Yeremia 31 - AHYERƐLƐ KRONGRON

Yisrael kosa kɔwa awuro

¹ “Sɔ mmerɛ ne, ngɔyɛ Yisrael mmusua nemɔ amukoraa bɛ Nyameɛ, na bɛ koso bɛkɔyɛ me maen, AWURADE noa dwirɛ ɛne.”

² AWURADE nwa nyoo: Bɛ bɔ benyane bɛ ti bedidili nu befili ngrandɛ noa ne, benyane adom wɔ ɛserɛ so, mmerɛ bɔ mmane Yisrael nyane ye nwome lele ne.

³ AWURADE yele ye nwo ali hyirele me fili dedeede kyɛ, amba, ɔdɔ bɔ ɔwɔ berɛ afebɔɔ yeɛ mafa mahuro wɔ dwirɛ ɔ, maye m’ahone nu yeɛ mahwe wɔ mapingye ɔ.

⁴ Ao Yisrael ababunu, ngosa ngɔma wɔ bo kotimu, na wɔ bo kotimu. Ekosa kɔfa w’akasaa ne kosiesie wɔ nwo, na ɛkɔfa ahurusililɛfoɛ b’abilie kosi nu kɔhɔ.

⁵ Asa koso, ɛkɔyɔ bobe boo mɔ wɔ Samaria mmokaa nemɔ aso; akuafoɛ nemɔ bekolua, na bɛkɔte ye mma ne bekoli.

⁶ Ofikyɛ kyẽa bie kɔwa bɔ awɛmvoɛ mɔ bɛkɔtea nu wɔ Efraim mmokaa aseɛ so kyɛ, ‘Ɛ́mɔdwɔso oo! Ɛ́mɔma yɛfo yɛhɔ Sion, yɛhɔ AWURADE yɛ Nyameɛ berɛ.’ ”

⁷ Ofikyɛ AWURADE nwa nyoo: “Ɛ́mɔfa anigye bɛ́to Yakob nwo dwein, ná ɛ́mɔbɔ ese bɛ́ma bɔ odi maen maen mɔ so ne; ɛ́mɔbɔ dawure, ɛ́mɔye ye ayɛ, ná ɛmɔhã kyɛ, ‘Ao AWURADE, pepɛ de wɔ maen, Yisrael ngaa ne.’

⁸ Tie, ngɔɔfa bɛ ngofi sorɔ dɔ aseɛ ne aso, ná maboaboa bɛ noa mafi aseɛ noa dɔ paa bɔ ɛhemɔ boka so ɔ: anyesiniwaafoɛ ne bubuafoɛ, mmrataen ne pemvoɛ mɔ, na bɛte fekue kandinga bɔ bekosa bɛkɔwa wa ɔ.

⁹ Bele esuɛ ne ngotosrɛ yeɛ bɛkɔwa ɔ, na ngoli bɛ nyunu. Ngɔmaa bɛkɔnate bɛkɔhɔ asue noa, wɔ atee bɔ ɔtengyɛ bɔ bengosoti wɔ so ɔ so; ofikyɛ me yeɛ nde Yisrael ye baba ɔ, na Efraim yeɛ ɔte me bamuɛbaa ɔ.

¹⁰ “Ao maen maen mɔ, ɛ́mɔtie AWURADE noa dwirɛ, ná ɛ́mɔbɔ ye dawure wɔ supɔ mɔ bɔ bɛwɔ dedeede ɔ so, ná ɛmɔhã kyɛ, ‘Bɔ ɔbɔle Yisrael sandene ne, okosa kɔboaboa bɛ noa kɔnea bɛ so kyɛbɔ mmoaenneafoɛ nea ye mmoaen kure so ɔ.’

¹¹ Ofikyɛ AWURADE apɔ Yakob wale ye, na wapepɛ wale Yakob wafi bɔ ye nwo yɛ se tra Yakob ɔ ye sa nu.

¹² Yiti bɛkɔwa bɛkɔɔto dwein wɔ Sion bokaa ne ti afia, na bɛ nye kɔgye, ɔnate AWURADE paayɛlɛ ne ati, ɔne aleɛ, nzaa ne ngoo ne ati, yeɛ mmoaen akrɔngrɔma mɔ ne nandwie akrɔngrɔma mɔ ti. B’asetena nu kɔyɛ kyɛ eboo bɔ onya nzue ɔ, na bɛ wora ngɔbɔ ko koraa.

