Yeremia 2 - AHYERƐLƐ KRONGRON

Nyameɛ dwene Yisrael nwo

¹ Afei, AWURADE lale ye dwirɛ ali hyirele me kyɛ,

² “Kɔ ná kɔbɔ ye dawure kyire Yerusalem kyɛ, AWURADE nwa nyoo: Mekaye wɔ ndaluwa nu anwofama ne, w’atɔmvorɛ mmerɛ nu ehurolɛ ne, mmerɛ bɔ elili me si wɔ ɛserɛ so, wɔ aseɛ bɔ né belluale so hwee ne aso ne.

³ Né Yisrael te krongron ma AWURADE, ye fieso aleɛ bɔ olili moa fale hɔ ɛne; bɛ bɔ belili bie amukoraa belili fɔ; musue tole bɛ, AWURADE noa dwirɛ ɛne.”

⁴ Ao, Yakob boso ama ne Yisrael mmusua mukoraa, ɛ́mɔtie AWURADE dwirɛ.

⁵ AWURADE nwa nyoo: “Nzikyɛ mvomsoɛ yeɛ ɛmɔ nana mɔ benwuni ye wɔ me nwo, bɔ ɔnate so bɛhwene bɛ nwo befili me nwo bɛhɔle dedeede beelili nningyein mbaen mbaen si, maa bɛ koso bɛkakyili mmenia mbaen ɔ?

⁶ Bammisa kyɛ, ‘AWURADE wɔ nisua? Ye bɔ ɔyele yɛ fili Misraim aseɛ so wale ne, bɔ olili yɛ nyunu fale yɛ fale ɛserɛ so, aseɛ pralaa ne ngumaa aseɛ so, wɔ aseɛ bɔ esue ndɔ wɔ so, bɔ so te awosii kabii ne, aseɛ bɔ ebiala mbɛ nu wɔ so, bɔ ebiala ɔtte so ne.’

⁷ Mvale ɛmɔ mmale aseɛ bɔ ɔkye aleɛ ɔ so, kyɛ ɛmɔli so aleɛ ne so nningyein paa nemɔ. Nakoso ɛmɔdwuli m’aseɛ ne aso ne, ɛmɔfale efiɛ bɛhane ye, ná ɛmɔmane m’agyapadeɛ yɛle akyiwadeɛ.

⁸ Asɔfo nemɔ bammisa kyɛ, ‘AWURADE wɔ nisua?’ Yeɛ bɛ bɔ bekyirekyire mmeraa ne anu ne, bɛnze me; bɛ neafoɛ nemɔ, bɛyɔle bɔne betiale me; bosoen Baal yeɛ ngɔmhyɛlɛfoɛ bɛfale ye bɛhyɛle ngɔm ɔ, na belili nningyein bɔ mvasoɛ nne so ɔ si.

⁹ “Yiti ngɔhɔ so ngɔbɔ ɛmɔ kwaadu, na ngɔbɔ ɛmɔ boso ama mɔ koso kwaadu, AWURADE noa dwirɛ ɛne.

¹⁰ Ɛ́mɔpɛ nu bɛhɔ Kipro supɔ nemɔ aso bɛɛnea, ɛ́mɔsoma maa bɛhɔ Kedare bɛneanea nu yé; ɛ́mɔnea sɛ edwirɛ sɔaa bie wasi berɛ le a!

¹¹ Aso maen bie wasesã ye nyameɛ mɔ, bɔ ye po nna nyameɛ mɔ ahɔ ɔ? Nakoso me maen de, wafa nningyein bɔ mvasoɛ nne so ɔ wasesã ye animnyam.

¹² Ao ewienu, ma ɛhe ɔyɛ wɔ nwanwa, maa ɔyɛ wɔ suro paa, ma wɔ nwo dwiri wɔ paa, AWURADE noa dwirɛ ɛne.

¹³ Ofikyɛ me maen abɔ musue nyɔ: bapo me, me bɔ nde ngoa nzue mbombonzue ne, yeɛ baatu bɛ bɔbɔ b’abura mɔ, abura bɔ ye nwo adwudwa, bɔ nzue ngora nu gyina ɔ.

