Yeremia 9 - AHYERƐLƐ KRONGRON

¹ Ao, ahaa né me ti te mbombonzue, ná me nye te abura bɔ opu moen ɔ. Ahaa eyia ne kɔngɔen ngosu me maen awa brasua ye mmenia bɔ bahũhũ bɛ ne!

² Ao, ahaa né manya ɛwɔfoɛ dabea wɔ ɛserɛ so, amaa mahora mayakyi me mmenia nu mahwe me nwo mafi bɛ nwo mahɔ! Ofikyɛ bɛ mukoraa bɛte agyaasɛkyelɛfoɛ ne nnakannakafoɛ fekue.

³ Bɛkondo bɛ temverema kyɛ agyaen bɛpɛ anoanu; nna nahorɛ ɔ, na mmom ngondombopɛlɛ yeɛ wamaa batindim wɔ aseɛ ye aso ɔ, ofikyɛ bɛyɔ bɔne bɛfoa bɔne so, na bɛnze me, AWURADE noa dwirɛ ɛne.

⁴ Odi kyɛ ebiala ɔnea ye nwo yé wɔ obiɛngo anwo, na nnɛfa wɔ wora wura eliɛma nu, ofikyɛ aliɛmaa biala ɔpepɛ sona gya ndii nu, na abiɛngoɛ biala ɔnate di nzekure.

⁵ Bɛ mukoraa bɛlakalaka bɛ mmango mɔ, ebiala nga nahorɛ; bɛbɔ mmɔden wɔ ngondombopɛlɛ nwo, bɛyɔ amumuyɛɛ, na ɔyɛ bɛ se kyɛ bɛkɔsakyera ɔ.

⁶ Nnakannaka nu yeɛ ɔte w’atenaleɛ ɔ! Nnakannaka ti benguro kyɛ bekonwu me ɔ, AWURADE noa dwirɛ ɛne.

⁷ Yiti bɔ Asafo AWURADE kã ɛhe: “Ngɔpɔ bɛ nwo ngoso bɛ ngɔnea, na me maen awa brasua ne ati, nzikyɛ koraa yeɛ nyɔ ɔ?

⁸ Bɛ temverema te kyɛ agyaen bɔ odi awue ɔ; ɔkã ngondombo dwirɛ. Bɛkekã asomdwee dwirɛ bekyirekyire bɛ mmango mɔ, nakoso bɛ ti anu de, bɛbɔ porɛ kyɛ bɛkɔtetɛ bɛ ɔ.

⁹ Aso onni kyɛ metwe bɛ so wɔ sɔ nningyein hemɔ nwo anaa? AWURADE noa dwirɛ ɛne. Na maen bɔ ɔte sɔaa, onni kyɛ me kra tɔ bɛ so wereɛ anaa?

¹⁰ Mmokaa nemɔ ati, ngosu ngɔbɔ abubue, yeɛ ɛserɛ so nekaa bɔ ngaka didi ne ati, ngɔbɔ awuye, ofikyɛ bayera bɛ bɔ ebiala ngora mbɛ nu berɛ ɔ, na bɛnde nyɛmmoa suɛ; ewienu nnomaa yeɛ eburo ngaka koso, banwati bahɔ.

¹¹ Ngɔma Yerusalem kɔkakyi esire sire, ɛserɛ so ngyea atenaleɛ; ngɔma Yuda nguro kɔkakyi kurofoen, bɔ sona biala nne so ɔ.”

¹² “Nwa yeɛ ɔte nworɛniɛ bɔ ɔkɔte ɛhe abo ɔ? Na nwa yeɛ AWURADE noa wadwudwo wahyire ye bɔ odi kyɛ ɔbɔ ye dawure ɔ? Nzu ati yeɛ aseɛ ne ayɛ pralaa kyɛ ɛserɛ so, maa ɔnate so ebiala mva so ye?

¹³ Na AWURADE nwa, “Ɔnate kyɛ bapo me mmeraa bɔ mahyehyɛ mama bɛ, bɔ bandie me dwirɛ, ná bannea so bammɔ bɛ bra,

¹⁴ na mmom bayɛ asoserɛ bali bɛ ti piri baali Baal mɔ si, kyɛbɔ bɛ nana mɔ hyirehyirele bɛ ne ati ɔ.

