Yeremia 22 - AHYERƐLƐ KRONGRON

Nyameɛ twe asoserɛ maen so

¹ Bɔ AWURADE kã ɛhe: “Dwɔso kɔ Yuda hene awuro kɔhã sɔ dwirɛ he kyire ye wɔ dɔ.

² Kã kyɛ, ‘Ao Yuda hene bɔ ɛte Dawide ahennie bia so ɔ, tie AWURADE dwirɛ, ɛne wɔ somvoɛ mɔ ne wɔ maen bɔ bɛworo anoa hemɔ anu ɔ.

³ Bɔ AWURADE kã ɛhe: Ɛ́mɔbua ndɛen turoloo, ná ɛ́mɔyɔ bɔ ɔtengyɛ ɔ. Na ebiala bɔ babɔ ye apoo ne, ɛ́mɔpepɛ bele ye béfi aminɛlilɛfoɛ bɛ sa nu. Nnɛma ɛmɔyɔ bɔne betia ɛwɔfoɛ, ayisiaa anaa kunaniɛ, yeɛ nnɛma ɛmɔsisi bɛ. Afei koso, nnɛma ɛmɔkã mogya bɔ odi be ɔ begua wɔ ɛwa.

⁴ Na sɛ ɛmɔdi sɔ dwirɛ he aso amba a, ye de ahemvo bɔ bɛte Dawide ahennie bia so, bɔ bɛtete teaseɛnam mɔ nu ne mbɔngɔ so, bɛ ne bɛ somvoɛ mɔ ne bɛ maen, bɛkɔfa awuro he anoa nemɔ anu bɛkɔwa nu.

⁵ Nakoso sɛ ɛmɔandie edwirɛ hemɔ a, ye de meta me bɔbɔ me nwo ndaen kyɛ awuro he kɔkakyi dandue, AWURADE noa dwirɛ ɛne.

⁶ Ofikyɛ bɔ AWURADE ɔkã fa Yuda hene awuro ama nwo ɛhe, “ ‘Ɛte kyɛ Gileade ma me, ɔne Lebanon ti afia; nakoso amba ngɔmaa ɛkɔkakyi aseɛ pralaa ne nguro bɔ sona nne so ɔ.

⁷ Na ngosiesie sɛkyefoɛ maa bekodwɔso bekotia wɔ, bɔ bɛ nu biala tira ye akodeɛ mɔ ɔ; bekobu wɔ sida mmakaa paa ne bekogua, ná bagyi bɛ bagua see nu.

⁸ “ ‘Na maen maen pee kɔpɛ nu wɔ kuro he anwo, na sona biala kobisa obiɛngo kyɛ, “Nzu ati yeɛ AWURADE afa ɛhe wali kuro piri he e?”

⁹ Na bekobua kyɛ, “Ɔnate kyɛ bɛpole AWURADE bɛ Nyameɛ apam ne, ná bɛɛsɔnene nyameɛ foforɛ mɔ bɛsole bɛ ne ati ɔ.’ ”

¹⁰ Nnɛma ɛmɔsu awufoɛ; yeɛ nnɛma ɛmɔdodo ye, na mmom odi kyɛ ɛmɔsu bɔ ɔkɔ (nnurehyelɛ nu) ne hahii, ofikyɛ ongosa ngɔwa ko, yeɛ ongonwu ye bɔbɔ ye maen ko.

¹¹ Ofikyɛ Salum bɔ ye baba ole Yuda hene Yosia, bɔ olili ye baba Yosia bia, ná ofili wa hɔle ne, bɔ AWURADE kã fa ye nwo ɛhe, “Ongosa ngɔwa ko,

¹² na mmom okowu wɔ nekaa bɔ bahye ye nnure bahɔ ne, na ongonwu aseɛ he ko.

¹³ Musue to sona bɔ ɔnate amumuyɛɛ so ɔkyekye ye awuro, bɔ ɔnate asisie atee so ɔfa osi ye aborɔsaen, bɔ ɔma obiɛngo yɔ ye adwuma mbaen, bɔ ɔmva ye akatuaa mma ye,

¹⁴ bɔ ɔkã kyɛ, ‘Ngosi sua bɔ nu baye, bɔ ye aborɔsaen so pumbu mɔ anu te mbiri mbiri ɔ,’ bɔ ɔpepɛ mboma gua ye nwo ɔ, ná ɔfa sida samo so, ná ɔfa mbaen paa ɔma nu ɔ.

¹⁵ Sida bɔ afa ayɛ wɔ nwo buru ne nnu ne ati, ɛdwene kyɛ ɛte hene anaa? Aso wɔ baba wannidi wanno? Aso wammua ndɛen turoloo wammɔ bra bɔ ɔtengyɛ ɔ? Na ye sɔ ti, oyiele ye yé.

