Yeremia 29 - AHYERƐLƐ KRONGRON

Yeremia kyerɛ krataa kɔma bɛ bɔ bahye bɛ nnure ne

¹ Ngɔmhyɛlɛniɛ Yeremia fale krataa he manene fili Yerusalem. Ɔmaa bɛfa bɛɛmane mbanyi bɔ baha wɔ bɛ bɔ bahye bɛ nnure bahɔ nemɔ anu, yeɛ asɔfo nemɔ, ngɔmhyɛlɛfoɛ nemɔ ne mmenia amukoraa bɔ Nebukadenesa hyele bɛ nnure fili Yerusalem hɔle Babilɔn ne.

² Nana Yekonia ne ɛhemmaa ne, ɔne sayɛɛ nemɔ, Yuda ne Yerusalem atitire, adwiililɛfoɛ ne dwumvoɛ nemɔ befili Yerusalem bɛhɔle nen, ye si yeɛ ɔhyerɛle krataa ne ɔ.

³ Ɔfa manene Elasa bɔ ye baba ole Safan, yeɛ Gyemaria bɔ ye baba ole Hilkia, bɔ Nana Sedekia somane bɛ Babilɔn hene Nebukadenesa berɛ wɔ Babilɔn ne. Krataa ne anu dwirɛ ɛhe:

⁴ “Mmenia amukoraa bɔ mamaa bahye bɛ nnure bafi Yerusalem bahɔ Babilɔn ne, bɔ Asafo AWURADE, Yisrael Nyameɛ kã kyire bɛ ɛhe:

⁵ Ɛ́mɔsisi sua bɛtenatena nu; ɛ́mɔyɔ eboo, ná ɛmɔli nu aleɛ.

⁶ Ɛ́mɔgyigya mmraa ná ɛ́mɔwowo mmaa mmienzua ne mmaa mmrasua; ɛ́mɔgyigya mmraa bɛ́ma ɛmɔ mma mmienzua mɔ, ná ɛ́mɔfa ɛmɔ mma mmrasua bɛmoma biaa mɔ maa bɛwowo mmaa mmienzua ne mmaa mmrasua, amaa ɔnate so ɛmɔata pee wɔ dɔ, ná ɛmɔ so ande.

⁷ Na kuro bɔ mamaa bahye ɛmɔ nnure bahɔ so ne, odi kyɛ ɛmɔpena ye yeeyɛlɛ, ná ɛmɔbɔ mbaeɛ bekyire AWURADE bɛma ye, ofikyɛ kuro ne yeeyɛlɛ nu, yeɛ ɛmɔ koso ɛmɔkɔyɛ yé ɔ.

⁸ Ofikyɛ Asafo AWURADE, Yisrael Nyameɛ nwa nyoo: Nnɛmɔma ɛmɔ nu ngɔmhyɛlɛfoɛ ne ngonyaayelɛfoɛ nemɔ bɛlakalaka ɛmɔ, yeɛ nnɛma ɛmɔtie bɛ laleɛ bɔ bɛkyekye nemɔ.

⁹ Ofikyɛ ngɔm bɔ bɛhyɛ ye wɔ me dumaa nu bekyire ɛmɔ ne, ɔte ngondombo. Nnzomane bɛ, AWURADE noa dwirɛ ɛne.

¹⁰ “Ofikyɛ bɔ AWURADE kã ɛhe: Sɛ afoɛ aburasoo nya so wɔ Babilɔn a, ngɔwa ngɔɔpasa ɛmɔ nwo, na ngɔma me ndɛenvɛen ne kɔwa nu kɔma ɛmɔ. Na ngɔfa ɛmɔ ngosa ngɔwa ɛwa.

¹¹ Ofikyɛ mese adwene horɛ bɔ medwene mefa ɛmɔ nwo ɔ, AWURADE noa dwirɛ ɛne; yeeyɛlɛ nwo adwene, nna bɔne adwene ɔ; kyɛ ngɔma ɛmɔkonya ayieleɛ paa ne anyelasoɛ.

¹² Afei ɛmɔkosu bɛkɔfrɛ me, ɛmɔkɔwa bɛkɔɔbɔ mbaeɛ bekohyire me, na ngotie ɛmɔ.

¹³ Ɛmɔkɔpena me si atee, na ɛmɔkonwu me, ofikyɛ ɛmɔkɔfa ɛmɔ ahone amukoraa bɛkɔpena me si atee.

¹⁴ Ngɔmaa ɛmɔkonwu me, AWURADE noa dwirɛ ɛne. Ngɔye ɛmɔ ngofi nnurehyelɛ nu, na ngɔboaboa ɛmɔ noa ngofi maen amukoraa ne nekaa amukoraa bɔ mafoa ɛmɔ maagua so ne, AWURADE noa dwirɛ ɛne. Ngosa ngɔfa ɛmɔ ngɔwa nekaa bɔ mamaa bahye ɛmɔ nnure bafi berɛ bahɔ ne.

¹⁵ “Ɔnate kyɛ ɛmɔahã kyɛ, ‘AWURADE asiesie ngɔmhyɛlɛfoɛ wama yɛ wɔ Babilɔn’ ne ati,

¹⁶ bɔ AWURADE kã fa ɛhene bɔ ɔte Dawide ahennie bia so, ɔne mmenia amukoraa bɔ bɛte kuro ye aso, yeɛ ɛmɔ aliɛma mɔ bɔ bangye bɛ nnure bamvra ɛmɔ bangɔ nemɔ nwo ole kyɛ,

¹⁷ ‘Asafo AWURADE nwa nyoo: Ɛ́mɔtie, ngɔsoma ngrandɛ, ɛhɔen ne ewue anwonyerɛ ngɔwa bɛ so, na ngɔmaa bɛkɔyɛ kyɛ borɔdoma porɔlowaa, bɔ bedi a ɔnyɛ yee, ofikyɛ ɔtte mayee koraa ɔ.