¹⁴ Aso Yisrael te kanganiɛ? Aso ɔte awuro sona? Nzu ati yeɛ wakakyi nikyee bɔ bɛbɔ apaa bɛfa e?

¹⁵ Gyata akrɔngrɔma nemɔ bepo ye, babobɔ nu serɛserɛ paa. Bama ye aseɛ akakyi aseɛ pralaa; bayerayera ye nguro nemɔ, bɔ sona fee ɔtte so ɔ.

¹⁶ Afei koso, Memfisefoɛ ne Tapanesefoɛ basɛkye w’ahennie abotire ne.

¹⁷ Aso nna wɔ bɔbɔ deinn yeɛ ɔnate kyɛ apo AWURADE wɔ Nyameɛ ne ati, afrɛfrɛ ɛhe ama wɔ nwo, wɔ mmerɛ bɔ olili wɔ nyunu fale wɔ pɛle atee ne?

¹⁸ Sɛ ɛkɔ Misraim kɔno asue Naele nzue a, nzikyɛ mvasoɛ yeɛ ekonya ɔ? Yeɛ sɛ ɛkɔ Asiria kɔno asue Yufreti nzue a, nzikyɛ mvasoɛ yeɛ ekonya ɔ?

¹⁹ Wɔ bɔbɔ wɔ bɔne kɔbɔ wɔ ti so, na Nyameɛ si lilɛ bɔ ayakyi ne, sɔ suban ne kobua wɔ foɛ. Nwu ye ná kaye kyɛ ɔte aworabɔlɛ dwirɛ kyɛ ɛkɔpo AWURADE wɔ Nyameɛ ɔ; na me nwo suronyi ɔnne wɔ nu. AWURADE, Asafo Nyameɛ noa dwirɛ ɛne.

²⁰ Ofikyɛ ofi tete yeɛ mmubuli wɔ kɔnnua nu, yeɛ mmubuli wɔ panwu nu ɔ, na ɛhane kyɛ, “Mengɔso wɔ!” Nahorɛ nu, ɛkotole mmosoen ɛbɔle adwaman wɔ bokaa tendenn biala so ne bakaa monɛ biala abo.

²¹ Nakoso nnuale wɔ kyɛ bobe paa, bɔ baneanea nu baye bafi ye mma paa nu ɔ. Na ɔyɛle sɛɛ bɔ akakyi bobe bakaa mbaen bɔ mvasoɛ nne wɔ so ɔ?

²² Ɔwɔ nu kyɛ ɛfa kondu bia, bɔ saminaen pee boka so ɔ, nakoso w’amumuyɛɛ te ngekalewa wɔ me nye so, AWURADE Nyameɛ noa dwirɛ ɛne.

²³ Ɔyɛ sɛɛ ati bɔ ɛkã kyɛ, “Me nwo ogguale fiɛ, mangɔanni Baal mɔ asi” ɔ? Nea w’atee bɔ ɔla bɔnza ne anu ne; nwu nikyee bɔ yeɛ ayɔ ɔ, afupɔngɔ akrɔngrɔma bɔ ye nwo yɛ nyera bɔ ohuru pepe ɔ,

²⁴ eburo afunum bɔ odwu ɛserɛ so a né wadwu ye deɛ nu, bɔ ɔsɔ a, ɔsɔ mvrama mverɛ ɔ! Nwa yeɛ ɔkɔhora kɔbrɛ ye akɔnnɔ ase ɔ? Ebiala bɔ ɔpena ye ne, ɔmvɛ; sɛ ye bosome so a, benwu ye.

²⁵ Nea yé ná amva wɔ gya angua ase, ná nzuhɔen amma wɔ komvi anwo. Nakoso ɛnwa, “Anyelasoɛ biala ɔnne berɛ, ofikyɛ mahuro ɛwɔfoɛ mɔ, na bɛ ala yeɛ ngogu bɛ so ɔ.’

