Yeremia 48 - AHYERƐLƐ KRONGRON

Nyameɛ bua Moabo ndɛen

¹ Bɔ Asafo AWURADE, Yisrael Nyameɛ kã fa Moabo nwo ɛhe: Nebo, wɔ yaakɔ oo! Ofikyɛ wabɔ! Kiriatim nyunu agua ase, na bahye ye bahɔ, anwoserɛ afealeɛ ne nyunu agua ase, na badwiri bagua.

² Bɛngɔkamvo Moabo ko. Bɛbɔle ye nwo porɛ wɔ Hesebon kyɛ, ‘Ɛmɔbra maa yɛnua ye boso, bɔ ɔngɔyɛ maen ko ɔ!’ Wɔ, kuro bɔ bɛfrɛ wɔ Mademen koso, bɛkɔmaa ɛkɔhã wɔ noa kɔto nu, na ngrandɛ ne kɔfoa wɔ.

³ Tie, komviɛ bie tea nu fi Horonaim kyɛ, ‘Ɛsɛkyelɛ ne kurobɔlɛ piri!’

⁴ Moabo abɔ; ye mma mmaa mmaa bɛteatea nu maa bate bɛ komvi.

⁵ Ofikyɛ Luhite pambaa ne, bele esuɛ yeɛ bɛkɔfo ɔ, na Horonaim nekaa bɔ bɛtorotoro ne, pɔfoɛ nemɔ ate awuyebɔlɛ serɛserɛ.

⁶ Ɛ́mɔnwati, ɛ́mɔpena ɛmɔ ti bédidi nu, ná ɛ́mɔyɛ kyɛ ɛserɛ so afunum.

⁷ Ofikyɛ, ɔnate kyɛ afa wɔ nwo ato wɔ nnwumaa ne wɔ anwonyadeɛ so ne ati, wɔ koso bɛkɔhye wɔ bɛkɔhɔ; na bɛkɔhye Kemose nnure bɛkɔhɔ, ɔne ye asɔfo mɔ ne ye atitire mɔ bɔ bɛboka ye so ɔ.

⁸ Sɛkyefoɛ ne kɔwa kuro biala so, kuro biala ngonya ye nwo ngɔtete; bɔnza ne kɔbɔ tɔɔ, na bɛkɔsɛkye aseɛ pralaa ne, kyɛbɔ AWURADE ahã ne ala.

⁹ “Ɛ́mɔma Moabo ndaa maa otu ɔnwati hɔ, ofikyɛ ye nguro nemɔ kɔyɛ kurofoen, bɔ sona fee ɔtte so ɔ.

¹⁰ Ebiala bɔ ɔnde ye nye nyɔ AWURADE adwuma ne, ɛnomalɛ bra ye so, na ebiala bɔ ɔtwe ye ngrandɛ sa, bɔ ɔmva nga mogya ngua ne, ɛnomalɛ bra ye so.

¹¹ “Moabo atena asomdwee nu fi ye ngwadaa nu, wayɛ kyɛ nzaa bɔ ye pue ne la ye bo ɔ; banhwie ye bamvi akotokyiwa ko anu bangua foforɛ nu, yeɛ bangye ye nnure bangɔ. Yiti ye fɛɛ ne tɛgyi ye nu, na ye fona ne, ɔssesane.

¹² “Yiti, ɛ́mɔtie, mmerɛ bie ɔ́ba bɔ ngɔsoma bɛ bɔ behwiehwie nzaa ɔ maa bɛkɔwa ye so bekoohwie ye. Bekohwie bɔ ɔwɔ ye akotokyiwa ne anu bekogua, ná babobɔ bɛ ndowaa nemɔ, AWURADE noa dwirɛ ɛne.

¹³ Afei Kemose nwo kɔyɛ Moabo nya, kyɛbɔ Betel bɔ ɔte Yisrael awuro ama mɔ b’anyelasoɛ ne, ye nwo yɛle Yisrael awuro ama mɔ nya ne.

¹⁴ “Ɔyɛ sɛɛ bɔ ɛmɔkekã kyɛ, ‘Yɛte katakyiefoɛ ne koɛhonɛfoɛ ahoneserɛfoɛ’ ɔ?

