Yesaya 1 - AHYERƐLƐ KRONGRON

¹ Nyekyire he yeɛ Amoso awa Yesaya onwuni ye fale Yuda ne Yerusalem nwo wɔ Yuda ahemvo Yusia, Yotam, Ahase ne Hesekia b’aberɛ so ɔ.

Yuda bɔne nwo asotwe

² O nyameɛso, ɛ́mɔtie, O aseɛ, ma wɔ so bra wa! Ofikyɛ AWURADE nwa nyoo: “Matete ngwadaa manea bɛ so maa banyi, nakoso bayɛ me nwo lɔen.

³ Nandwie se ye mene, yeɛ afunum se nekaa bɔ ye mene ma ye aleɛ ɔ, nakoso Yisrael de, ɔnze, me maen ne ɔnde ye bo.”

⁴ Ao, maen bɔ bɔne ayi nu tɛkyɛ ɔ! Mmenia bɔ amumuyɛɛ ali bɛ ti ɔ! Bɔnefoɛ mɔ bɛ bosofoɛ! Mmaa bɔ basɛkye ɔ! Bɔ bapo AWURADE, bɔ babu Yisrael Krongronniɛ ne animtia, ná bakakyi bɛ si bama ye ɔ!

⁵ Nzu ati yeɛ ɛmɔkuro kyɛ mekɔ so mebo ɛmɔ ɔ? Nzu ati yeɛ ɛmɔtɛyɛ lɔen ye? Tire ne amukoraa nde apɔ, yeɛ ahone ne amukoraa ayɛ hodwoo.

⁶ Ofi ɛmɔ gya kunu kɔkã ɛmɔ ti so, nekaa biala nde apɔ, wapepɛ wapuropuro wayɛ ngenangena bɔ otu mogya ɔ; ngena bɔ bemmia, bɔ bɛngyekye so, bɔ bɛmva ayire bɛnda nu ɔ.

⁷ Ɛmɔ maen ne abɔ, bafa see bayera ɛmɔ nguro nemɔ, amanvrafoɛ bɛfẽ ɛmɔ fieso aleɛ bɛfa bɔ ɛmɔ nye tua ɔ; wabɔ, kyɛbɔ ɛwɔfoɛ mɔ basɛkye ye ne.

⁸ Waha Sion awa brasua ne angome berɛ, kyɛ bobe boo nu asese, kyɛ ferɛ eboo nu pata, kyɛ kuro bɔ batua ye ɔ.

⁹ Sɛ Asafo AWURADE anyakyi yɛ mmenia kãa bie ma bannya bɛ ti bannidi nu a, ahaa yayɛ kyɛ Sodom, ahaa yakakyi kyɛ Gomora.

¹⁰ Mbanyi bɔ bedi Sodom so ɔ, ɛ́mɔtie AWURADE noa dwirɛ! Ɛmɔ Gomorafoɛ, ɛ́mɔyɛ asoɛ bétie yɛ Nyameɛ ngyerɛkyerɛ!

¹¹ Ɛmɔ afɔleɛ worawora ne, mefa meyɛ nzu? AWURADE noa dwirɛ ɛne. Mmoaen nyii naen yeralɛ afɔleɛ ɔne nyɛmmoa mɔ bɛ loe ne, mali maa wabɔ me; yeɛ nandwie mogya anaa mmoaen mogya, anaa mbɔngye mogya ɔnzɔ me nye.

¹² Sɛ ɛmɔba me nyunu a, nwa yeɛ osele ɛmɔ kyɛ ɛmɔyɔ sɔ ɔ, kyɛ ɛ́mɔtiatia m’aluo berɛ basabasa ɔ?

¹³ Ɛmɔ afɔleɛ mbaen mbaen ne, nnɛma ɛmɔfa bɛba ko, ɛyɛɛ ne te m’akyiwadeɛ. Ɛsraen foforɛ ne afofikyẽa aluolue ne, ɔne ɛmɔ dwaabɔlɛ ne, nyianu krongron ne po, ɔte amumuyɛɛ, mengɔhora ngɔgyegye so.

¹⁴ Ɛmɔ ɛsraen foforɛ aluolue ne aluolue nemɔ, me kra kyi, ɔte ɛhawo ma me, bɔ bayɛ me so adesoa ɔ.

¹⁵ Sɛ ɛmɔtrɛtrɛ ɛmɔ sa nu (kyɛ ɛmɔbɔ mbaeɛ a,) ngɔye me nye ngɔto buro bɔ mengɔtɛ ɛmɔ so ɔ. Ɛmɔbɔ mbaeɛ pee de, nakoso mengotie, ofikyɛ ɛmɔahã mogya bagua paa.

