate so bandwɔso bamva aseɛ ne banni so tumi ná bangyekye nguro wɔ ewiase nekaa biala.”

²² Asafo AWURADE nwa nyoo, “Ngodwɔso ngotia bɛ, na ngonunu ɛhemɔ bɛ boso ngofi Babilɔn: dumaa, bɛ bɔ baha ne, mmaa, yeɛ bɛ boso ama. AWURADE noa dwirɛ ɛne.

²³ Ngɔmaa ɔkɔyɛ mbɛsɛ mɔ b’agyapadeɛ, na ɛkwaa kɔtaataa so, na ngɔfa ɛsɛkyelɛ saen ngɔsɛkye ye ngɔpra ye boso, Asafo AWURADE noa dwirɛ ɛne.”

Asiria nwo ngɔm

²⁴ Asafo AWURADE ata ndaen kyɛ, “Kyɛbɔ masusu ye nwo ne, sɔ ala yeɛ okosi ɔ, kyɛbɔ mayɛ m’adwene ne, sɔ ala yeɛ ɔkɔwa nu ɔ:

²⁵ kyɛ ngɔsɛkye Asiria pasaa wɔ m’aseɛ so, yeɛ ngotiatia ye so wɔ me mmokaa nemɔ aso, ye kɔnnua ne kɔye kofi bɛ kɔme anu, na ye adesoa bɔ ɔla bɛ bati ne kɔye kofi berɛ.”

²⁶ Nhyehyɛleɛ bɔ ɔla berɛ fa aseɛ amukoraa nwo ɛne; na ɛhe te asaa bɔ watengyɛ ye wɔ maen maen mukoraa so ɔ.

²⁷ Asafo AWURADE ayɛ ye adwene, na nwa yeɛ ɔkɔhora kɔbɔ kogua ɔ? Watengyɛ ye sa nu, na nwa yeɛ ɔkɔhora kɔhwe ye sa ne kosa nziɛ ɔ?

Filistia nwo ngɔm

²⁸ Afoɛ bɔ Nana Ahase wuli ne, nu ala yeɛ sɔ ngɔmhyɛlɛ he wale ɔ:

²⁹ Filistia amukoraa, nnɛdi ahurusi, kyɛ mbire bɔ ofini wɔ ne, nu abubu ɔ, ofikyɛ ewoo ne, ye ndii nu yeɛ ɛkyenebene kofi kɔwa ɔ, na ɔwa ne kɔyɛ see ewoo bɔ otu ɔ.

³⁰ Ehiafoɛ bɛ bamuɛbaa mɔ konya aleɛ koli, yeɛ bɛ bɔ bɛyɛ anwumvo ne wora, bɛkɔla berɛ asomdwee nu, nakoso wɔ de, ngɔfa ɛhɔen ngonua wɔ mma bɛ boso, yeɛ ngohũhũ wɔ boso ama koso.

³¹ O pambim, bɔ awuye; kuro piri, sũ serɛserɛ, O Filistia amukoraa, ma wɔ kunu tete wɔ! Ofikyɛ nwosina fi sorɔ dɔ ótu ba, na ye lɔen ne, ebiala ngɔte ye nwo ngɔha nziɛ.

³² Ɛbɔfoɛ mɔ bɔ befi sɔ maen ne aso ne, nzikyɛ mmuayɛɛ yeɛ bɛkɔfa bɛkɔma bɛ ɔ? Yɛkobua kyɛ, ‘AWURADE akyekye Sion, na ye maen ne anu mmenia bɔ bɛyɛ anwumvo ne, bɛkɔbɔ bɛ nwo adwaa wɔ nu.’