¹³ Yeɛ ndaluwa kɔfa anigye bekogo abilie ne, mmerandeɛ ne nworowaa bɛ nye kɔgye kɔbɔ nu; ofikyɛ ngɔma bɛ suɛ kɔkakyi ahurusililɛ, ngɔkyekye bɛ wora, na ngɔma bɛ nye kɔgye kofi b’aworabɔlɛ nu.

¹⁴ Ngɔfa aleɛ fɛɛ ngɔma asɔfo nemɔ bɛ kra ko koyi, na me maen konya me nningyein paa kɔma bɛ ko koyi, AWURADE noa dwirɛ ɛne.”

¹⁵ AWURADE nwa nyoo: “Bɛtele komviɛ bie wɔ Rama, awuye ne esuɛ hahii. Rahɛl sũ ye mma, ye mma nemɔ ati, bɛkyekye ye wora a, ondie, ofikyɛ bɛnne berɛ ko.”

¹⁶ Bɔ AWURADE kã ɛhe: Mua wɔ noa ná yakyi suɛ; nnɛma wɔ nye poro moen, ofikyɛ ekonya w’adwuma nwo akatuaa, AWURADE noa dwirɛ ɛne, na bekofi pɔfoɛ ne aseɛ so bekosa bɛkɔwa.

¹⁷ Anyelasoɛ wɔ berɛ ma wɔ kyẽa bie, AWURADE noa dwirɛ ɛne. Na wɔ mma koso, bekosa bɛkɔwa bɛ bɔbɔ b’aseɛ so.

¹⁸ Amba, mate kyɛ Efraim ɔ́bɔ abubue kyɛ, ‘Ahwe me so, na manya asohwenɛ, kyɛ nandwie ba bɔ bennya bɛffale kɔnnua bɛttole ye kɔme ɔ. Maa nza mmra, na ngosa ngɔwa, ofikyɛ wɔ yeɛ ɛte AWURADE me Nyameɛ ɔ.

¹⁹ Amba, nzale me si, na ye si ye, nzakyerale m’adwene. Na ye si ye bɔ me nye wale me nwo so ne, mvale me sa nguale m’ahone so; mvɛrele, na me nyunu guale ase, ofikyɛ mmɔle nyanzoen bra wɔ me mmerandeɛ nu.’

²⁰ Aso Efraim, ɔte mma bɔ ɔla m’ahone nwo ɔ? Aso ɔte baa bɔ me nye gye ye nwo ɔ? Mmerɛ pee bɔ metwi ye nyunu ne, yeɛ mekɔ so mekaye ye ɔ. Yiti me kunu tete me ma ye, amba, ngonwu ye anwumvoin, AWURADE noa dwirɛ ɛne.

²¹ “Fa nningyein hyɛ atee ne nzorɛ, fa mmakaa penapena so. Hyɛ atee ne nzorɛ yé, atimbire bɔ ɛfale so hɔle ne. Ao Yisrael ababunu, sa wɔ si. Sa wɔ si bra wɔ nguro hemɔ aso.

²² Ao baa brasua bɔ ayɛ lɔen ɔ, w’adwene kɔyɛ wɔ ndaa ndaa maa okoodwu kyinzu? Ofikyɛ AWURADE abɔ nikyee foforɛ wɔ aseɛ so. Brasua kɔbɔ bienzua nwo waen.”

²³ Asafo AWURADE, Yisrael Nyameɛ nwa nyoo, “Sɛ mesa mefa b’agyapadeɛ mewura bɛ sa a, bekosa bɛkɔhã sɔ dwirɛ ne wɔ Yuda aseɛ so ne ye nguro mɔ so kyɛ, ‘Ao tenenee atenaleɛ, ao bokaa krongron, AWURADE oyira wɔ!’

²⁴ Na akuafoɛ mɔ ne bɛ bɔ bɛfa mmoaen kure bɛkɔ adidie ne, bɛkɔtena Yuda ne ye nguro nemɔ amukoraa so bɛkɔbɔ nu.

²⁵ Ofikyɛ ɛkra bɔ wayɛ hodwoo ne, ngɔmaa okole ye nwome, yeɛ ɛkra bɔ ye wora abɔ ne, ngɔmaa ye ko koyi.”

²⁶ Ɛhe maa ndingyele, na nneane, na me nnaa yɛle me fɛ.

²⁷ “Tie, mmerɛ bie ɔ́ba bɔ Yisrael awuro ama ne Yuda awuro ama mɔ, ngɔfa mmenia bosofoɛ ne ngaka bosofoɛ yeɛ ngolua ɔ, AWURADE noa dwirɛ ɛne.