¹⁶ Ɛ́mɔnwunzi ɛmɔ nwo, ɛ́mɔpete ɛmɔ nwo, ɛ́mɔye ɛmɔ bɔne yɔleɛ ne béfi me nye so, ɛ́mɔyakyi bɔne yɔlɛ.

¹⁷ Ɛ́mɔsua bɔ ɔte paa ɔ bɛyɔ, ɛ́mɔpena pɛpɛɛpɛyɛlɛ si atee, ɛ́mɔpepɛ bele bɛ bɔ bɛyɛ anwumvo ɔ, ɛ́mɔhã bie bɛma nyisiaafoɛ, ná ɛmɔgyina akunafoɛ mmrasua si.

¹⁸ AWURADE nwa nyoo: “Ɛmɔbra ma yɛsiesie yɛ afia. Ɔwɔ nu kyɛ ɛmɔ bɔne te kyɛ adaabene de, nakoso bɛkɔyɛ fufue kyɛ nwera, ɔwɔ nu kyɛ bɛboro kyɛ koogyan, nakoso bɛkɔyɛ kyɛ gyese.

¹⁹ Sɛ ɛmɔpene so ná ɛmɔyɛ sotie a, ye de aseɛ ne aso nikye paa yeɛ ɛmɔkoli ɔ.

²⁰ Nakoso sɛ ɛmɔtwi bɛfa so, ná ɛmɔyɛ lɔen a, ye de ɛmɔkɔtotɔ ngrandɛ noa, ofikyɛ AWURADE noa dwirɛ ɛne.”

Yerusalem

²¹ Kuro bɔ né odi nahorɛ ne, nea kyɛbɔ wasi wakakyi gyanderaniɛ ɔ! Ye bɔ ahaa né pɛpɛɛpɛyɛlɛ wayi ye nu tɛkyɛ ne, bɔ ahaa né ɔte tenenee kuro ne, afei de kodiawufoɛ yeɛ bɛwɔ nu ɔ!

²² Wɔ dwetɛ ne akakyi nikyee fiɛ, wɔ nzaa paa ne, bafa nzue bayuro ye.

²³ Wɔ mbanyi ayɛ lɔen, na bafa awuefoɛ abiɛngoɛ. Bɛ mukoraa bɛ nye gye fea-ase-ma nwo, na bɛpere bɛpena akyɛdeɛ. Bɛnga bie bɛmma nyisiaafoɛ, na akunafoɛ mmrasua dwirɛ ba bɛ nyunu a bɛmvrɛ.

²⁴ Yiti AWURADE, Asafo AWURADE, Yisrael Tuminiɛ ne, ɔnwa nyoo: Aa, bɛ bɔ bekyi me ne, ngɔfɛ bɛ so yaa piri paa, yeɛ ngɔtɔ me pɔfoɛ mɔ bɛ so wereɛ!

²⁵ Ngɔfa me tumi ngɔhwe wɔ so, ngohuro wɔ ngɔye wɔ nwo fiɛ ne, ná maye wɔ nwo wohyee ne amukoraa magua.

²⁶ Ngosa ngɔma wɔ maenbulɛfoɛ kyɛ daa ne ala, yeɛ foɛtulɛfoɛ koso, kyɛbɔ ahyɛaseɛ ne né ɔte ne ala. Na ɛhe asi ne, bɛkɔfrɛ wɔ tenenee kuro ne nahorɛlilɛ kuro.

²⁷ Ɔnate ndɛenbualɛ turoloo so ngole Sion, yeɛ ɔnate pɛpɛɛpɛyɛlɛ so ngole nu mmenia bɔ basakyera b’adwene ɔ.

²⁸ Nakoso mmeraatolɛfoɛ ne bɔnefoɛ de, ngohũ bɛ ngɔbɔ nu, na bɛ bɔ bɛpo AWURADE ne wora, ngohũhũ bɛ.

²⁹ Na eluii mɔ bɔ ɛmɔsɔne bɛ, bɔ ɛmɔ nye gye ye nwo ne, sɔ nikyee ne kɔyɛ ɛmɔ nya; yeɛ ɔkɔyɛ ɛmɔ fɛre kyɛ ɛmɔaye turo mɔ basie berɛ bɛsɔne (ɛmɔ nyameɛ mɔ wɔ nu) ɔ.

³⁰ Ɛmɔkɔyɛ kyɛ eluii bɔ ye nyaa kese, anaakyɛ turo bɔ nzue ngua so ɔ.

³¹ Anwoserɛniɛ kɔyɛ kyɛ mmɛyeram worowaa, ye sa noa adwuma kɔyɛ kyɛ see nzramaa, na ɔne ye sa noa adwuma ne bɛkɔyera bɛkɔbɔ nu, bɔ ebiala nne berɛ bɔ okonua ye ɔ.