Yeremia 4 - AHYERƐLƐ KRONGRON

¹ “Ao Yisrael, sɛ ekosa kɔwa a, sa bra me berɛ, AWURADE noa dwirɛ ɛne. Sɛ ɛye w’akyiwadeɛ nningyein nemɔ fi me nyunu, ná w’adwene anyɛ wɔ ndaa ndaa,

² ná sɛ ɛta ndaen kyɛ, ‘Kyɛ AWURADE te ase ye!’ wɔ nahorɛ nu, pɛpɛɛpɛyɛlɛ nu ne tenenee nu a, ye de, maen maen mɔ bekonya bɛ saleɛ wɔ ye nu, na ye nu yeɛ bekonya b’animnyam ɔ.

³ Ofikyɛ bɔ AWURADE kã kyire Yudafoɛ ne Yerusalemfoɛ ɛhe: Ɛ́mɔso ɛmɔ mvofoen nemɔ, na nnɛma ɛmɔdua nningyein wɔ mmowue mmowue nu.

⁴ Ao Yudafoɛ ne Yerusalemfoɛ, odi kyɛ ɛmɔye ɛmɔ ahone nwo bɔne ndwirahoɛ ne wɔ AWURADE nyunu, kyɛbɔ bɛpɛ sona ye bienzua ɔ, Wanyɛ sɔ a, m’ahone kohu kyɛ see, na okogye alaa bɔ ebiala ngɔhora ye nua ɔ, ɔnate ɛmɔ bɔne yɔleɛ ne ati.

⁵ Ɛ́mɔfa bɛ́to dwaa wɔ Yuda, ná ɛ́mɔbɔ ye dawure wɔ Yerusalem kyɛ, “Ɛ́mɔhu totorobɛndo bɛ́fa aseɛ ne aso; ɛ́mɔtea nu bɛhã kyɛ, ‘Ɛ́mɔboaboa ɛmɔ noa maa yɛhɔ nguro bɔ bato bɛ nwo fasue nemɔ aso!’

⁶ Ɛ́mɔfa frangaa bɛ́pena berɛ ma ye nye hyire Sion. Ɛ́mɔnwati bɛɛbɔ ɛmɔ nwo adwaa, nnɛma ɛmɔgyina berɛ, ofikyɛ mebaafa musue ne amaneɛ kandinga paa mefi sorɔ dɔ meba.

⁷ Gyata bie afi ye sosorɛ bo wafite, na maen maen sɛkyelɛniɛ ne, waye ye ti ɔba; wafi ye atenaleɛ berɛ ɔba, kyɛ ɔbaabɔ wɔ maen ne; na wɔ nguro nemɔ kɔkakyi kurofoen, bɔ sona biala ngɔtena so ɔ.

⁸ Ɔnate ɛhe ati, ɛ́mɔhera ɛsɛen tena, ɛ́mɔbɔ awuye ná ɛmɔsu: ofikyɛ AWURADE yaa kandinga bɔ wafɛ ye yɛ so ne, ye ahone ɔttɔle nzue nu.”

⁹ AWURADE nwa nyoo, “Ɔkɔwa kyɛ, sɔ kyẽa ne, ahunundetelɛ kɔtɔ ɛhene ne ye mbanyi mɔ so, asɔfo nemɔ nwo kodwiri bɛ, na ɔkɔyɛ ngɔmhyɛlɛfoɛ nemɔ suro.”

¹⁰ Yeɛ ngane kyɛ, “Aa, AWURADE Nyameɛ, ye de, amba alakalaka maen ye ne Yerusalem, ofikyɛ ɛhane kyɛ, ‘Okoyie ɛmɔ yé’, wɔ aberɛ bɔ ngrandɛ la bɛ komvi ɔ.”

¹¹ Sɔ mmerɛ ne, bɛkɔhã bekohyire maen he ne Yerusalem kyɛ, “Mvrama hyerɛhyerɛ bie kɔbɔ kofi mmokaa pralaa nemɔ aso, wɔ ɛserɛ so kɔhɔ me maen mmaa so, bɔ ongohuhu bɛ so yeɛ ɔngɔte bɛ nwo ɔ.

¹² Mvrama bɔ ye noa yɛ se ɔ, okotu kofi dɔ kɔwa kɔma me. Afei, me yeɛ medwudwo mebɔ bɛ kwaadu ɔ.”

¹³ Nea! Ɔfo ba kyɛ munungum, ye teaseɛnam mɔ te kyɛ mvrama bɔ ɔpɛ ye nwo ɔ; ye mbɔngɔ mɔ nwo yɛ nyera tra kɔleɛ mɔ; edwirɛ ato yɛ oo, ofikyɛ yɛ maen ne abɔ oo!