²⁶ “Kyɛbɔ bɛkye awueniɛ a ye nyunu gua ase ne, sɔ ala yeɛ Yisrael maen nyunu agua ase ɔ: bɛ ne b’ahemvo, bɛ mbanyi mɔ, b’asɔfo ne bɛ ngɔmhyɛlɛfoɛ

²⁷ bɛkã bekyire bakaa kyɛ, ‘Me se ole wɔ,’ yeɛ bɛkã bekyire nyɔboɛ kyɛ, ‘Wɔ yeɛ ɛwole me ɔ.’ Ofikyɛ bɛ si yeɛ bakakyi bama me ɔ, na nna bɛ nyunu ɔ. Nakoso sɛ bɛkɔ amaneɛ nu a, bɛkã kyɛ, ‘Dwɔso pepɛ de yɛ e!’

²⁸ Nakoso wɔ mmosoen bɔ agyinagyina ama wɔ bɔbɔ wɔ nwo ne, bɛwɔ nisua? Sɛ bɛkɔhora bɛkɔpepɛ bekole wɔ wɔ w’amaneɛ mmerɛ nu a, maa bedwɔso e! Ao Yuda, kyɛbɔ wɔ nguro nemɔ bɛ somaa te ne, sɔ ala yeɛ wɔ mmosoen nemɔ bɛ somaa te ɔ.

²⁹ “Nzu ati yeɛ ɛmɔbɔ me kwaadwu ɔ? Ɛmɔ amukoraa bayɛ me nwo lɔen, AWURADE noa dwirɛ ɛne.

³⁰ Ɛhwenɛ bɔ mahwe ɛmɔ mma mɔ bɛ so ne, wayɛ mbaen, bande fo. Ɛmɔ bɔbɔ ɛmɔ ngrandɛ yeɛ wahũ ɛmɔ ngɔmhyɛlɛfoɛ kyɛ gyata bɔ ye nye aboro ɔ.

³¹ Na ɛmɔ, sɔ aworɛ ndoatoasoɛ he, ɛ́mɔtie AWURADE dwirɛ ne! Aso makakyi ɛserɛ so mama Yisrael, anaa makakyi aseɛ bɔ so te awosii kabii ɔ? Na nzu ati yeɛ me maen kã kyɛ, ‘Yɛle yɛ nwo, yɛngɔwa wɔ berɛ ko’ ɔ?

³² Aso taluwa, ye wora kofi ye mbembenanneɛ, anaa atɔmvorɛ braa, ye wora kofi ye ataadeɛ? Nakoso me maen de, ye wora afi me, mmerɛ tendenn bɔ bɛka a bennwu ye noa ɔ.

³³ “Nea kyɛbɔ esi se atee bɔ ɛfa so kɔpena wɔ dɔfo mɔ ɔ! Yiti ɔnate so mmrasua bɔ bɛtte mayee po, ahyirehyire bɛ w’atee.

³⁴ Ehiafoɛ bɔ bedi be ɔ, bɛ mogya yeɛ wayɛ wɔ ndaadeɛ nu ɔ, ɔwɔ nu kyɛ angye bɛ kyɛ betu anoa bo de, nakoso ɛhe amukoraa si ne,

³⁵ ɛnwa, ‘Medi be, amba, ɔngɔfɛ me so yaa.’ Afei ɔnate kyɛ ahã kyɛ, ‘Nnyɔle bɔne’ ne ati, mebaabua wɔ ndɛen.

³⁶ Nzu ati yeɛ ɛsẽ faen ná ɛsẽ faen bɔ ɛkakyi w’atee bɔ ɛnate so ye! Misraim kogua wɔ nyunu ase, kyɛbɔ Asiria guale wɔ nyunu ase ne.

³⁷ Berɛ yeɛ ekofi kɔwa bɔ wɔ sa gua wɔ ti ɔ; ofikyɛ bɛ bɔ afa wɔ wora awura bɛ nu ne, AWURADE apo bɛ, na ɛngɔfa bɛ so ngɔyɛ yé.