Yeremia 35 - AHYERƐLƐ KRONGRON

Rekabofoɛ nahorɛlilɛ

¹ Yuda hene Yehoakim bɔ ye baba ole Yosia ne, ye aberɛ so, AWURADE lale ye dwirɛ ali hyirele Yeremia kyɛ,

² “Kɔ Rekabofoɛ nemɔ awuro, ná ɛne bɛ beedwudwo. Fa bɛ bra AWURADE awuro berɛ pumbu nemɔ ko anu, ná ma bɛ nzaa kyɛ bɛno.”

³ Yiti ngɔ mvale Yaasania bɔ ye baba ole Yeremia bɔ ye baba ole Habasinia, ɔne oliɛma mmienzua mɔ ne ye mma mmienzua amukoraa ne Rekabo abusua amukoraa.

⁴ Na mvale bɛ mmale Nyameɛ sona Yigidalia awa Hanan ye mma mmienzua nemɔ pumbu nu wɔ AWURADE awuro berɛ. Sɔ pumbu ne, opingye atitire nemɔ pumbu, na ɔwɔ Maaseya bɔ ye baba ole anoa wɛmvoɛ Salum ye pumbu deɛ ne anwuro.

⁵ Na mvale akotokyiwa mɔ bɔ nzaa ayiyi bɛ tɛkyɛtɛkyɛɛ ɔ ne awaa mɔ nziesiele Rekabofoɛ nemɔ nyunu, na nzele bɛ kyɛ, “Ɛ́mɔno nzaa ne.”

⁶ Nakoso bebuale kyɛ, “Yɛngɔno nzaa biala, ofikyɛ yɛ nana Yonadabo bɔ ye baba ole Rekabo ne, ɔfale ahyɛdeɛ mane yɛ kyɛ, ‘Nnɛma ɛmɔno nzaa kyẽa biala le, ɛmɔ ne ɛmɔ boso ama mɔ;

⁷ onni kyɛ ɛmɔsi sua anaa ɛmɔdua nikyee anaa ɛmɔyɛ bobe boo, yeɛ onni kyɛ ɛmɔnya nu biala, na mmom odi kyɛ ɛmɔtena ɛtena sua nu ɛmɔ ngoa amukoraa, amaa ɔnate so ɛmɔatena ase bahyɛ wɔ aseɛ bɔ ɛmɔayɛ ɛwɔfoɛ wɔ so ne aso.’

⁸ Yatie Yonadabo bɔ ye baba ole yɛ nana Rekabo n’ahyɛdeɛ biala bɔ ɔfa mane yɛ ɔ, kyɛ yɛngɔno nzaa yɛ ngoa amukoraa: yɛ bɔbɔ, yɛ ye mɔ, yɛ mma mmienzua mɔ, yeɛ yɛ mma mmrasua mɔ;

⁹ kyɛ yɛngosi sua yɛngɔtena nu, yeɛ yɛlle bobe boo, anaa fie anaa mmakaa mmaa bɔ bedua ɔ;

¹⁰ na mmom yatena ɛtena sua nu, na yatie ahyɛdeɛ bɔ yɛ nana Yonadabo fa mane yɛ ne amukoraa yali so.

¹¹ Nakoso mmerɛ bɔ Babilɔn hene Nebukadenesa fale koɛ ɔɔtoale maen ne nen, yɛhane kyɛ, ‘Ɛmɔbra maa yɛhɔ Yerusalem, ɔnate Kaldeafoɛ koɛhonɛfoɛ ne Siriafoɛ koɛhonɛfoɛ nemɔ bɛ nwo suronyi ti.’ Na ɛhe ati yeɛ ɔmaa yɛte Yerusalem ɔ.”

¹² Yeɛ AWURADE lale ye dwirɛ ali hyirele Yeremia kyɛ,

¹³ “Asafo AWURADE, Yisrael Nyameɛ nwa nyoo: Kɔhã kyire Yudafoɛ ne Yerusalemfoɛ kyɛ, Aso ɛmɔngole foɛtulɛ bɛngɔto nu ná ɛmɔngotie me dwirɛ anaa? AWURADE noa dwirɛ ɛne.

¹⁴ Ahyɛdeɛ bɔ Rekabo awa Yonadabo ɔfa mane ye boso ama kyɛ nnɛmaa bɛno nzaa ne, bali so, na ɔbaadwu ɛnɛ ye, bɛnno nzaa biala, na mmom bedi bɛ nana ahyɛdeɛ so. Na ɛmɔ de, madwudwo mahyire ɛmɔ alaa, nakoso ɛmɔandie me dwirɛ.

¹⁵ Mahɔ so masoma me somvoɛ ngɔmhyɛlɛfoɛ amukoraa wɔ ɛmɔ berɛ dee kyɛ, ‘Odi kyɛ ɛmɔ anu biala sakyera ye adwene wɔ ye bɔne atee nwo, ná ɔbɔ bra paa; na nnɛma ɛmɔkodi nyameɛ foforɛ mɔ si bɛso bɛ, amaa ɔnate so ɛmɔatena aseɛ bɔ mva mane ɛmɔ ne ɛmɔ nana mɔ ne aso. Nakoso ɛmɔanyɛ asoɛ bandie me dwirɛ.

¹⁶ Rekabo awa Yonadabo ye boso ama bali ahyɛdeɛ bɔ bɛ nana fa mane bɛ ne aso, nakoso maen he de, bandie me dwirɛ.

¹⁷ Yiti AWURADE, Asafo Nyameɛ, Yisrael Nyameɛ nwa nyoo: Ɛ́mɔtie, musue amukoraa bɔ ngane kyɛ ngɔmaa ɔkɔwa Yuda ne Yerusalemfoɛ amukoraa bɛ so ne, ngɔprapra ngogua bɛ so; ofikyɛ madwudwo mahyire bɛ, nakoso bandie; mafrɛ bɛ, nakoso bandɛ me so.”

¹⁸ Na Rekabofoɛ nemɔ de, Yeremia sele bɛ kyɛ, “Asafo AWURADE, Yisrael Nyameɛ nwa: Ɔnate kyɛ ɛmɔali ɛmɔ nana Yonadabo ahyɛdeɛ so, ná ɛmɔali ye nhyehyɛleɛ amukoraa so, ná ɛmɔayɔ bɔ wahyɛ ɛmɔ ne amukoraa ne ati,

¹⁹ yiti Asafo AWURADE, Yisrael Nyameɛ nwa nyoo: Sona bɔ okogyina me nyunu ɔ, ɔngɔbɔ Rekabo awa Yonadabo le.”