¹⁵ Yiti bɔ Asafo AWURADE Yisrael Nyameɛ kã ɛhe: Tie, abɔwee yeɛ ngɔfa ngɔma maen he koli ɔ, na nzue bɔ ɛborɔ wɔ nu yeɛ ngɔfa ngɔmaa bɛkɔno ɔ.

¹⁶ Maen maen bɔ bɛ ne bɛ nana mɔ bɛttele bɛ nga le ne, so yeɛ ngɔbɔ bɛ ngɔsande ngɔhɔ ɔ; na ngɔsoma ngrandɛ maa okoli bɛ si kɔpem kyɛ ngonua bɛ boso ɔ.”

Yerusalemfoɛ sũ pena mmokalɛ

¹⁷ Yiti bɔ Asafo AWURADE kã ɛhe: “Ɛ́mɔdwene ye nwo, ná ɛ́mɔfrɛfrɛ mmrasua bɔ bɛbɔ awuye ne maa bɛbra; ɛ́mɔsoma maa bɛfrɛfrɛ mmrasua bɔ bɛse sũ ɔ maa bɛbra.

¹⁸ Ɛ́mɔma bɛyɛ ndɛndɛ besu yɛ, amaa ɔnate so yɛ nye aporo moen, ná yɛ nye so aporo nzue.

¹⁹ Ofikyɛ bɛte awuye nga befi Sion kyɛ, ‘Ah! Kyɛbɔ edwirɛ asi ato yɛ hɔ ɛne oo! Yɛ nyunu agua ase bɔkɔɔ, ofikyɛ yatu yafi aseɛ ne aso, badwiri y’atenaleɛ mɔ bagua.’ ”

²⁰ Ao mmrasua mɔ, ɛ́mɔtie AWURADE dwirɛ ne, ná ɛ́mɔyɛ asoɛ bétie ye noa dwirɛ ne; ɛmɔhyirehyire ɛmɔ mma mmrasua mɔ ɛsɛen dwein, ná ebiala ohyire obiɛngo awuyebɔlɛ.

²¹ Ofikyɛ ewue afo waagyina yɛ mboma mɔ anu, wawura y’ahemvie mɔ anu, kyɛ ɔbaahũhũ ngwadaa nemɔ fi dwaa nemɔ aso, yeɛ mmerandeɛ nemɔ fi mmorɔnoɛ nemɔ aso.

²² Dwudwo! Bɔ AWURADE kã hɔ ɛhe: ‘Mmenia fuin kɔsamo aseɛnwo, kyɛ fofoɛ bɔ ogua eburo ɔ, kyɛ ɛmo si bɔ bate bakyekye ye tire tire bɔ ebiala ngɔboaboa ye noa ɔ.’ ”

²³ Bɔ AWURADE kã hɔ ɛhe: “Nnɛma nworɛniɛ ɔfa ye nworɛ hoahoa ye nwo, nnɛma anwoserɛniɛ ɔfa ye anwoserɛ hoahoa ye nwo, yeɛ nnɛma sikaniɛ ɔfa ye anwonya hoahoa ye nwo.

²⁴ Na mmom ebiala bɔ ɔhoahoa ye nwo ne, odi kyɛ ɔhoahoa ye nwo kyɛ ole nimdeɛ, ná ɔse me kyɛ me ole AWURADE bɔ mefa ɔdɔ bɔ onni ngasi, ndɛenbualɛ turoloo ne nahorɛlilɛ yeɛ meyɛ me nningyein wɔ aseɛ ye aso ɔ. Na sɔ nningyein nemɔ yeɛ me nye gye bɛ nwo ɔ, AWURADE noa dwirɛ ɛne.”

²⁵ AWURADE nwa nyoo, “Tie, mmerɛ bie ɔ́ba, bɔ mmenia bɔ bɛpɛ bɛ bienzua, nakoso bɛbɔ bɛ bra kyɛ mmenia bɔ bɛmbɛ bɛ bienzua ne, ngɔhwe bɛ mukoraa bɛ so:

²⁶ Misraim, Yuda, Edom, Amonfoɛ yeɛ Moabo ne bɛ bɔ bɛte ɛserɛ so amukoraa bɔ bepiapia bɛ ti angyɛnu ɔ. Ofikyɛ sɔ maen nemɔ amukoraa bɛmbɛ bɛ bienzua, na Yisrael awuro ama amukoraa, b’ahone nu de, bɛmbɛ bɛ bienzua.”