¹⁵ Moabo abɔ, na sɛkyefoɛ ne wafo wahɔ ye nguro nemɔ anu, na ye mmerandeɛ bɔ baneanea nu baye bɛ nemɔ, baahu bɛ wɔ akumyɛɛ, Ɛhene ne, bɔ ye dumaa ole Asafo AWURADE ne, ye noa dwirɛ ɛne.

¹⁶ Moabo sɛkyelɛ ne wapingye, na ye amaneɛnwunɛ ne, ɔba ndɛndɛ.

¹⁷ Ɛmɔ bɔ ɛmɔpingye ye amukoraa, ɛ́mɔsu ye, ɛmɔ bɔ ɛmɔse ye dumaa ɔ amukoraa, ɛmɔhã kyɛ, ‘Ɔwale ye sɛ bɔ ɛhɔtɔ serɛserɛ bɔ ɔte pɔmaa nyemene ne, nu abubu ye?’

¹⁸ “Wɔ, baa brasua bɔ ɛte Dibɔn ɔ, fi w’animnyam ne anu dwu bra, ná baatena aseɛ katerepee so! Ofikyɛ Moabo sɛkyefoɛ ne kɔwa wɔ so, na ɔkɔsɛkye w’anwoserɛ afealeɛ mɔ.

¹⁹ Wɔ bɔ ɛte Aroye ɔ, gyina atee ne anoa ná tetɛ; bisa bienzua bɔ ɔnwati ne brasua bɔ ɔnwati pena ye ti didi nu ne kyɛ, ‘Nzikyɛ dwirɛ yeɛ wasi ɔ?’

²⁰ Moabo nyunu agua ase, ofikyɛ badwiri ye bagua ase: ɛ́mɔbɔ awuye ná ɛ́mɔsu! Ɛ́mɔbɔ ye dawure wɔ Anɔn kyɛ Moabo abɔ.

²¹ Babua aseɛ pralaa ne, ɔne nguro hemɔ ndɛen: Holon, Yahasa, Mefaate,

²² Dibɔn, Nebo, Bete Diblatayim,

²³ Kiriatim, Bete Gamul, Bete Meon,

²⁴ Keriote, Bosra ne Moabo aseɛ so nguro amukoraa, bɔ bepingye ne bɔ bɛwɔ dede ɔ.

²⁵ Bapɛ Moabo mmɛen ne bafi berɛ, yeɛ babu ye sa nu, AWURADE noa dwirɛ ɛne.

²⁶ Ɛ́mɔma ɔbo (nzaa), ofikyɛ ɔmomane ye nwo so hyirele AWURADE. Yiti Moabo kɔla ye feɛ nu, na ye koso bɛkɔgoro ye nwo.

²⁷ Aso Yisrael nwo anyɛ wɔ sere? Aso enwuni ye wɔ awuefoɛ nu, bɔ daa biala ɛkã ye dwirɛ a, né ɛwosowoso wɔ ti ye?

²⁸ “Ɛmɔ bɔ ɛmɔtete Moabo, ɛ́mɔtu béfi nguro nemɔ aso bɛɛtena nyɔbotaen nemɔ anu, ɛ́mɔyɛ kyɛ abubure bɔ ɔnwo ye saen wɔ kumaa noa ye ngyɛnu ɔ.

²⁹ Yate Moabo anwomasoɛ (ɔmoma ye nwo so paa), ye dwɛɛ, ye ahandaen, ye anwomasoɛ, ɔne ye ahone nu aniammɔwoho nwo dwirɛ.

³⁰ Mese ye aniammɔwoho ne, nakoso ye anwomasoɛ ne ngonzi hwee, yeɛ ye yɔleɛ ne te ngondombo, AWURADE noa dwirɛ ɛne.

³¹ Yiti ngɔbɔ Moabo nwo awuye, na ngosu Moabo amukoraa, m’ahone kɔbɔ Kire Heresefoɛ nwo awuye.

³² Ao Sibima bobe, ngosu wɔ kyɛ mesu Yasere ɔ! Wɔ mmaen trɛtrɛle fale ɛpo so, bɛtrɛ bekodwu Yasere ɛpo ne po; sɛkyefoɛ ne, watu ye nye wasie wɔ borɔdoma mma ne wɔ bobe mma so.

³³ Baye anika ne anigye bafi aseɛ bɔ ɔkye aleɛ ne aso, ɔne Moabo aseɛ so, na mama nzaa bo apɛ wɔ nekaa bɔ betwi nzaa nemɔ. Ebiala ngohwi nzaa ngɔbɔ ese, na bɛ ndeateamuɛ ne ngɔyɛ esebɔlɛ.

