Yeremia 5 - AHYERƐLƐ KRONGRON

Yerusalem ayɔ bɔne

¹ Ɛ́mɔtu amirika beli Yerusalem mmorɔnoɛ so akɔneaba, ɛ́mɔtoto bɛ nye bɛ́nea nningyein yé! Ɛ́mɔneanea ye dwaa nemɔ aso bɛ́nea, sɛ ɛmɔkonwu sona ko po bɔ ɔyɔ bɔ ɔtengyɛ ɔ, bɔ ɔpena nahorɛ si atee ɔ, amaa ɔnate so mafa Yerusalem bɔne mahyɛ ye.

² Ɔwɔ nu kyɛ bɛta ndaen kyɛ, “Kyɛ AWURADE te ase ye” de, nakoso ngondombo ndaen yeɛ bɛta ɔ.

³ Ao AWURADE, aso nna nahorɛ yeɛ wɔ nye pena kyɛ onwu ye ɔ? Ahwe bɛ so, nakoso wanyɛ bɛ yea; ahũhũ bɛ, nakoso bamva ɛhe bandu bɛ nwo foɛ, bɛ nyunu porɛ bɔ babɔ ɔ, ɔtra nyɔboɛ, na bayɛ b’adwene kyɛ bɛngɔsakyera.

⁴ Yeɛ ngane kyɛ, “Amba, mmenia hemɔ bɛyɛ anwumvo, adwene nne bɛ ti anu, ofikyɛ bɛnze AWURADE atee ne, ɔne bɛ Nyameɛ mmeraa ne.

⁵ Ngɔhɔ atitirefoɛ nemɔ berɛ, ngoodwudwo ngohyire bɛ; ofikyɛ bɛ de, bɛse AWURADE atee ne, ɔne bɛ Nyameɛ mmeraa ne.” Ofikyɛ bɛ mukoraa babubu kɔnnua ne anu, yeɛ babubu wɔ panwu ne anu.

⁶ Yiti gyata kofi ɛhɔayeɛ nu koohũhũ bɛ, pataku kofi ɛserɛ so kɔɔtete bɛ nu pasapasa. Aboa tetɛ bɛ wɔ bɛ nguro nemɔ aso, na ebiala bɔ okofi kuro ne anu kofite ne, ɔkɔtete ye nu pasapasa, ofikyɛ bɛ mmeraatolɛ sone, na b’asefinɛ ne te piri.

⁷ “Ɛhe de, ɔkɔyɛ sɛɛ né mafa wɔ bɔne mahyɛ wɔ? Wɔ mma mɔ bapo me, na bafa bɛ bɔ nna nyameɛ mɔ ahɔ ɔ bata ndaen. Mmane bɛ ko yili ne, bɛbɔle adwaman, na betuli bi bɛhɔle gyanderafoɛ awuro.

⁸ Bɛte pɔngɔ nyii branoa bɔ bekuro mmraa, bɔ ebiala sɔ obiɛngo aye nwo mverɛ ɔ.

⁹ Aso onni kyɛ metwe bɛ so wɔ sɔ nningyein hemɔ nwo anaa? AWURADE noa dwirɛ ɛne. Na maen bɔ ɔte sɔa, onni kyɛ metɔ bɛ so wereɛ anaa?

¹⁰ “Ɛ́mɔfo bɛhɔ ye bobe boo nemɔ anu bɛɛsɛkye bɛ, nakoso nnɛma ɛmɔsɛkye ye mukoraa bɔkɔɔ; ɛ́mɔpomba ye maen nemɔ, ofikyɛ nna AWURADE deɛ ɔ.

¹¹ Ofikyɛ Yisrael awuro ama ne Yuda awuro ama, banni nahorɛ bamma me koraa, AWURADE noa dwirɛ ɛne.

¹² Bapɛ AWURADE nwo ngondombo, na bahã kyɛ, ‘Ɔngɔyɔ huu, edwirɛ tɛɛ biala ngɔto yɛ, koɛ ngɔto yɛ, yeɛ ɛhɔen koso ngɔwa.

¹³ Ngɔmhyɛlɛfoɛ nemɔ, bɛte mvrama mbaen, ofikyɛ edwirɛ ne, ɔnne bɛ nu. Bɛ noa dwirɛ ne kɔbɔ bɛ bɔbɔ bɛ ti so!’”

¹⁴ Yiti AWURADE, Asafo Nyameɛ nwa: “Ɔnate kyɛ ɛmɔkã sɔ dwirɛ ne ati, tie, ngɔma me dwirɛ ne kɔkakyi see wɔ wɔ noa nu; maen he kɔkakyi eyein, na see kɔyera bɛ dwɛɛ.

¹⁵ Ao Yisrael awuro ama, ɛ́mɔtie, méma maen bie bɔ ofi dedeede ɔ ɔfa koɛ ɔbateta ɛmɔ, AWURADE noa dwirɛ ɛne. Ɔte maen bɔ ye nwo yɛ se ɔ, ɔte daa tete maen, maen bɔ ɛnde ye dwudwolɛ, bɔ ɛnde bɔ ɔkã ne abo ɔ.