¹⁶ Olili ehiafoɛ ne bɛ bɔ bɛyɛ anwumvo ɔ bɛ dwirɛ mane bɛ, na oyiele ye yé. Aso ɛhe ngyire kyɛ né ɔse me? AWURADE noa dwirɛ ɛne.

¹⁷ Nakoso w’apoobɔlɛ anwonyadeɛ angome yeɛ wɔ nye ne w’ahone li ye si ɔ; ɔne kyɛ ɛkɔhã mogya bɔ odi be ɔ kogua, ɛkɔhyɛ mmenia so ná ekosisi bɛ ɔ.”

¹⁸ Yiti Yehoakim bɔ ɔte Yuda hene Yosia awa ne, bɔ AWURADE kã fa ye nwo ɛhe: “Bengoli ye nwo aworabɔlɛ kyɛ, ‘Ayaa, nniɛma bienzua!’ anaa ‘Ayaa, nniɛma brasua!’ Bengoli ye nwo aworabɔlɛ kyɛ, “Ayaa, me mene!’ anaa ‘Ayaa, ye animnyam!’

¹⁹ Bekosie ye kyɛbɔ besie afunum ɔ, bɛkɔhwe ye ase bekofindi ye bɛkɔto Yerusalem pambim nemɔ asi dɔ.”

²⁰ Fo kɔ Lebanon kɔbɔ awuye, ma wɔ komvi so wɔ Basan; ná tea nu fi Abarim, ofikyɛ bahũhũ w’adɔfo mɔ amukoraa.

²¹ Mmerɛ bɔ né nningyein kɔ so yé ma wɔ ne, ndwudwo ngyirele wɔ, nakoso ɛnwa, ‘Mengotie.’ Efi wɔ ngwadaa nu, w’atee bɔ ɛnate so hɔ ɛne, ɛmva me noa dwirɛ nyɛ hwee.

²² Mvrama kɔsoa wɔ neafoɛ mɔ amukoraa kɔhɔ; na w’adɔfo amukoraa kɔhɔ nnurehyelɛ nu; na ɔnate wɔ bɔne yɔleɛ amukoraa ne ati, amba, ɛkɔfɛre, na wɔ nyunu kogua ase.

²³ Ao, wɔ bɔ ɛte Lebanon bɔ anwo wɔ saen wɔ sida mmakaa nu ɔ, sɛ aworɛ nu yealɛ ba wɔ so kyɛbɔ aworɛ nu yealɛ kã brasua a, kyɛbɔ ekosi kɔbɔ awuye ɔ!”

²⁴ AWURADE nwa nyoo: Kyɛ nde ase ye, sɛ Konia bɔ ye baba ole Yuda hene Yehoakim yeɛ ɔte me nzɔanoɛ kaa bɔ owura me sa famaa po a, ahaa ngopuro wɔ ngofi me sa,

²⁵ na ngɔfa wɔ ngowura bɛ bɔ bɛpena wɔ beku wɔ nemɔ sa, ɔne bɛ bɔ esuro bɛ nemɔ sa. Bɛ ole Babilɔn hene Nebukadenesa ne Kaldeafoɛ.

²⁶ Ngɔsoa wɔ ne eni bɔ ɔwole wɔ ɔ ngoogua maen foforɛ bie bɔ nna berɛ yeɛ bɛwole ɛmɔ ɔ so, na berɛ yeɛ ɛmɔkowu ɔ.

²⁷ Na aseɛ bɔ bɛ wora adɔ ye kyɛ bekosa bɛkɔwa so ne, bengosa bɛngɔwa so ko.”

²⁸ Sɔ biaa Konia he, aso ɔte nyangaa bue bɔ bemmu ye, kukue bɔ ebiala nye ngye ye nwo ɔ? Nzu ati yeɛ bɛfoane ye ne ye boso ama beegyili bɛ beguale aseɛ bɔ bɛnze so ɔ so ɔ?

²⁹ Ao aseɛ, aseɛ, aseɛ, tie AWURADE dwirɛ!

³⁰ Bɔ AWURADE kã ɛhe: “Ɛmɔhyerɛ bɛfa biaa he anwo kyɛ, ɔte ebie bɔ olle ba ɔ, biaa bɔ ongoyie ye yé wɔ mmerɛ bɔ ɔte ase, ofikyɛ ongoyie ye boso ama nu biala yé maa ɔngɔtena Dawide ahennie bia so, bɔ okosa koli hene wɔ Yuda ɔ.”