³⁴ “Bɛteatea nu befi Hesebon bekodwu Eleale ne Yahase. Bɛteatea nu befi Soa bekodwu Horonaim ne Eglate Selisiya, ofikyɛ Nimrim nzue po wawewe.

³⁵ Afei koso, ebiala bɔ ɔbɔ afɔleɛ wɔ asɔneyɛɛ mɔ so, ɔne ebiala bɔ ɔyera ɛyɛɛ ma ye nyameɛ mɔ ne, ngonua ye boso wɔ Moabo, AWURADE noa dwirɛ ɛne.

³⁶ Yiti m’ahone koli Moabo nwo aworabɔlɛ kyɛ atɛndɛbɛn nu dwein, na m’ahone koli Kire Heresefoɛ nwo aworabɔlɛ kyɛ atɛndɛbɛn nu dwein, ofikyɛ anwonyadeɛ bɔ wanya ye ne, watu wamini.

³⁷ “Yiti, tire biala so kɔpa, bɛkɔpoa kanza biala, bɛkɔtete asaa biala nwo, ná bafa ɛsɛen tena bapɛ bɛ bo.

³⁸ Na awuyebɔlɛ ngome yeɛ bɛkɔte ye wɔ Moabo sua amukoraa so, ɔne mmorɔnoɛ mɔ so ɔ, ofikyɛ mabɔ Moabo kyɛ kukue bɔ ebiala nye ngye ye nwo ɔ, AWURADE noa dwirɛ ɛne.

³⁹ Nea kyɛbɔ basi badwiri ye bagua ase ɔ! Nea kyɛbɔ besi bɛbɔ awuye ɔ! Nea kyɛbɔ Moabo le animguaseɛ wakakyi ye kɔme asi ɔ! Yiti Moabo ayɛ ngorohoɛ nikye ne anwodwiri nikye wɔ bɛ bɔ bapɛ ye nwo bayia amukoraa bɛ nye so.

⁴⁰ Ofikyɛ AWURADE nwa nyoo: “Tie, okotu kyɛ kɔleɛ, ná watrɛ ye ndaa nu wɔ Moabo so.

⁴¹ Bali Keriote so ngonim, yeɛ bale anwoserɛ afealeɛ nemɔ, na sɔ kyẽa ne, Moabo anwoserɛfoɛ bɛ kra kɔnwati kofi bɛ nwo, kyɛ brasua bɔ wafo aworɛ so ɔ ye deɛ.

⁴² Na bɛkɔbɔ Moabo bɔ ɔngɔyɛ maen ko ɔ, ofikyɛ wama ye nwo so watia AWURADE.

⁴³ Wɔ, Moaboniɛ, ahunundetelɛ, kumaa ne ngaen la berɛ ɔnwondɛ ɔ! AWURADE noa dwirɛ ɛne.

⁴⁴ Bɔ ɔkɔnwati ahunundetelɛ ne, ɔkɔtɔ kumaa ne anu, yeɛ bɔ ɔkɔfo kofi kumaa ne anu ne, ngaen ne kɔhye ye. Ofikyɛ ngɔma sɔ nningyein nemɔ kɔwa Moabo so, wɔ b’asohwenɛ afoɛ ne anu, AWURADE noa dwirɛ ɛne.

⁴⁵ “Bɛ bɔ bɛnwatili ne, bɛɛbɔle bɛ nwo adwaa wɔ Hesebon fɔnwoo nu, ɔnate b’anwoserɛ bɔ wayie ne ati. Nakoso see kofi Hesebon kɔwa, na see bɔ ogye kofi Sihon kɔwa kɔɔyera Moabo ye nwoma so, ɔne basabasayɔlɛfoɛ bɛ ti afia.

⁴⁶ Ao Moabo, wɔ yaakɔ! Kemose maen ne wabɔ, ofikyɛ bahye wɔ mma mmienzua mɔ nnure bahɔ, yeɛ bahye wɔ mma mmrasua mɔ nnure bahɔ.

⁴⁷ Nakoso ngyẽa bɔ oli nziɛ ne, ngɔfa Moabo ngofi nnurehyelɛ nu ngosa ngɔwa, AWURADE noa dwirɛ ɛne.” Moabo ndɛenbualɛ ne, ye ayieleɛ ɛne.