Yeremia 23 - AHYERƐLƐ KRONGRON

Kyẽa bie anyelasoɛ

¹ “Mmoaenneafoɛ bɔ bekũkũ me mmoaen kure ná bɛbɔ bɛ bɛsande ɔ, bɛ yaakɔ!” AWURADE noa dwirɛ ɛne.

² Yiti bɔ AWURADE Yisrael Nyameɛ kã fa me maen so neafoɛ nemɔ nwo ɛhe, “Ɛmɔabɔ me mmoaen kure ne basande, ɛmɔafoa bɛ maa bahɔ, na ɛmɔannea bɛ so. Yiti ngotu me nye ngosie ɛmɔ so, ɔnate ɛmɔ bɔne yɔleɛ ne ati, AWURADE noa dwirɛ ɛne.

³ Na afei, me bɔbɔ ngɔboaboa me mmoaen ngaa nemɔ anoa ngofi maen maen bɔ mafoa bɛ maagua so nemɔ aso, na ngosa ngɔfa bɛ ngɔwa bɛ nekaa bɔ bedidi ɔ, na bɛkɔwo bɛkɔta pee.

⁴ Ngɔye mmoaenneafoɛ bɔ bɛkɔnea bɛ so ɔ, na bengosuro ko, bɛ kunu ngɔtete bɛ, yeɛ bɛ nu biala ngomini, AWURADE noa dwirɛ ɛne.

⁵ “Tie, mmerɛ bie ɔba, AWURADE noa dwirɛ ɛne, bɔ ngɔma Mmaen bie bɔ ɔtengyɛ ɔ kodwɔso wɔ Dawide bosofoɛ nu. Okoli hene, na okoyie ye yé. Okobua ndɛen turoloo kɔyɛ bɔ ɔtengyɛ ɔ wɔ aseɛ ne aso.

⁶ Na ye aberɛ so, Yuda konya ye ti kodidi nu, na Yisrael kɔtena asomdwee nu. Na ye dumaa bɔ bɛkɔfa bɛkɔfrɛ ye ole ‘AWURADE YƐ TENENEE.’

⁷ “Yiti tie, mmerɛ bie ɔ́ba, bɔ bɛngɔhã ye ko kyɛ, ‘AWURADE bɔ ɔyele Yisraelfoɛ fili Misraim aseɛ so wale ne, kyɛ ɔte ase ye,’

⁸ na mmom bɛkɔhã kyɛ, ‘AWURADE bɔ ɔyele Yisrael awuro ama, ná olili bɛ nyunu fili sorɔ dɔ maen ne anu ne maen amukoraa bɔ mvoane bɛ ngonguale so ne, kyɛ ɔte ase ye.’ Na afei bɛkɔtena bɛ bɔbɔ b’aseɛ so.”

Ngɔmhyɛlɛfoɛ ngondombofoɛ ne asɔfo ngondombofoɛ

⁹ Ɔnate me ngɔmhyɛlɛfoɛ nemɔ ati, m’adwene ayɛ me basaa wɔ me nu, me mmowue nu amukoraa wosowoso me. Mayɛ kyɛ akɔnomnzaniɛ, kyɛ ebie bɔ nzaa abia ye ɔ, ɔnate AWURADE ɔne ye dwirɛ krongron ne ati.

¹⁰ Ofikyɛ agyaasɛkyelɛfoɛ bayi aseɛ ne aso to; ɔnate ɛnomalɛ ne ati, aseɛ ne bɔ awuye, na ɛserɛ ne aso nekaa bɔ ngaka didi ne, berɛ ayɛ pralaa. B’atee te bɔne, na b’anwoserɛ ne ɔtte mayee.

¹¹ Ofikyɛ ngɔmhyɛlɛniɛ ne ɔsɔfo bɛ munyɔ benzuro Nyameɛ; amba, m’awuro po manwu bɛ bɔne wɔ berɛ, AWURADE noa dwirɛ ɛne.

¹² Yiti b’atee kɔyɛ bɛ kyɛ awosii nu atee bɔ so yɛ ndono ɔ, bɔ bekosumu bɛ maa bekofi ase wɔ so ɔ; ofikyɛ ngɔprapra musue ngogua bɛ so wɔ b’asohwenɛ afoɛ ne anu, AWURADE noa dwirɛ ɛne.

¹³ Nwuni nikyee bie bɔ ɔte ngwaseasɛm ɔ wɔ Samaria ngɔmhyɛlɛfoɛ nemɔ anwo. Bɛfale Baal bɛhyɛle ngɔm, na bɛmane me maen Yisrael lili makyebu.