²⁸ Na ɔkɔwa kyɛ, kyɛbɔ nneane bɛ so kyɛ ngotutu bɛ bo, ngobubu nu, ngodwiri ngogua, ngɔsɛkye, ná mama musue ato bɛ ne, sɔ ala yeɛ ngɔnea bɛ so ngosi ná malua ɔ, AWURADE noa dwirɛ ɛne.

²⁹ Sɔ mmerɛ ne anu, bɛngɔhã ye ko kyɛ, ‘Seɛ mɔ bali abrɛbɛ bisii, na mmaa mɔ yeɛ bɛ gye anya ɔ.’

³⁰ Nakoso ebiala kowu wɔ ye bɔbɔ ye amumuyɛɛ nwo; ebiala bɔ okoli abrɛbɛ bisii ne, ye bɔbɔ ye gye yeɛ okonya ɔ.

Apam foforɛ ne

³¹ “Tie, mmerɛ bie ɔ́ba bɔ me ne Yisrael awuro ama ne Yuda awuro ama yɛkɔyɛ apam foforɛ, AWURADE noa dwirɛ ɛne.

³² Ɔngɔyɛ kyɛ apam bɔ me ne bɛ nana mɔ yɛyɛle, mmerɛ bɔ nzɔle bɛ sa nyele bɛ mvili Misraim aseɛ so ne. Ɔwɔ nu kyɛ me yeɛ né nde bɛ hu ɔ, nakoso bebuli m’apam ne aso, AWURADE noa dwirɛ ɛne.

³³ Nakoso apam bɔ me ne Yisrael awuro ama yɛkɔyɛ ɛhe: Sɔ mmerɛ ne asi ne, ngɔfa me mmeraa ngowura bɛ nu, na ngɔhyerɛ ye wɔ b’ahone nu; ngɔyɛ bɛ Nyameɛ, ná bɛ koso bayɛ me maen, AWURADE noa dwirɛ ɛne.

³⁴ Na ebiala ngohyirehyire obiɛngo ko, yeɛ ebiala ngose oliɛma kyɛ, ‘Nwu AWURADE,’ ofikyɛ ofi bɛ nu kwahweabaa so bɔ ɔkwaadwu bɛ nu titire paa so, bɛ mukoraa bekonwu me, AWURADE noa dwirɛ ɛne. Ofikyɛ ngɔfa b’amumuyɛɛ ngɔhyɛ bɛ, na mengɔkaye bɛ bɔne ko.”

³⁵ AWURADE bɔ ɔfale eyia tuale berɛ kyɛ ɔta alehyeleɛ nu, ná ɔyɛle nhyehyɛleɛ mane ɛsraen ne nzramaa mɔ kyɛ bɛta alesaleɛ nu, ye bɔ ɔkã ɛpo nu maa ye asorɔkye bɔ, bɔ ye dumaa ole Asafo AWURADE ne, ye noa dwirɛ ɛhe:

³⁶ “Sɔ nhyehyɛleɛ nemɔ, sɛ bɛ bo pɛ wɔ me nyunu a, yeɛ Yisrael boso ama koso bɛngɔhɔ so bɛngɔyɛ maen wɔ me nyunu afebɔɔ ɔ, AWURADE noa dwirɛ ɛne.”

³⁷ Bɔ AWURADE kã ɛhe: Sɛ bɛkora besusu nyameɛso anwuro anwuro, ná bɛkora betutu aseɛ nyinasoɛ bo bɛnea a, ye de ngɔpo Yisrael boso ama amukoraa, ɔnate bɔ bayɔ amukoraa ne ati, AWURADE noa dwirɛ ɛne.

³⁸ “Tie, mmerɛ bie ɔ́ba, bɔ kuro ne, ofi Hananel abandenden bɔ ɔkwaadwu ndweasoɛ pambim ne, bekosa bɛkɔkyekye bɛkɔma AWURADE ɔ, AWURADE noa dwirɛ ɛne.

³⁹ Na nyamaa bɔ bɛfa besusu nikyee ne, ɔkɔhɔ ye nyunu tee koodwu Garebo pambaa ne, ná wakondo wahɔ Gowa.

⁴⁰ Na efuin ne nzoen bɔnza ne amukoraa, ɔne aseɛ amukoraa bɔ ɔkwaadwu asue Kidron, bɔ ɔkwaadwu Pɔngɔ pambim ne ndweasoɛ so wɔ eyia afiteleɛ so ne, ɔkɔyɛ krongron kɔma AWURADE. Ye bo ngotutu ko, yeɛ bengodwiri bengogua ase ko le.”