Yeremia 52 - AHYERƐLƐ KRONGRON

Bɛsɛkye Yerusalem kuro ne

¹ Sedekia lili hene ne, né wali afoɛ aburanyɔ ne ko, na olili hene afoɛ buru ne ko wɔ Yerusalem. Ye maame dumaa li Hamutal bɔ ye baba ole Yeremia bɔ ofi Libina ne.

² Ɔyɔle bɔ ɔte bɔne wɔ AWURADE nyunu ɔ, kyɛbɔ Yehoakim yɔle ne amukoraa ala.

³ Nahorɛ nu, AWURADE ahone huli Yerusalem ne Yuda so maa ɔnate so ɔpɛle bɛ asue fili ye nyunu. Sedekia yɛle Babilɔn hene nwo lɔen.

⁴ Na ɔwale kyɛ Sedekia ye ahennie afoɛ bɔ ɔtɔ so ngona ne, ye bosome buru ne anu, ye eleburu ne aso, Babilɔn hene Nebukadenesa ne ye koɛhonɛfoɛ amukoraa bɛfale koɛ bɛɛtetale Yerusalem. Betuale kuro ne, na bɛkyekyele nyinasoɛ bɔ bɛkɔfo so bɛkɔhɔ kuro ne anu ɔ bɛbrale ye nwo beyiale.

⁵ Yiti betuale kuro ne alaa maa oodwuli Nana Sedekia ye ahennie afoɛ bɔ ɔtɔ so buru ne ko ne anu.

⁶ Na bosome nna ne anu, ye ɛlɛhona ne aso, ɛhɔen ne noa yɛle hye paa wɔ kuro ne anu bɔ né aseɛ ne aso ama bennya aleɛ benni koraa ɔ.

⁷ Na bɛbɔngyebɔngyele kuro berɛ fasue ne anu tokuro. Ɔwɔ nu kyɛ né Kaldeafoɛ bapɛ kuro ne anwo bayia de, nakoso kɔngɔen, koɛhonɛfoɛ nemɔ amukoraa bɛnwati bɛfale pambim bɔ ɔwɔ fasue bɔ ɔbɔ ye nwo nyɔ ne anu befili kuro berɛ bɛhɔle. Sɔ pambim ne, opingye ɛhene turo ne. Bɛfale bɛ nye behyirele asue Yɔɔdan bɔnza ne anu dɔ.

⁸ Nakoso Kaldeafoɛ koɛhonɛfoɛ nemɔ, bɛpole Nana Sedekia so bɛɛtole ye wɔ Yeriko aseɛ frɛtɛɛ ne aso, na ye koɛhonɛfoɛ nemɔ amukoraa bɛbɔ bɛsandene bɛyakyili ye nu.

⁹ Yeɛ bɛhyele Nana Sedekia bɛfale ye bɛbrɛle Babilɔn hene wɔ Ribla wɔ Hamate aseɛ so, na obuale ye foɛ.

¹⁰ Babilɔn hene huhuni Sedekia mma mmienzua bɔ ye nye tua ɔ, na osa huhuni Yuda atitirefoɛ amukoraa wɔ Ribla.

¹¹ Babilɔn hene tutuli Sedekia nye, oguale ye ngɔnzɔngɔnzɔ fale ye hɔle Babilɔn, na ɔfale Sedekia tole kuku nu alaa kɔpem kyẽa bɔ Sedekia wuli ɔ.

Babilɔnfoɛ bubu asɔneyɛɛ sua ne

¹² Babilɔn hene Nebukadenesa ye ahennie afoɛ bɔ ɔtɔ so buru ne ngona ne, bosome bɔ ɔtɔ so nnu ne, ye eleburu ne aso, awɛmvoɛ nemɔ aso safohene Nebusaradan bɔ osa te Babilɔn hene ye mbanyi nemɔ anu ko ne, ɔhɔle Yerusalem.

