Yeremia 41 - AHYERƐLƐ KRONGRON

Beku Gedalia

¹ Na ɔwale kyɛ, bosome nzoo ne anu, Yismael bɔ ye baba ole Netania, bɔ ye baba ole Elisama bɔ ofi nnehyeɛ abusua nu ne, ɔne ɛhene ye mbanyi nemɔ buru bɛhɔle Ahikam awa Gedalia berɛ wɔ Misepa. Na mmerɛ bɔ bɛte aleɛ nwo bedidi ne,

² Netania awa Yismael ne mmienzua buru bɔ bɛboka ye so ne, bedwɔsole bɛfale ngrandɛ behuni Gedalia bɔ ye baba ole Ahikam, bɔ ye baba ole Safan, bɔ Babilɔn hene wafa ye wali aseɛ ne aso amrado ne.

³ Asa koso, Yismael huhuni Yudafoɛ amukoraa bɔ né bɛ ne Gedalia wɔ Misepa ne, yeɛ Kaldea koɛhonɛfoɛ bɔ né bɛwɔ berɛ ne.

⁴ Ohuni Gedalia ne, ye elenyɔ ne aso bɔ né ebiala onnya ɔttele edwirɛ ne anwo bie ne,

⁵ mmienzua aburawɔtwɛ biemɔ fili Sɛkem ne Silo ne Samaria bɛwale. Né bapoa bɛ kanza, basunzua bɛ ndaadeɛ nu, yeɛ batete bɛ nwonaen, bɔ bɛfale aburoo afɔleɛ ne ɛyɛɛ kyɛ bɛ́fa bɛba AWURADE awuro berɛ.

⁶ Na Netania awa Yismael le esuɛ alaa fili Misepa ooyiale bɛ. Oyiale bɛ ne, osele bɛ kyɛ, “Ɛmɔbra Ahikam awa Gedalia berɛ.”

⁷ Bewurale kuro ne anu nen, Netania awa Yismael ɔne mmienzua bɔ bɛboka ye so ne, behuhuni bɛ begyili bɛ beguale abura bie anu.

⁸ Nakoso bɛ nu mmienzua buru biemɔ hã hyirele Yismael kyɛ, “Nnɛku yɛ, ofikyɛ yɛle atokoɔ, ayuo, ngoo ne woɛ wɔ fieso.” Yiti ɔyakyili, na wangu bɛ wammoka bɛ mmango nemɔ aso.

⁹ Mmienzua amukoraa bɔ ɔnate Gedalia ti Yismael huhuni bɛ ne, abura bɔ ogyili bɛ fuin nemɔ guale nu ne, ye ole abura bɔ Yisrael hene Baasa nwo suronyi ti Nana Asa tuli ne. Na Netania awa Yismael fale bɛ bɔ ohuni bɛ ne yili ye to.

¹⁰ Yeɛ Yismael hyele ɛhemɔ nnure: mmenia ngaa bɔ baha Misepa ne amukoraa, ɛhene mma mmrasua, yeɛ mmenia ngaa amukoraa bɔ baha Misepa bɔ awɛmvoɛ nemɔ aso safohene Nebusaradan wafa bɛ wawura Ahikam awa Gedalia sa ne. Netania awa Yismael hyele bɛ nnure, na osili nu kyɛ ɔfa bɛ kɔ Amonfoɛ mɔ dɔ.

¹¹ Nakoso mmerɛ bɔ Karea awa Yohanan, yeɛ koɛhonɛfoɛ so safohene amukoraa bɔ bɛboka ye so ne, bɛtele bɔne amukoraa bɔ Netania awa Yismael wali nen,

¹² bɛfale bɛ koɛhonɛfoɛ amukoraa kyɛ bɛkwaafa koɛ bɛtoa Netania awa Yismael. Bɛɛtole ye wɔ ɛkwaa piri bɔ ɔwɔ Gibeon ne anwo.

¹³ Na ɔwale kyɛ, mmenia amukoraa bɔ né bɛ ne Yismael wɔ berɛ ne, benwuni Kerea awa Yohanan, ɔne koɛhonɛfoɛ so safohene amukoraa bɔ bɛboka ye so nen, bɛ nye gyele.

¹⁴ Yiti mmenia bɔ Yismael wahye bɛ nnure wafi Misepa ne amukoraa, besale bɛ si bɛwale, na bɛhɔle Karea awa Yohanan dɔ.

¹⁵ Nakoso Netania awa Yismael ne mmenia mmɔtwɛ bɛnwatili befili Yohanan sa nu bɛhɔle Amonfoɛ dɔ.

¹⁶ Na mmerɛ bɔ Netania awa Yismael huni Ahikam awa Gedalia yiele ne, ɔhyele mmenia ngaa bɔ bahã bɔ bɛte koɛhonɛfoɛ, mmrasua, ngwadaa ne sayɛɛ mɔ fili Misepa hɔle. Na Karea awa Yohanan ne koɛhonɛfoɛ so safohene mɔ amukoraa bɔ bɛboka ye so ne, bɛpepɛ belele bɛ befili Yismael sa nu, na Yohanan fa bɛ fili Gibeon sa hɔle.

¹⁷ Na befili berɛ bɛhɔle bɛɛtenane Gerute Kimham bɔ opingye Betlehem ne. Na bɛyɛle b’adwene kyɛ bɛkɔtoa so bɛkɔhɔ Misraim,

¹⁸ ɔnate Kaldeafoɛ nemɔ ati. Né besuro bɛ, ofikyɛ né Netania awa Yismael wahũ Ahikam awa Gedalia bɔ Babilɔn hene fale ye yɛle maen ne aso amrado ne.