¹⁴ Yeɛ Yerusalem ngɔmhyɛlɛfoɛ nwo koso, manwu nikyee bie bɔ ɔte anwodwiri ɔ: bɛsɛkye agyaa, yeɛ bɛpɛ ngondombo; bɛhyɛ bɔnefoɛ nguraen, maa ɔnate so ebiala ɔnzakyera mvi ye bɔne nwo; bɛ mukoraa bayɛ me nye so kyɛ Sodom; na nu ama koso bayɛ kyɛ Gomora.

¹⁵ Yiti bɔ Asafo AWURADE kã fa ngɔmhyɛlɛfoɛ nemɔ nwo ɛhe, “Tie, abɔwee yeɛ ngɔfa ngɔma bɛ maa bekoli ɔ; na ngɔma bɛ nzue bɔ ɛborɔ wɔ nu ɔ maa bɛkɔno, ofikyɛ Yerusalem ngɔmhyɛlɛfoɛ nemɔ, bɛ bra fiɛ ne, wato wapete aseɛ ne aso amukoraa.”

¹⁶ Bɔ Asafo AWURADE kã ɛhe: Ngɔmhyɛlɛfoɛ bɔ bɛhyɛ ngɔm bekyire ɛmɔ ne, nnɛma ɛmɔtie bɛ, na bɛlakalaka ɛmɔ. Bɛbɔ bɛ bɔbɔ bɛ ti anu bɛkã nyekyire bɔ nna AWURADE noa dwirɛ ahɔ ɔ.

¹⁷ Bɛkɔ so bɛkã bekyire bɛ bɔ bebu me animtia ne kyɛ AWURADE nwa nyoo, ‘Ɛmɔkonya asomdwee’; na bɛkã bekyire ebiala bɔ odi ye ti piri ɔyɛ asoserɛ ne kyɛ, ‘Musue biala ngɔto ɛmɔ.’ ”

¹⁸ Na nwa yeɛ ɔne AWURADE batu agyina, bɔ ɔnate so wanwu ye dwirɛ ne ná wate ɔ? Nwa yeɛ wayɛ asoɛ wama ye dwirɛ ná wate ɔ?

¹⁹ Nea! AWURADE mvrama bɔ ɔpɛ ye nwo ne otu! Ɛyaa piri afite awa, mvrama bɔ ɔpɛ ye nwo bɔ otu serɛserɛ ɔ; na okoofĩ bɔnefoɛ bɛ ti so serɛserɛ.

²⁰ AWURADE ɛyaafɛlɛ ne ngɔhwe ngosa kɔpem kyɛ okoyie bɔ ɔyɔ ɔ, kɔpem kyɛ wayɔ bɔ wadwene ye nwo wɔ ye ti anu ɔ. Na ngyẽa bɔ oli nziɛ ne anu, ɛmɔkɔte ye bo yé paa.

²¹ Nnzomane sɔ ngɔmhyɛlɛfoɛ nemɔ, nakoso bele amirika; nngane edwirɛ nngyirele bɛ, nakoso bɛhyɛle ngɔm.

²² Nakoso sɛ bɛmaa me ne bɛ yɛtuli agyina, yeɛ sɛ bɛmane me maen bɛtele me dwirɛ a, ahaa bɛmaa bɛsesane befili b’atee tɛɛ ne aso, ɔne bɛ bɔne yɔleɛ ne anwo.

²³ “Aso nde Nyameɛ bɔ mepingye ngome, bɔ nnde Nyameɛ bɔ ɔwɔ dedeede koso ɔ? AWURADE noa dwirɛ ɛne.

²⁴ Aso ebie kɔhora kɔfea wɔ mvealeɛ nu bɔ mengonwu ye ɔ? AWURADE noa dwirɛ ɛne. Aso menyi nyameɛso ne aseɛ so tɛkyɛ anaa? AWURADE noa dwirɛ ɛne.

²⁵ Ngɔmhyɛlɛfoɛ bɔ bɛfa me dumaa bedi ngɔndorɔ ne, mate bɔ bɛkekã ɔ. Bɛnwa, ‘Mahye laleɛ, mahye laleɛ!’

²⁶ Ɔkwaadwu kyinzu yeɛ ɛhe kɔtena ngɔmhyɛlɛfoɛ bɔ bedi ngɔndorɔ nemɔ bɛ ti anu ɔ? Amba, bɛte ngɔmhyɛlɛfoɛ bɔ bɛbɔ bɛ ti anu bɛkekã nnakannaka dwirɛ ɔ.

²⁷ Bɛ laleɛ mɔ bɔ bɛkekã bekyire bɛ nwo bɛ nwo nemɔ, bɛdwene kyɛ bɛkɔfa so bɛkɔma me maen ye wora kofi me dumaa, kyɛbɔ bɛ nana mɔ mane bɛ wora fili me dumaa bɛɛsole Baal ne.

