Yeremia 20 - AHYERƐLƐ KRONGRON

Pasure bo Yeremia

¹ Afei, Yimere awa ɔsɔfo Pasure bɔ né ɔte AWURADE awuro ne aso panyi ne, ɔtele kyɛ Yeremia ɔhyɛ sɔ ngɔm nemɔ ɔ.

² Yeɛ Pasure bole ngɔmhyɛlɛniɛ Yeremia, na ɔbɔle ye panwu wɔ Benyamin anoa piri bɔ opingye AWURADE awuro berɛ ne, ye sorɔ dɔ.

³ Na aleɛ hyene ne, Pasure yele Yeremia panwu ne, na Yeremia sele ye kyɛ, “Nna dumaa Pasure yeɛ AWURADE afa ato wɔ ɔ, na mmom Mago Misabibo.

⁴ Ofikyɛ bɔ AWURADE kã ɛhe: Tie, méfa wɔ meyɛ anwunanwuna nikye mema wɔ bɔbɔ wɔ nwo, ɔne wɔ mmango mɔ amukoraa; na bɛkɔtotɔ bɛ pɔfoɛ mɔ ngrandɛ noa wɔ aberɛ bɔ wɔ nye tua ɔ. Na ngɔfa Yuda amukoraa ngowura Babilɔn hene sa. Ɔkɔhye bɛ nnure kɔsoa bɛ kɔhɔ Babilɔn, na ɔkɔfa ngrandɛ kohũhũ bɛ.

⁵ Asa koso, ngɔfa kuro ye anu anwonya mukoraa, nu agyapadeɛ amukoraa, nu nningyein bɔ ye nyɔboɛ yɛ se amukoraa, ɔne Yuda ahemvo mbembenanneɛ amukoraa ngowura bɛ pɔfoɛ mɔ sa. Na bɛkɔfẽ bɛ nningyein bɛkɔhye bɛ bɛkɔfa bɛ bɛkɔhɔ Babilɔn.

⁶ Na wɔ Pasure ne w’awuro ama mukoraa, ɛmɔkɔhɔ nnurehyelɛ nu, na ɛkɔhɔ Babilɔn, na dɔ yeɛ ekowu ɔ, dɔ yeɛ bekosie wɔ ɔ, ɛne wɔ mmango amukoraa bɔ ahyɛ ngɔndorɔ ahyire bɛ ne.”

Yeremia fa ye dwirɛ to Nyameɛ nyunu

⁷ O AWURADE, alakalaka me, mamaa alakalaka me. W’anwoserɛ bo me deɛ so, na ali ngonim. Bɛgoro me nwo daa biala; ebiala sere me.

⁸ Ofikyɛ mmerɛ biala medwudwo a, odi kyɛ metea nu, metea nu kyɛ, “Basabasayɔlɛ ne Ɛsɛkyelɛ oo!” Ɔnate AWURADE dwirɛ ti, me nyunu gua ase, na bɛsere me daa biala.

⁹ Sɛ mekã kyɛ, “Mengɔkaye ye ko, anaa mengodwudwo wɔ ye dumaa nu ko” a, né ye dwirɛ ne ayɛ m’ahone nu kyɛ see bɔ ogye wɔ me mmowue nu ɔ. Mahyɛ me nwo so mafɛ, nakoso mengora.

¹⁰ Mate kyɛ mmeni pee bɛ́yɛ nwuhunwuhu kyɛ, “Anwunanwuna apɛ yɛ nwo ayia, Ɛmɔhã dwirɛ betia ye! Ɛ́mɔma yɛhã dwirɛ yɛtia ye!” Mmenia amukoraa bɔ me ne bɛ yɛnnyane edwirɛ biala ne, bɛpena m’asefinɛ, na bɛnwa: “Ebiaa ɔkɔmaa yɛkɔlakalaka ye, yɛkoli ye so ngonim, ná yatɔ ye so wereɛ.”

¹¹ Nakoso AWURADE gyi me si kyɛ koɛhonɛniɛ bɔ ye nwo yɛ suro ɔ. Yiti bɛ bɔ bɛtane me nye ne, bekosoti, na bengoli ngonim. Bɛ nyunu kogua ase paa, ofikyɛ ongoyie bɛ yé. Na b’animguaseɛ afebɔɔ ne, mmenia wora ngofi ye le.

¹² Nakoso Asafo AWURADE, wɔ bɔ eso teneneeniɛ nea ɔ, bɔ ɛse ahone nu ne bɛ ti nu dwirɛ ɔ, maa nwu bɛ so wereɛ bɔ ɛkɔtɔ ne, ofikyɛ wɔ yeɛ mafa me dwirɛ mato wɔ nyunu ɔ.

¹³ Ɛ́mɔto dwein bɛ́ye AWURADE ayɛ; ɛ́mɔye AWURADE ayɛ! Ofikyɛ wapepɛ wale anwumvoinniɛ ye kra wafi bɔnefoɛ sa nu.

¹⁴ Musue to kyẽa bɔ bɛwole me ɔ! Kyẽa bɔ me ni wole me ne, saleɛ ɔbɔ ye!

¹⁵ Musue to sona bɔ ɔfale amaneɛ ɔɔbɔle me se kyɛ, “Awo baa bienzua,” maa ye nye gyele paa ne.

¹⁶ Sɔ sona ne, maa ɔ́yɛ kyɛ nguro bɔ AWURADE sɛkyele bɛ bɔ wannwu bɛ anwumvoin ne; maa ɔte esuɛ ngyerɛmɔ, ná ɔte awuye eyiagyina,

¹⁷ ofikyɛ wangu me wɔ bɛ kunu maa me ni anyɛ m’asieleɛ maa manga ye kunu afebɔɔ.

¹⁸ Nzu ati koraa yeɛ mvili bɛ kunu mvitele mmale, mma nwuni ɛfɛɛ ne aworabɔlɛ, maa animguaseɛ yili m’asetena nu to ye?