¹³ Ɔyerale AWURADE awuro ne, ahemvie ne, ɔne Yerusalem sua amukoraa, na atitire nemɔ sua ne koso, ɔtole bɛ nu see yerale bɛ.

¹⁴ Kaldeafoɛ koɛhonɛfoɛ amukoraa bɔ né bɛboka awɛmvoɛ nemɔ aso safohene ne aso ne, bebubuli Yerusalem nwo fasue ne amukoraa bɛbra beyiale.

¹⁵ Mmenia bɔ bɛ nwo yɛ anwumvo nemɔ bie, mmenia ngaa bɔ baha kuro ne aso, ɔne koɛhonɛfoɛ bɔ bɛnwatili bɛɛfale bɛ nwo bɛɛmane Babilɔn hene ne, yeɛ mmenia ne amukoraa, awɛmvoɛ nemɔ aso safohene Nebusaradan hyele bɛ nnure fale bɛ hɔle.

¹⁶ Nakoso, awɛmvoɛ nemɔ aso safohene Nebusaradan yakyili aseɛ ne aso mmenia bɔ bɛ nwo yɛ anwumvo nemɔ bie berɛ, kyɛ bɛyɔ bobe boo ne eboo ngaa nemɔ anu adwuma.

¹⁷ Na AWURADE awuro berɛ kɔɔbere bonima nemɔ, nyinasoɛ nemɔ ne kɔɔbere nzim bɔ bɛwɔ AWURADE awuro berɛ ne, Kaldeafoɛ sɛkyele bɛ, na bɛsesale kɔɔbere ne amukoraa bɛhɔle Babilɔn.

¹⁸ Bɛsesale ɛhemɔ koso bɛhɔle: ngukue nemɔ, sofi nemɔ, akapɛ bɔ bɛfa bɛtengyɛtengyɛ kanea nyamaa noa nemɔ, ndalie nemɔ, ateɛ nemɔ, ɔne kɔɔbere nningyein amukoraa bɔ bɛfa bɛyɔ asɔneyɛɛ sua nu berɛ ɛsɔnenɛ adwuma ne;

¹⁹ yeɛ komiti mmaa mmaa nemɔ, ngukue bɔ bɛfa see begua nu nemɔ, ndalie nemɔ, bua nemɔ, kanea bakaa nemɔ, ateɛ nemɔ, yeɛ kulie nemɔ. Nikyee biala bɔ bafa esikaa kɔkorɛ bayɔ ne, yeɛ nikyee biala bɔ bafa ɛdwetɛ bayɔ nemɔ koso, awɛmvoɛ nemɔ aso safohene ne sesale bɛ hɔle.

²⁰ Na bonima nyɔ nemɔ, nzim ko ne, yeɛ kɔɔbere nandwie buru ne nyɔ bɔ bɛwɔ nyinasoɛ nemɔ abo bɔ Nana Solomon yɔ siesiele AWURADE awuro berɛ ne, kɔɔbere bɔ bɛfa bɛyɔle sɔ nningyein nemɔ ne, né bɛkari a bennwu ye noa.

²¹ Bonima nemɔ, ko biala, ofi ye aseɛnwo bɔ ɔkwaadwu ye anwuro ne, ɔte agyirɛ buru ne mmɔtwɛ. Nyamaa bɔ ye tendenn te agyirɛ buru ne nyɔ yeɛ ɔkora bra ye nwo yia ɔ. Ye pipiripii nu te asaa mmɛseka nna, na né tokuro la nu.

²² Ye ti ne, né ɔte kɔɔbere abotire. Na abotire ko biala, ofi ye aseɛnwo bɔ ɔkwadwu ye anwuro ne, ɔte agyirɛ nnu. Bafa kɔɔbere bali ɛtɛen adwii ne akengaa adwii bapɛ abotire ne anwo bayia. Bonima bɔ ɔtɔ so nyɔ ne koso, sɔ ala yeɛ belili akengaa adwii beguale ye nwo ɔ.