¹⁴ Ao Yerusalem, nwunzi w’ahone nwo fi bɔne nu, amaa ɔnate so anya wɔ ti adidi nu. Ɔkwaadwu kyinzu yeɛ ɛkɔhɔ so kɔdwene bɔne adwene ɔ?

¹⁵ Ofikyɛ komviɛ bie tea nu fi Dan, na ɔbɔ amaneɛnwunɛ nwo dawure fi Efraim bokaa ne aso.

¹⁶ Ɛ́mɔbɔ maen maen mɔ kɔkɔ, ɛ́mɔbɔ ye dawure wɔ Yerusalem kyɛ, Pɔfoɛ mɔ befi maen bie aso dedeede bɛ́ba, bɛtea nu begua Yuda nguro nemɔ aso.

¹⁷ Bapɛ ye nwo bayia kyɛ ahwɛsofoɛ bɔ bɛnea eboo ɔ, ofikyɛ wayɛ me nwo lɔen, AWURADE noa dwirɛ ɛne.

¹⁸ W’atee bɔ ɛnate so, ɔne wɔ yɔleɛ yeɛ wama edwirɛ he ato wɔ ye. W’asefinɛ ɛne! Nea ye yealɛ! Ye yealɛ ne wahã w’ahone.”

Yeremia di ye maen nwo aworabɔlɛ

¹⁹ Me kunu tete me, me kunu tete me! Ahunundetelɛ atɔ me so. M’ahone yɛ me hwimhwim. Mengora me noa kã to nu; ofikyɛ mete totorobɛndohulɛ nga, mete koɛ nga.

²⁰ Amaneɛnwunɛ toa amaneɛnwunɛ so, ofikyɛ maen ne abɔ bɔkɔɔ. Mvum nu, me tena sua mɔ basɛkyesɛkye, yeɛ me mbɛmuɛ tena mɔ basɛkye amono nu.

²¹ Ɔkwaadwu kyinzu yeɛ ngonwu frangaa ne, ná ngɔte totorobɛndo nga ɔ?

²² Ofikyɛ me maen te mmenia ngwaseafoɛ, bɛnze me; bɛte mmaa bɔ bagyimi, bɔ belle nimdeɛ koraa ɔ. Babe wɔ bɔne yɔlɛ nu, nakoso nikye paa de, bɛnze ye yɔ.

²³ Ndole me nye nneane aseɛ so, na yieee, né ɔte sesakaa, bɔ nikye fee nne so ɔ; nneane ewienu, na né kanea nne berɛ.

²⁴ Ndole me nye nneane mmokaa nemɔ aso, na yieee, né bɛwosowoso; na né pambaa nemɔ bɛpo biribiri.

²⁵ Ndole me nye nneane, na yieee, né sona biala nne berɛ, na né ewienu nnomaa amukoraa banwati.

²⁶ Ndole me nye nneane, na yieee, né aseɛ bɔ ɔkye aleɛ ne wakakyi ɛserɛ, na ye nguro amukoraa bakakyi kurofoen wɔ AWURADE nyunu, wɔ ye ɛyaa piri ne anyunu.

²⁷ Ofikyɛ AWURADE nwa nyoo: “Aseɛ ne amukoraa kɔkakyi kurofoen, nakoso mengonua bɛ boso bɔkɔɔ.

²⁸ Ɔnate sɔ ne ati, aseɛ kɔbɔ awuye, na ewienu anwuro anwuro kɔkakyi tunn, ofikyɛ madwudwo, mayɛ m’adwene; mengɔsesã m’adwene, yeɛ mengosa me si.

²⁹ Pɔngɔhanɛniɛ ne agyaentolɛniɛ bɛ nwo dede ne ati, kurotue amukoraa bɛnwati; bɛkɔfeafea ndunduin nu, bɛkɔfofo nyɔbotaen mɔ; batutu bafi nguro ne amukoraa so, na sona biala nne berɛ bɔ ɔte so ɔ.

³⁰ Na afei, wɔ bɔ akakyi kurofoen ɔ, sɛ ɛkera kende a, né ɛpena kyire sɛɛ, bɔ afa esikaa kɔkorɛ mbembenanneɛ asiesie wɔ nwo, bɔ atoto wɔ nye asi ye? Asiesie wɔ nwo nyemene mbaen. W’adɔfo mɔ bɛmva wɔ bɛnyɛ huu; ehunɛ yeɛ bɛpena wɔ beku wɔ ɔ.

³¹ Ofikyɛ mate esuɛ bie bɔ ɔte kyɛ brasua bɔ wafo aworɛ so ɔ deɛ, ɔne ɛpenenɛ bɔ ɔte kyɛ brasua bɔ ɔwo ye bamuɛbaa ɔ, ye deɛ. Sion awa brasua ɔtee so, bɔ watrɛtrɛ ye sa nu ɔbɔ awuye kyɛ, “Edwirɛ ato me oo! Ɔnate awudifoɛ ti, me kra aboto!”