Yeremia 39 - AHYERƐLƐ KRONGRON

Kaldeafoɛ tutu Sedekia nye

¹ Yuda hene Sedekia ye ahennie afoɛ ngona ne, bosome buru ne anu, Babilɔn hene Nebukadenesa ne ye koɛhonɛfoɛ amukoraa bɛfale koɛ bɛɛtoale Yerusalem betuale kuro ne.

² Sedekia ahennie afoɛ bɔ ɔtɔ so buru ne ko ne, bosome nna ne anu, ye ɛlɛhona ne aso, bɛbɔle kuro berɛ fasue ne anu tokuro.

³ Babilɔn hene mbanyi amukoraa bewurale nu, na bɛɛtenane afia berɛ anoa piri ne anu. Bɛ ole Negal Saresa, Samgare Nebo, Sasekim, Rabosari, Negal Saresa, Rabomago, yeɛ Babilɔn hene ye mbanyi ngaa nemɔ.

⁴ Na ɔwale kyɛ, mmerɛ bɔ Yuda hene Sedekia ne koɛhonɛfoɛ nemɔ amukoraa benwuni bɛ ne, bɛnwatili. Bɛfale ɛhene turo ne anu bɛɛfale pambim bɔ ɔla fasue nyɔ nemɔ b’afia ne anu befili kuro berɛ kɔngɔen, na bɛfale bɛ nye behyirele aseɛ pralaa ne aso.

⁵ Nakoso Kaldea koɛhonɛfoɛ nemɔ pole bɛ so, na bɛɛtole Sedekia wɔ Yeriko aseɛ frɛtɛɛ ne aso. Na bɛhyele ye nen, bɛfale ye bɛbrɛle Babilɔn hene Nebukadenesa wɔ Ribla bɔ ɔwɔ Hamate aseɛ so ne, na obuale ye ndɛen wɔ berɛ.

⁶ Yeɛ Babilɔn hene huhuni Sedekia mma mmienzua nemɔ wɔ Ribla bɔ ye nye tua ɔ. Asa koso, Babilɔn hene huhuni Yuda atitire amukoraa.

⁷ Otutuli Sedekia nye, na oguale ye ngɔnzɔngɔnzɔ kyɛ ɔfa ye ɔkɔ Babilɔn.

⁸ Kaldeafoɛ nemɔ fale see bɛyerale ahemvie ne, ɔne amanvoɛ awuro mɔ, na bedwirili Yerusalem fasue ne beguale ase.

⁹ Yeɛ awɛmvoɛ nemɔ aso safohene Nebusaradan, ɔhyele mmenia ngaa bɔ baha kuro berɛ ne, bɛ bɔ bɛfale bɛ nwo bɛɛmane ye ne, yeɛ maen ne anu ama ngaa ne nnure hɔle Babilɔn.

¹⁰ Nakoso ehiafoɛ nemɔ bie bɔ belle hwee ne, awɛmvoɛ nemɔ aso safohene Nebusaradan yakyili bɛ wɔ Yuda aseɛ so, na osa mane bɛ bobe boo mɔ ne eboo mɔ sɔ mmerɛ ne ala.

Nebukadenesa pepɛ de Yeremia

¹¹ Babilɔn hene Nebukadenesa fale Yeremia nwo ahyɛdeɛ mane awɛmvoɛ nemɔ aso safohene Nebusaradan kyɛ,

¹² “Fa ye, te wɔ nye nea ye, nnɛyɔ ye tɛɛ biala, na bɔ ɔkɔhã kohyire wɔ biala, yɔ ma ye.”

¹³ Yiti awɛmvoɛ nemɔ aso safohene Nebusaradan, Nebusaseban, Rabosari, Negal Saresa, Rabomago ɔne Babilɔn hene mbanyi nemɔ amukoraa

¹⁴ bɛsomane maa bɛɛfale Yeremia befili kuku nu aluo dɔ bɛwale. Bɛfale ye bewurale Gedalia bɔ ye baba ole Ahikam, bɔ ye baba ole Safan ne sa, kyɛ ɔfa ye ɔhɔ awuro. Yiti Yeremia ne maen anu ama bɛɛtenane.

AWURADE to Ebede Meleke ngraa

¹⁵ Mmerɛ bɔ né bato Yeremia nu wɔ kuku nu aluo berɛ nen, AWURADE lale ye dwirɛ ali hyirele ye kyɛ,

¹⁶ “Kɔ ná kɔhã kyire Yitiopianiɛ Ebede Meleke kyɛ, ‘Asafo AWURADE, Yisrael Nyameɛ nwa nyoo: Tie, me dwirɛ bɔ mahã mafa kuro he anwo, kyɛ ngɔfa bɔ ɔtte mayee ngoli ye, na mmom nna paa ahɔ nen, ɔkɔwa nu wɔ wɔ nyunu sɔ kyẽa ne.

¹⁷ Nakoso ngɔpepɛ ngole wɔ sɔ kyẽa ne, na bɛngɔfa wɔ bengowura mmenia bɔ esuro bɛ nemɔ sa, AWURADE noa dwirɛ ɛne.

¹⁸ Ofikyɛ ngɔpepɛ ngole wɔ amba, na ɛngɔtɔ ngrandɛ noa, na mmom ekonya wɔ ti kodidi nu kyɛ koɛ nu nzesadeɛ, ɔnate kyɛ afa wɔ wora awura me nu ne ati, AWURADE noa dwirɛ ɛne.’ ”