²³ Né akengaa adwii aburahona ne nzia wɔ ye nwo nemɔ, na akengaa adwii amukoraa bɔ ɔwɔ ɛtɛen ne anwo bra yia ne, ɔte ɛyaa ko.

Bɛkye Yudafoɛ nnure bɛkɔ Babilɔn

²⁴ Na awɛmvoɛ nemɔ aso safohene ne, ɔhyele ɛhemɔ nnure: ɔsɔfo panyi Seraya, ɔsɔfo Sefania bɔ ɔsɔfo panyi nne berɛ a, ye yeɛ ɔwɔ berɛ ne, yeɛ mmenia nza bɔ bɛwɛne anoa ne nen.

²⁵ Osa hyele ɛhemɔ nnure fili kuro ne anu: panyi ko bɔ né ɔnea koɛhonɛfoɛ nemɔ aso ne, Nana (Sedekia) foɛtulɛfoɛ nemɔ anu nzoo bɔ onwuni bɛ wɔ kuro berɛ ne, koɛhonɛfoɛ nemɔ so safohene n’ahyerɛlɛniɛ bɔ ɔboaboa maen ne anu koɛhonɛfoɛ nemɔ noa, yeɛ maen ne anu mmenia aburasia bɔ onwuni bɛ wɔ kuro berɛ ne.

²⁶ Yiti awɛmvoɛ nemɔ aso safohene Nebusaradan hyele bɛ nnure fale bɛ ɔɔmane Babilɔn hene wɔ Ribla.

²⁷ Babilɔn hene maa behuhuni bɛ wɔ Ribla bɔ ɔwɔ Hamate aseɛ so ne. Yiti bɛhyele Yuda nnure befili ye bɔbɔ ye aseɛ so bɛhɔle.

²⁸ Mmenia bɔ Nebukadenesa hyele bɛ nnure fa bɛ hɔle ne, bɛ somaa ɛhe: afoɛ nzoo ne anu, né bɛte Yudafoɛ apee nza ne aburanyɔ ne nza;

²⁹ Nebukadenesa ye ahennie afoɛ bɔ ɔtɔ so buru ne mmɔtwɛ ne anu, ɔhyele mmenia ɛyaa mmɔtwɛ ne aburasa ne nyɔ fili Yerusalem hɔle;

³⁰ Nebukadenesa ye ahennie afoɛ bɔ ɔtɔ so aburanyɔ ne nza ne anu, awɛmvoɛ nemɔ aso safohene Nebusaradan hyele Yudafoɛ ɛyaa nzoo ne aburanna ne nnu nnure hɔle. Mmenia nemɔ amukoraa bɛ somaa te apee nna ɛyaa nzia.

³¹ Na ɔwale kyɛ, bɛhyele Yuda hene Yehoakyin nnure bɛhɔle ne, ye afoɛ aburasa ne nzoo ne, bosome buru ne nyɔ ne anu, ye eleburanyɔ ne nnu ne aso, afoɛ bɔ Babilɔn hene Ewile Merodake lili hene ne anu ala, onwuni Yuda hene Yehoakyin anwumvoin yele ye fili kuku nu.

³² Ɔne Yehoakyin belili ngitahoɛ paa, na ahemvo mɔ bɔ né bɛ ne ye wɔ Babilɔn ne, ɔmane ye dibea bɔ ɔtra bɛ deɛ ne ɔ.

³³ Yiti Yehoakyin puropurole ye kuku nu ndaadeɛ ne guale, na mmerɛ amukoraa bɔ né ɔte ase ne, né ɔne Ewile Merodake yeɛ bɛtena poen nwo bedidi ɔ.

³⁴ Na nningyein bɔ Yehoakyin hia ye daa biala ne wora, Babilɔn hene hɔle so fa mane ye mmerɛ bɔ ɔte ase ne, kɔpem kyɛ owuli ɔ.