¹⁸ Ngɔfa ngrandɛ, ɛhɔen ne ewue anwonyerɛ ngogu bɛ so, na ngɔye me sa ngofi bɛ bo maa bɛkɔsesa bɛ bɛkɔhɔ aseɛ so ahennie amukoraa nu. Bɛkɔyɛ ɛnomalɛ nikye, anwodwiri nikye, esobilɛ nikye ne animguaseɛ nikye wɔ maen maen amukoraa bɔ mafoa bɛ mahɔ so nemɔ aso,

¹⁹ ofikyɛ bandie me dwirɛ, AWURADE noa dwirɛ ɛne; edwirɛ bɔ ngɔle so mva nzomane me somvoɛ ngɔmhyɛlɛfoɛ maa bɛɛhã behyirele bɛ ne. Nakoso ɛmɔandie me dwirɛ, AWURADE noa dwirɛ ɛne.

²⁰ Na afei, ɛmɔ bɔ bahye ɛmɔ nnure amukoraa, bɔ maye ɛmɔ mafi Yerusalem mahɔ Babilɔn ne, ɛ́mɔtie AWURADE dwirɛ.

²¹ ‘Bɔ Asafo AWURADE, Yisrael Nyameɛ ɔkã fa Ahabo bɔ ye baba ole Kolaya, yeɛ Sedekia bɔ ye baba ole Maaseya, bɔ bele me dumaa bɛhyehyɛ ngɔndorɔ bekyire ɛmɔ ne ɛhe: Ɛ́mɔtie, ngɔfa bɛ ngowura Babilɔn hene Nebukadenesa sa, na okohũhũ bɛ bɔ ɛmɔ nye tua ɔ.

²² Na mmenia amukoraa bɔ bahye bɛ nnure bafi Yuda bahɔ Babilɔn ne, bɛkɔfa bɔ ɔtole sɔ mmenia nemɔ ne yeɛ bɛkɔyɛ amoenwaa dwirɛ kyɛ, “AWURADE ɔ́ma ɛyɛ kyɛ Sedekia ne Ahabo bɔ Babilɔn hene totone bɛ wɔ see nu ne,”

²³ ofikyɛ bali ngwaseasɛm wɔ Yisrael, na bɛ ne bɛ mmango mɔ aye mɔ bala, na bafa me dumaa bahã ngondombo dwirɛ, bɔ mamva ye nwo ahyɛdeɛ mamma bɛ ɔ. Me yeɛ mese, ná nde adanzeniɛ ɔ, AWURADE noa dwirɛ ɛne.’ ”

Nyameɛ afɛ Semaya nwo yaa

²⁴ Kã kyire Nehelamniɛ Semaya kyɛ,

²⁵ “Asafo AWURADE, Yisrael Nyameɛ nwa: Ɔnate kyɛ ɛhyerɛle krataa wɔ wɔ bɔbɔ wɔ dumaa nu ɛɛmane Yerusalemfoɛ amukoraa, yeɛ Sefania bɔ ye baba ole ɔsɔfo Maaseya ne asɔfo nemɔ amukoraa kyɛ,

²⁶ ‘AWURADE afa wɔ wali sɔfo maa asi ɔsɔfo Yehoada gya nu, kyɛ ɛnea AWURADE awuro ne aso, ná ebiala bɔ wabɔ laen, nakoso ɔyɛ ye nwo ngɔmhyɛlɛniɛ ne, ɛ́bɔ ye panwu, ná égua ye ngɔnzɔngɔnzɔ.

²⁷ Na afei, Anatoteniɛ Yeremia bɔ ɔyɛ ye nwo ngɔmhyɛlɛniɛ wɔ ɛmɔ so ne, nzu ati yeɛ endwi ye nyunu ɔ?

²⁸ Ofikyɛ wasoma maa baase yɛ wɔ Babilɔn kyɛ, ‘Ɛmɔkɔhyɛ wɔ nnurehyelɛ nu, yiti ɛ́mɔsisi sua bɛtenatena nu, ɛ́mɔyeyɛ boo, ná ɛmɔli nu aleɛ.’ ”

²⁹ Na ɔsɔfo Sefania kengale sɔ krataa ne hyirele ngɔmhyɛlɛniɛ Yeremia.

³⁰ Yeɛ AWURADE lale ye dwirɛ ali hyirele Yeremia kyɛ,

³¹ “Mmenia amukoraa bɔ bahye bɛ nnure bahɔ ne, soma maa beese bɛ kyɛ, ‘Bɔ AWURADE kã fa Nehelamniɛ Semaya nwo ole kyɛ: Ɔnate kyɛ Semaya wahyɛ ngɔm wahyire ɛmɔ wɔ aberɛ bɔ nnzomane ye, ná wamaa ɛmɔale ngondombo bali ne ati,

³² yiti AWURADE nwa nyoo: Tie, ngɔhwe Nehelamniɛ Semaya ne ye bosofoɛ bɛ so. Ongonya ye nwoniɛ bɔ ɔkɔtena maen he anu, bɔ okonwu nikye paa bɔ mebaayɔ mema me maen ɔ, AWURADE noa dwirɛ ɛne; ofikyɛ wahã ɛlɔenyɛlɛ dwirɛ watia AWURADE.’ ”