Yeremia 43 - AHYERƐLƐ KRONGRON

Bɛkye Yeremia bɛkɔ Misraim

¹ Na ɔwale kyɛ, AWURADE bɛ Nyameɛ dwirɛ amukoraa bɔ AWURADE bɛ Nyameɛ fa tuale Yeremia noa kyɛ ɔhã hyire maen ne amukoraa ne, ɔfa tole bɛ nyunu yiele nen,

² Hosaya awa Asaria ne Karea awa Yohanan ne mmienzua anwomasoɛfoɛ nemɔ amukoraa besele Yeremia kyɛ, “Ɛlaka, AWURADE yɛ Nyameɛ wanzoma wɔ kyɛ ɛɛhã kyɛ, ‘Nnɛma ɛmɔkɔ Misraim bɛkɔtena dɔ.’

³ Nakoso Neria awa Baruku yeɛ opiapia wɔ maa ɛyɔ bɔ otia yɛ ɔ, kyɛbɔ ɔkɔyɛ bɔ ɔkɔfa yɛ kowura Kaldeafoɛ nemɔ sa, amaa ɔnate so bahũhũ yɛ anaa bahye yɛ nnure bafa yɛ bahɔ Babilɔn ɔ.”

⁴ Yiti Karea awa Yohanan, koɛhonɛfoɛ so safohene nemɔ amukoraa ne maen ne amukoraa bandie AWURADE noa dwirɛ, kyɛ bɛkɔtena Yuda aseɛ so ɔ.

⁵ Nakoso Yudafoɛ ngaa amukoraa bɔ bɛfoane bɛ maa bɛbɔle aya bɛhɔle maen maen amukoraa so, bɔ né bafi dɔ basa bawa baatena Yuda aseɛ so ne, Karea awa Yohanan ne koɛhonɛfoɛ so safohene nemɔ amukoraa, bɛsesale bɛ:

⁶ mmienzua, mmrasua, ngwadaa, ɛhene mma mmrasua, yeɛ sona biala bɔ awɛmvoɛ nemɔ aso safohene Nebusaradan yakyili ye berɛ fa wurale Safan awa Ahikam awa Gedalia sa ne, yeɛ afei ngɔmhyɛlɛniɛ Yeremia ne Neria awa Baruku,

⁷ na bɛ ne bɛ hɔle Misraim aseɛ so, ofikyɛ bandie AWURADE noa dwirɛ; na beedwuli Tapenese.

⁸ Yeɛ AWURADE lale ye dwirɛ ali hyirele Yeremia wɔ Tapenese kyɛ,

⁹ “Fa nyɔboɛ mbiri mbiri tira wɔ sa nu, na atee bɔ bafa mmerekese bahyehyɛ bɔ ɔwɔ Faro ahemvie anoanu berɛ wɔ Tapenese ne, fa nyɔboɛ nemɔ fea nnɛterɛ nu bɔ Yudafoɛ bɛ nye tua ɔ.

¹⁰ Na kã kyire bɛ kyɛ, ‘Asafo AWURADE, Yisrael Nyameɛ nwa nyoo: Ɛ́mɔtie, ngɔsoma ngɔɔfa me somvoɛ Babilɔn hene Nebukadenesa, na ngɔfa ye ahennie bia ngosie nyɔboɛ hemɔ bɔ mafa mafea ne aso, na ɔkɔfa ye ahennie akyiniwaa kɔkata bɛ so.

¹¹ Ɔkɔwa kɔɔsɛkye Misraim maen ne, na bɛ bɔ bɛfata ewue ne, ɛhunɛ yeɛ bekohu bɛ ɔ, bɛ bɔ bɛfata nnurehyelɛ ne, bɛkɔhye bɛ nnure, bɛ bɔ bɛfata ngrandɛ ne, bɛkɔtɔ ngrandɛ noa.

¹² Ngɔfa see ngɔto Misraim nyameɛ mɔ b’asɔneyɛɛ sua nemɔ anu. Nebukadenesa kɔyera bɛ kɔhye bɛ nnure kɔhɔ. Na ɔkɔfa Misraim aseɛ kɔhera, kyɛbɔ mmoaenneafoɛ ɔfa ye tena ɔkera ɔ. Na okofi berɛ kɔhɔ asomdwee nu.

¹³ Okobubu Bete Semese amoen nemɔ bɔ bɛwɔ Misraim aseɛ so ne, na ɔkɔfa see kɔyera Misraim nyameɛ nemɔ.’ ”