¹⁶ B’agyaen ndokue ne, ɔte kyɛ asieleɛ kumaa bɔ so la berɛ ɔ; bɛ mukoraa bɛte katakyie.

¹⁷ Bekoli wɔ fieso aleɛ ne w’aleɛ; bekohũhũ wɔ mma mmienzua ne wɔ mma mmrasua; bekohũhũ wɔ mmoaen ne wɔ nandwie mɔ bekoli, bekobubu wɔ bobe ne borɔdoma mmakaa bekogua; wɔ nguro bɔ ato bɛ nwo fasue, bɔ afa wɔ wora awura bɛ nu ne, bɛkɔfa ngrandɛ bɛkɔsɛkye bɛ.

¹⁸ “Nakoso AWURADE nwa nyoo: Sɔ mmerɛ nemɔ anu po, mengonua ɛmɔ boso bɔkɔɔ.

¹⁹ Na ɔkɔwa kyɛ, sɛ wɔ mmenia nemɔ bisa kyɛ, ‘Nzu ati yeɛ AWURADE yɛ Nyameɛ wafa sɔ nningyein he amukoraa wali yɛ ne?’ a, bua bɛ kyɛ, ‘Kyɛbɔ ɛmɔapo me baaso nyameɛ foforɛ mɔ wɔ ɛmɔ maen ye anu ne, sɔ ala yeɛ ɛmɔkɔso ɛwɔfoɛ mɔ wɔ aseɛ bɔ nna ɛmɔ deɛ ahɔ ɔ so ɔ.’ ”

²⁰ Ɛ́mɔbɔ ye dawure wɔ Yakob awuro, ɛ́mɔfa bɛ́to dwaa wɔ Yuda kyɛ,

²¹ “Ɛ́mɔtie ɛhe, mmenia ngwaseafoɛ bɔ ɛmɔlle adwene ɔ, mmenia bɔ bele anyeɛ, nakoso bennwu nikye ɔ, bɔ bele asoɛ, nakoso bɛnde dwirɛ ɔ.

²² “Aso ɛmɔnzuro me? AWURADE noa dwirɛ ɛne. Aso ɛmɔ nwo nwosowoso ɛmɔ wɔ me nyunu? Me bɔ mvale anweaa ndole ɛwɛen mmane ɛpo, ɛwɛen bɔ otimu berɛ afebɔɔ bɔ ɔngora ye tra ɔ; ɔwɔ nu kyɛ asorɔkye bɔ, nakoso ɔngora mmɔ ndra ye; asorɔkye bu fa so, nakoso ɔngora mmu mva ɛwɛen ne aso.

²³ Nakoso sɔ maen he, asoserɛ ne ɛlɔenyɛlɛ ali bɛ ti; bali makyebu bafa bɛ bɔbɔ b’atee so.

²⁴ Bɛndwene ye nwo kyɛ, ‘Ɛ́mɔma yɛsuro AWURADE yɛ Nyameɛ bɔ ɔma esue tɔ wɔ mmerɛ bɔ ɔsɛ ɔ nu, bamborɔ ne nyenyenzue, ná ɔnea kyɛ fieso nningyein koti mmerɛ bɔ yeɛ ɔsɛ ɔ nu.’

²⁵ Ɛmɔ amumuyɛɛ ama sɔ nhyehyɛleɛ nemɔ asesã, na ɛmɔ bɔne ama nningyein paa abɔ ɛmɔ.

²⁶ Ofikyɛ bɔnefoɛ bafra me mmenia nu; bɛtetɛ kyɛ ebie bɔ osua nnomaa ngaen ɔ, besunzua ngaen bɛfa bɛkye mmenia.

²⁷ Kyɛbɔ nnomaa ayi kɛndɛngu nu to ne, sɔ ala yeɛ nnakannaka ayi b’awuro mɔ nu to ɔ; yiti bayɛ atitire, yeɛ banya bɛ nwo tam.

²⁸ Bayɛ branoa totwetotwee. Amba, bedi nzɛmmɔne bɛtra so; bemmua nyisiaafoɛ ndɛen bɔ ɔtengyɛ ɔ, nakoso sɔ mmenia nemɔ benya bɛ nwo, yeɛ bɛnga bie bɛmma bɛ bɔ bɛyɛ anwumvo ɔ.

²⁹ Aso onni kyɛ metwe bɛ so wɔ sɔ nningyein hemɔ nwo anaa? AWURADE noa dwirɛ ɛne. Na maen bɔ ɔte sɔaa, onni kyɛ metɔ bɛ so wereɛ anaa?”

³⁰ Edwirɛ bɔ ɔyɛ suro ná ɔma bɛ nwo dwiri bɛ ɔ yeɛ wape maen ne anu ɔ:

³¹ ngɔmhyɛlɛfoɛ nemɔ bedi ngɔndorɔ, yeɛ asɔfo nemɔ bedi bɛ bɔbɔ bɛ ti piri; na sɔ yeɛ me maen ne kuro ɔ, nakoso odwu ayieleɛ ne a, ɛmɔkɔyɔ ye sɛ?