²⁸ Ngɔmhyɛlɛniɛ bɔ wahye laleɛ ne, odi kyɛ ɔfa laleɛ ne to dwaa, na bɔ mafa me dwirɛ matua ye noa ne koso, odi kyɛ ɔkã me dwirɛ ne nahorɛ nu. Nzikyɛ ngitahoɛ yeɛ ɔla afafu ne atokoɔ b’afia ɔ? AWURADE noa dwirɛ ɛne.

²⁹ Me dwirɛ ne, aso ɔtte kyɛ see? AWURADE noa dwirɛ ɛne. Anaa ɔtte kyɛ bɔsobaka bɔ obubu nyɔbotaen nu ɔ?

³⁰ Yiti tie, ngɔmhyɛlɛfoɛ bɔ bewua me dwirɛ befi bɛ mmango berɛ ne, me nye sa bɛ, AWURADE noa dwirɛ ɛne.

³¹ Tie, me nye sa ngɔmhyɛlɛfoɛ bɔ bɛbɔ bɛ noa nu bɛkã kyɛ, ‘AWURADE nwa’ ne, AWURADE noa dwirɛ ɛne.

³² Tie, me nye sa bɛ bɔ begyina ngondombo laleɛ so bɛhyɛ ngɔm bɛkekã bekyire mmenia ɔ, AWURADE noa dwirɛ ɛne; na bɛfa bɛ ngondombo ne bɛ suban tɛɛ so bɛma me maen di makyebu, wɔ aberɛ bɔ nnzomane bɛ, anaa mmvale ahyɛdeɛ mmmane bɛ ɔ. Yiti bɛ nwo ngɔwa mvasoɛ biala ngɔma maen he, AWURADE noa dwirɛ ɛne.

³³ Sɛ sɔ maen ye, anaa ngɔmhyɛlɛniɛ ne, anaa ɔsɔfo bie bisa wɔ kyɛ, ‘AWURADE ye adesoa ne ole nzu?’ a, ye de kã kyire bɛ kyɛ, ‘Ɛmɔ yeɛ ɛmɔte adesoa ne ɔ, na ngogyi ɛmɔ ngɔto, AWURADE noa dwirɛ ɛne.’

³⁴ Na ngɔmhyɛlɛniɛ, ɔsɔfo ne maen bɔ ɔkɔhã kyɛ, ‘AWURADE adesoa ne’, ngɔhwe sɔ sona ne ɔne ye awuro ama bɛ so.

³⁵ Yiti odi kyɛ ebiala obisa obiɛngo, ná ebiala obisa oliɛma kyɛ, ‘Nzikyɛ mmuayɛɛ yeɛ AWURADE ama ɔ?’ anaakyɛ ‘Nzikyɛ yeɛ AWURADE wahã ɔ?’

³⁶ Nakoso AWURADE adesoa ne de, nnɛma ɛmɔfa ɛmɔ noa bɛbɔ sɔ dwirɛ ne aso ko, ofikyɛ ebiala ye noa dwirɛ kɔkakyi ye adesoa; ofikyɛ ɛmɔasesã Nyameɛ teasefoɛ, Asafo AWURADE yɛ Nyameɛ ye noa dwirɛ ne.

³⁷ Yiti bisa ngɔmhyɛlɛniɛ ne kyɛ, ‘Nzikyɛ mmuayɛɛ yeɛ AWURADE ama wɔ ɔ?’ anaakyɛ ‘Nzikyɛ dwirɛ yeɛ AWURADE ahã ɔ?’

³⁸ Nakoso, ɔnate kyɛ ɛmɔkekã kyɛ, ‘AWURADE adesoa’ ne ati, yiti AWURADE nwa nyoo, ɔnate kyɛ ɛmɔkekã sɔ dwirɛ he kyɛ, ‘AWURADE adesoa’ wɔ aberɛ bɔ nzomane maa bɛɛbɔle ɛmɔ kɔkɔ kyɛ, “Nnɛma ɛmɔkã kyɛ, ‘AWURADE adesoa’ ” ɔ,

³⁹ yiti tie, me, me wora kofi ɛmɔ bɔkɔɔ, na ngɔpo ɛmɔ ne kuro bɔ mva mane ɛmɔ ne ɛmɔ nana mɔ ne, na ngɔfoa ɛmɔ ngofi me nyunu.

⁴⁰ Na ngɔprapra animguaseɛ bɔ olle ayieleɛ ɔne nyanzoen bɔ ye bo ngɔpɛ le, bɔ bɛ wora ngofi ye le ɔ, ngogua ɛmɔ so.’ ”