Yeremia 21 - AHYERƐLƐ KRONGRON

Nebukadenesa kotua Yerusalem

¹ Edwirɛ he yeɛ AWURADE lale ye ali hyirele Yeremia, mmerɛ bɔ Nana Sedekia somane Malkiya awa Pasure ne ɔsɔfo Maaseya awa Sefania wɔ Yeremia berɛ maa beesele ye kyɛ,

² “Mesrɛ wɔ, bisa AWURADE noa dwirɛ ma yɛ, ofikyɛ Babilɔn hene Nebukadenesa ɔbaafa koɛ toa yɛ. Ebiaa AWURADE konwu yɛ anwumvoin kyɛbɔ ye anwanwadeɛ amukoraa te ne, amaa ɔnate so Nebukadenesa wayakyi yɛ wahɔ.”

³ Yeɛ Yeremia sele bɛ kyɛ, “Mmuayɛɛ he yeɛ ɛmɔfa bɛɛma Sedekia ɔ:

⁴ ‘Bɔ AWURADE Yisrael Nyameɛ kã ɛhe: Tie, akodeɛ bɔ otira ɛmɔ, bɔ ɛmɔfa bɛko betia Babilɔn hene ne Kaldeafoɛ bɔ batua ɛmɔ kuro wɔ fasue nemɔ asi ne, ngɔkakyi ngɔwa ɛmɔ so, na ngɔboa bɛ noa wɔ kuro he afia.

⁵ Me bɔbɔ nne ɛyaa, ahonehulɛ ne anyeborolɛ ngɔfa tumi asaa ne anwoserɛ asaa ngɔho ngotia ɛmɔ.

⁶ Na ngohũhũ kuro ye aso ama, mmenia ne ngaka; na ewue anwonyerɛ piri kohũhũ bɛ.

⁷ Ye si ye, AWURADE nwa nyoo: Yuda hene Sedekia, ye somvoɛ mɔ, maen ne, yeɛ kuro ye aso ama bɔ bekonya bɛ ti bekodidi nu bekofi ewue anwonyerɛ ne anu, ngrandɛ noa, ɔne ɛhɔen ne anu ne, ngɔfa bɛ ngowura Babilɔn hene Nebukadenesa sa, bɛ pɔfoɛ mɔ sa ne mmenia bɔ bɛpena bɛ beku bɛ nemɔ sa. Na ɔkɔfa ngrandɛ kohũhũ bɛ. Ɔngɔyakyi bɛ, ongonwu bɛ anwumvoin, yeɛ bɛ nwo ngɔyɛ ye aworabɔ.’

⁸ “Na se maen he kyɛ, ‘Bɔ AWURADE kã ɛhe: Tie, méfa ngoa atee ne ewue atee mésie ɛmɔ nyunu.

⁹ Sona bɔ ɔkɔtena kuro ye aso ne, okowu ngrandɛ noa, ɛhɔen ne ewue anwonyerɛ kohũ ye; yeɛ bɔ okofi kuro ye anu kofite kɔɔfa ye nwo kowura Kaldeafoɛ bɔ batua ɛmɔ kuro ne bɛ sa ne, okonya ye ti kodidi nu, na ye ngoa kɔyɛ kyɛ koɛ nu nzesadeɛ.

¹⁰ Ofikyɛ matu me nye masie kuro he aso kyɛ ngɔfa bɔ ɔtte mayee ɔ ngoli ye, na mmom nna paa ɔ, AWURADE noa dwirɛ ɛne. Bɛkɔfa bekowura Babilɔn hene sa, na ɔkɔfa see kɔyera ye.’

¹¹ “Na kã ɛhe kyire Yuda hene awuro ama kyɛ, ‘Ɛ́mɔtie AWURADE dwirɛ:

¹² Ao Dawide awuro ama! Bɔ AWURADE kã ɛhe: Ɛ́mɔbua ndɛen turoloo ngyerɛmɔ, na ebiala bɔ babɔ ye apoo ne, ɛ́mɔpepɛ bele ye béfi aminɛlilɛfoɛ bɛ sa nu, wanyɔ sɔ a, m’ahone kohu kyɛ see, na okogye bɔ ebiala ngɔhora ye nua ɔ, ɔnate ɛmɔ bɔne yɔleɛ nemɔ ati.’ ”

¹³ Tie, wɔ bɔ ɛte bɔnza ne anu, wɔ bɔ ɛte aseɛ frɛtɛɛ so nyɔbotaen ɔ, meko metia wɔ, ɛmɔ bɔ ɛmɔkekã kyɛ, ‘Nwa yeɛ okodwu kɔwa yɛ so ɔ, anaakyɛ nwa yeɛ okowura y’atenaleɛ mɔ nu ɔ?’ AWURADE noa dwirɛ ɛne.

¹⁴ Nakoso ngɔhwe ɛmɔ so kyɛbɔ ɛmɔ yɔleɛ te ɔ, AWURADE noa dwirɛ ɛne. Ngɔto ye ɛhɔayeɛ ne anu see, na ɔkɔyera nikyee biala bɔ wapɛ ye nwo wayia ɔ.”